ក្រុមបាល់ទះជម្រើសជាតិកម្ពុជា នឹងត្រូវជួបម៉ាឡេស៊ី ដើម្បីប្រកួតដណ្តើមប្រាក់រង្វាន់សម្តេចមហាបវធិបតី ហ៊ុន ម៉ាណែត SEA V.League Challenge ឆ្នាំ២០២៤ នៅថ្ងៃចន្ទ ទី២ ខែកញ្ញា ឆ្នាំ២០២៤ វេលាម៉ោង ៧:០០នាទីយប់នេះ នៅក្នុងសាលពហុកីឡដ្ឋានជាតិ (ស្តាតអូឡាំពិក)។
មុនការប្រកួតវគ្គផ្ដាច់ព្រ័ត្រដណ្ដើមចំណាត់ថ្នាក់លេខ១ មកដល់ក៏មានមួយគូទៀតដែលនឹងត្រូវប្រកួតដណ្ដើមចំណាត់ថ្នាក់លេខ៣ គឺក្រុមបាល់ទះសិង្ហបុរី ត្រូវជួបឡាវ នៅវេលាម៉ោង ៥:០០នាទីល្ងាចតទៅ។
ការប្រកួតដណ្តើមប្រាក់រង្វាន់សម្តេចមហាបវធិបតី ហ៊ុន ម៉ាណែត សម្រាប់ក្រុមដែលជាម្ចាស់ជើងឯក នឹងទទួលបានប្រាក់រង្វាន់ ១០០លានរៀល លេខ២ នឹងទទួលបាន ៣០លានរៀល លេខ៣ ទទួលបាន ២០លានរៀល
និងលេខ៤ ទទួលបាន ១០លានរៀល។
យ៉ាងណាក្ដីក្រុមបាល់ទះបុរសជម្រើសជាតិកម្ពុជា បានដណ្តើមកៅអីឡើងទៅលេងក្នុងពានរង្វាន់បាល់ទះប្រចាំតំបន់អាស៊ាន ផ្នែកបុរស SEA V.League ឆ្នាំ២០២៥ ខាងមុខ ក្រោយឈរកំពូលតារាងនៅក្នុងពានរង្វាន់ SEA V.League Challenge ក្នុងនាមជាម្ចាស់ផ្ទះ ដែលបានបញ្ចប់នៅរាត្រីថ្ងៃអាទិត្យ ទី១ ខែកញ្ញា ឆ្នាំ២០២៤ លើទីលានវិមានពហុកីឡដ្ឋានជាតិ ក្នុងរាជធានីភ្នំពេញ។
ដូច្នេះក្រុមជម្រើសជាតិកម្ពុជា នឹងត្រូវឡើងទៅប្រកួតពានរង្វាន់ SEA V.League ឆ្នាំ២០២៥ ជាមួយក្រុមថៃ ឥណ្ឌូណេស៊ី និងហ្វីលីពីន ដែលកំពុងរង់ចាំ ខណៈក្រុមវៀតណាម មានការសម្រេចជាបឋមថានឹងធ្លាក់មកលេងក្នុងពានរង្វាន់ SEA V.League Challenge ឆ្នាំ ២០២៥ ជាមួយម៉ាឡេស៊ី សិង្ហបុរី ឡាវ និងមីយ៉ាន់ម៉ា៕
