កីឡាករ វឿន វាសនា សមាជិករបស់ក្រុមបាល់ទះជម្រើសជាតិកម្ពុជា នឹងចេញដំណើរទៅកោះតៃវ៉ាន់ ដើម្បីចូលរួមជាមួយក្រុមបាល់ទះ Win Streak ក្រោយចប់ព្រឹត្តិការណ៍ SEA V.League Challenge និងពានរង្វាន់សម្តេចមហាបវធិបតី ហ៊ុន ម៉ាណែត ឆ្នាំ២០២៤។
មូលហេតុ វឿន វាសនា ប្រយ៉ាប់ចេញដំណើរទៅតៃវ៉ាន់ ភ្លាមៗដោយសារ Win Streak ត្រៀមចូលរួមពានរង្វាន់ប្រចាំទ្វីបអាស៊ី Asian Men’s Club Volleyball Championship 2024 ដែលប្រទេសអ៊ីរ៉ង់ ទទួលរៀបចំធ្វើជាម្ចាស់ផ្ទះ នៅទីក្រុង Yazd គ្រោងនឹងចាប់ផ្តើមចន្លោះពីថ្ងៃទី៨ ដល់ថ្ងៃទី១៥ ខែកញ្ញា។
ក្រុមបាល់ទះជម្រើសជាតិកម្ពុជា បានក្លាយជាម្ចាស់ប្រាក់រង្វាន់១០០លានរៀលក្នុងព្រឹត្តិការណ៍បាល់ទះពានរង្វាន់សម្តេចមហាបវធិបតី ហ៊ុន ម៉ាណែត ឆ្នាំ២០២៤ ដែលធ្វើនៅល្ងាចថ្ងៃចន្ទ ទី២ ខែកញ្ញា ឆ្នាំ២០២៤ នេះលើទីលានវិមានពហុកីឡដ្ឋានជាតិ ក្នុងរាជធានីភ្នំពេញ ក្រោយយកឈ្នះលើក្រុមម៉ាឡេស៊ី ដោយលទ្ធផល ៣សិតទល់០។
សរុបចំណាត់ថ្នាក់និងប្រាក់រង្វាន់ក្នុងពានរង្វាន់សម្ដេចមហាបរវធិបតី ហ៊ុន ម៉ាណែត SAMDECH MOHA BORVOR THIPADEI -2024មាន៖
លេខ១ ក្រុមកម្ពុជា ទទួលទឹកប្រាក់លើកទឹកចិត្តចំនួន ១០០ លានរៀល
លេខ២ ក្រុមម៉ាឡេស៊ី ទទួលទឹកប្រាក់លើកទឹកចិត្ត ចំនួន ៣០ លានរៀល
លេខ៣ ក្រុមសិង្ហបុរី ទទួលទឹកប្រាក់លើកទឹកចិត្ត ចំនួន ២០ លានរៀល
លេខ៤ ក្រុមឡាវ ទទួលទឹកប្រាក់លើកទឹកចិត្ត ចំនួន១០ លានរៀល
សូមបញ្ជាក់ថាបេក្ខភាពក្នុងពានរង្វាន់សម្ដេចមហាបរវធិបតី ហ៊ុន ម៉ាណែត SAMDECH MOHA BORVOR THIPADEI -2024 ជ្រើសចេញពីពានរង្វាន់ SEA V.League Challenge ដោយមានក្រុមចូលរួមចំនួន៤ រួមមានកម្ពុជា ឡាវ ម៉ាឡេស៊ី និងសិង្ហបុរី ដែលចាប់ប្រកួតពីថ្ងៃទី៣០ខែសីហា ដល់ថ្ងៃទី១ ខែកញ្ញា ឆ្នាំ២០២៤ នៅវិមានពហុកីឡដ្ឋានជាតិ។
លទ្ធផលនៃការប្រកួតក្នុងពានរង្វាន់បាល់ទះបុរស SEA V.League Challenge មាន៖
៣០ សីហា ២០២៤
គូទី១ សិង្ហបុរី ៣-០ ឡាវ
គូទី២ កម្ពុជា ៣-១ ម៉ាឡេស៊ី
៣១ សីហា ២០២៤
គូទី១ ម៉ាឡេស៊ី ៣-០ សិង្ហបុរី
គូទី២ កម្ពុជា ៣-០ ឡាវ
១ សីហា ២០២៤
គូទី១ ម៉ាឡេស៊ី ៣-០ ឡាវ
គូទី២ កម្ពុជា ៣-១ សិង្ហបុរី
ដូច្នេះក្រុមជម្រើសជាតិកម្ពុជា នឹងត្រូវឡើងទៅប្រកួតពានរង្វាន់ SEA V.League ឆ្នាំ២០២៥ ជាមួយក្រុមថៃ ឥណ្ឌូណេស៊ី និងហ្វីលីពីន ដែលកំពុងរង់ចាំ ខណៈក្រុមវៀតណាម មានការសម្រេចជាបឋមថានឹងធ្លាក់មកលេងក្នុងពានរង្វាន់ SEA V.League Challenge ឆ្នាំ ២០២៥ ជាមួយម៉ាឡេស៊ី សិង្ហបុរី ឡាវ និងមីយ៉ាន់ម៉ា៕
