សិល្បៈជាតិ៖ ក្រោយប្រកាសកាលបរិច្ឆេទនៃការប្រគំតន្ត្រី និងការលក់សំបុត្រសម្រាប់ចូលរួមទស្សនាការប្រគំតន្ត្រីទោលជាលើកដំបូងរបស់កំពូលតារាចម្រៀងឈានមុខអ្នកនាង ឱក សុគន្ធកញ្ញា ភ្លាម មានអ្នកគាំទ្រដែលជាហ្វេនសំឡេងច្រៀងរបស់អ្នកនាង រំភើប អរសប្បាយ ដោយក្នុងនោះតាមដំណឹងប្រកាសចុងក្រោយដោយសារតែចំនួនអ្នកសំរុកបុកចូលទិញសំបុត្រព្រមៗគ្នាច្រើនពេក រហូតធ្វើឱ្យគាំង App។
ក្រោយ Solo Concert របស់អ្នកនាង ឱក សុគន្ធកញ្ញា ក្រោមចំណងជើង «Rise of The Queen» ត្រូវបានប្រកាសជាផ្លូវការ គេឃើញមានអ្នកគាំទ្រ ហ្វេនដែលមិនត្រឹមតែជាមនុស្សសាមញ្ញធម្មតានោះឡើយ សូម្បីតែបុគ្គលល្បីៗ ដូចជា អ្នកផលិតមាតិកាជាដើមបានត្រៀមរងចាំយ៉ាងអន្ទះសារ ដើម្បីកក់សំបុត្រចូលទស្សនាព្រឹត្តិការណ៍ប្រគំតន្ត្រីរបស់អ្នកម្ដាយកូន២រូបនេះ។
គេបានដឹងហើយថា នៅក្នុងអាជីពសិល្បៈរបស់អ្នកនាង មានបទចម្រៀងល្បីៗជាច្រើនដែលហ្វេនៗប្រាថ្នាចង់ឃើញអ្នកនាង បកស្រាយ នៅក្នុងការប្រគំតន្ត្រីនាពាក់កណ្ដាលខែកញ្ញាខាងមុខនេះ ហើយនេះក៏ជាមូលហេតុមួយដែលធ្វើឱ្យគ្រាន់តែបើកកក់សំបុត្រភ្លាម App កក់សំបុត្រដល់ថ្នាក់គាំងលែងដំណើរការ រហូតមានហ្វេនៗជាច្រើនរអ៊ូដោយក្ដីបារម្ភខ្លាច កក់មិនទាន់ឬក៏មិនទាន់ ដោយអ្នកខ្លះថែមទាំងភ័យខ្លាចគេ Refund លុយឱ្យវិញថែមទៀត។
តាមរយៈការលើកឡើងនេះបានសបង្ហាញឱ្យឃើញថាត្បិតរៀបអាពាហ៍ពិពាហ៍ និងមានកូនរហូតដល់ទៅ ២នាក់ហើយក្ដី ប៉ុន្តែប្រជាប្រិយភាពរបស់អ្នកនាង នៅតែមិនស្រកស្រុត ដោយមានការដណ្ដើមគ្នាទិញសំុត្រនៅលើ App ប្រៀបដូចជាសង្គ្រាម នាថ្ងៃទី១ ខែកញ្ញា ឆ្នាំ២០២៤ គឺជាទឡ្ហីករណ៍ស្រាប់៕
