ក្រុមបាល់ទះបុរសជម្រើសជាតិកម្ពុជា ដណ្តើមបានកៅអីឡើងទៅលេងក្នុងពានរង្វាន់បាល់ទះប្រចាំតំបន់អាស៊ាន ផ្នែកបុរស SEA V.League ឆ្នាំ២០២៥ ខាងមុខ ក្រោយឈរកំពូលតារាងនៅក្នុងពានរង្វាន់ SEA V.League Challenge ក្នុងនាមជាម្ចាស់ផ្ទះ ដែលបានបញ្ចប់នៅរាត្រីថ្ងៃអាទិត្យ ទី១ ខែកញ្ញា ឆ្នាំ២០២៤ លើទីលានវិមានពហុកីឡដ្ឋានជាតិ ក្នុងរាជធានីភ្នំពេញ។
លទ្ធផលនៃការប្រកួតក្នុងពានរង្វាន់បាល់ទះបុរស SEA V.League Challenge មាន៖
៣០ សីហា ២០២៤
គូទី១ សិង្ហបុរី ៣-០ ឡាវ
គូទី២ កម្ពុជា ៣-១ ម៉ាឡេស៊ី
៣១ សីហា ២០២៤
គូទី១ ម៉ាឡេស៊ី ៣-០ សិង្ហបុរី
គូទី២ កម្ពុជា ៣-០ ឡាវ
១ សីហា ២០២៤
គូទី១ ម៉ាឡេស៊ី ៣-០ ឡាវ
គូទី២ កម្ពុជា ៣-១ សិង្ហបុរី
ដូច្នេះតារាងចំណាត់ថ្នាក់ក្រោយចប់ការប្រកួតមានដូចជា៖
១) កម្ពុជា មាន៩ពិន្ទុ
២) ម៉ាឡេស៊ី មាន៦ពិន្ទុ
៣) សិង្ហបុរី មាន៣ពិន្ទុ
៤) ឡាវ មិនមានពិន្ទុ
យ៉ាងណាក្តីក្រុមទាំង៤ នៅសល់បេសកកម្មបន្ថែមមួយទៀតគឺប្រកួតដណ្តើមប្រាក់រង្វាន់សម្តេចមហាបវធិបតី ហ៊ុន ម៉ាណែត នៅថ្ងៃចន្ទ ទី២ ខែកញ្ញា ឆ្នាំ២០២៤ ដោយប្រើរូបមន្ត៖
គូទី១ ម៉ោង៨ព្រឹក ក្រុមលេខ១ កម្ពុជា ប៉ះ ក្រុមលេខ៤ ឡាវ
គូទី២ ម៉ោង១០ព្រឹក ក្រុមលេខ២ ម៉ាឡេស៊ី ប៉ះក្រុមលេខ៣ សិង្ហបុរី
គូទី៤ ម៉ោង៤ល្ងាច ក្រុមចាញ់ ប៉ះ ក្រុមចាញ់ យកចំណាត់ថ្នាក់លេខ៣
គូទី៥ ម៉ោង៦:៣០នាទីល្ងាច ក្រុមឈ្នះ ប៉ះ ក្រុមឈ្នះ យកជើងឯក។
គ្រប់ការប្រកួតមានផ្សាយផ្ទាល់ដោយសារព័ត៌មានត្រយង ខណៈបងប្អូនចង់ចូលទស្សនាផ្ទាល់អាចទិញសំបុត្រនៅមាត់ច្រកចូលទីលានប្រកួត បាន។
ដូច្នេះក្រុមជម្រើសជាតិកម្ពុជា នឹងត្រូវឡើងទៅប្រកួតពានរង្វាន់ SEA V.League ឆ្នាំ២០២៥ ជាមួយក្រុមថៃ ឥណ្ឌូណេស៊ី និងហ្វីលីពីន ដែលកំពុងរង់ចាំ ខណៈក្រុមវៀតណាម មានការសម្រេចជាបឋមថានឹងធ្លាក់មកលេងក្នុងពានរង្វាន់ SEA V.League Challenge ឆ្នាំ ២០២៥ ជាមួយម៉ាឡេស៊ី សិង្ហបុរី ឡាវ និងមីយ៉ាន់ម៉ា៕
