កំពុងតែមានការគាំទ្រជាច្រើនពីបងប្អូនប្រជាពលរដ្ឋ ក៏ដូចជាក្រុមហ៊ុនដែលជាម្ចាស់ឧបត្ថម បច្ចុប្បន្នទីផ្សារប្រដាល់គុនខ្មែរ នៅក្នុងប្រទេសកម្ពុជា បានឈានដល់កម្រិតខ្ពស់ ដោយអ្នកប្រដាល់ល្បីៗឈ្មោះមួយចំនួនមានតម្លៃខ្លួនដល់ម៉ឺនដុល្លាររាល់ពេលឡើងសង្វៀនម្ដងៗ ដោយមានប្រកួតខ្លះទៀតមានដាក់រថយន្ត សម្រាប់ផ្ដល់ជូនកីឡាករជ័យលាភីផងដែរ។
ស្របពេលកាលពីរាត្រីថ្ងៃទី៨ កញ្ញា នៅក្នុងកម្មវិធីសប្រដាល់គុនខ្មែរ 8 Men Tournament មានការប្រកួតដណ្ដើមជ័យជម្នះឡើងទៅកាន់វគ្គផ្ដាច់ព្រ័ត្រ ដើម្បីប្រកួតដណ្តើមកាដូយក្សឡានខ្លាញ់គោពី GANZBERG ដោយក្នុងនោះក៏បានរកឃើញកីឡាករដែលឈានដល់វគ្គផ្ដាច់ព្រ័ត្ររួចរាល់គឺ កីឡាករ ពុទ្ធ សំបូរ នឹងត្រូវជួបកីឡាករ ហុង សុវណ្ណចាន់សុធី នៅវគ្គផ្ដាច់ព្រ័ត្រ ថ្ងៃទី ២៩ ខែកញ្ញា ឆ្នាំ២០២៤ខាងមុខនេះ។
ថ្ងៃសារព័ត៌មានត្រយង សូមបង្ហាញមុខកីឡាករគុនខ្មែរចំនួន ៧រូបដែលបានប្រើប្រាស់ក្បាច់គុនដូនតាខ្មែរ រហូតបានឈ្នះរថយន្តម្នាក់១គ្រឿង៖
ទី១៖ អ្នកលេងគុនខ្មែរ ពេជ្រ សម្បត្តិ បានក្លាយជាម្ចាស់រថយន្តពីកម្មវិធីគុនខ្មែរអលស្តារ បន្ទាប់ពីទទួលបានសំឡេងគាំទ្រច្រើនជាងគេក្នុងចំណោមកីឡាករគុនខ្មែរចំនួន ៣នាក់ផ្សេងទៀត ដែលជាបេក្ខភាពដណ្តើមរថយន្ត កាលពីថ្ងៃទី២២ ខែសីហា ឆ្នាំ២០២៣។
ទី២៖ ជើងខ្លាំងគុនខ្មែរ ឃឹម បូរ៉ា ឈ្នះឡាន១គ្រឿង ក្រោយផ្តួលគូប្រកួត អេលីត សាន់ ត្រឹមទឹកទី១ ពីព្រឹត្តិការណ៍ប្រដាល់ប៊ូសស្ត្រងឲ្យរថយន្ត នាយប់ថ្ងៃទី១១ តុលា នៅក្នុងវិមានពហុកីឡដ្ឋានជាតិ។
ទី៣៖ កីឡាករវ័យ២០ឆ្នាំ អេ អាំម៉ារីន ទទួលបានរង្វាន់រថយន្ត Pick-Up ថ្មីសន្លាង ១គ្រឿងពី Ganzberg កាលពីថ្ងៃអាទិត្យ ទី៥ ខែវិច្ឆិកា ឆ្នាំ២០២៣ កន្លងទៅ លើសង្វៀន ក្នុងទឹកដីនៃប្រទេសអូស្រ្តាលី។
ទី៤៖ កីឡាករជើងខ្លាំងមានរហស្សនាម «អ្នកលេងពូថៅដៃ» ធឿន ធារ៉ា ដណ្ដើមយកជ័យជម្នះចំនួន៣លើកជាប់ៗគ្នា ពីការប្រកួតគុនខ្មែរ Kun Khmer World Cup 2023 នាយប់ថ្ងៃទី២៣ ខែវិច្ឆិការ ឆ្នាំ២០២៣ នឹងបានក្លាយជាម្ចាស់ខ្សែក្រវាត់ក្នុងប្រភេទទម្ងន់ ៧២គីឡូក្រាម និងទទួលបានកាដូយក្ស គឺរង្វាន់ឡាន Pick-Up ថ្មីសន្លាង១គ្រឿងទៀតពីម្ចាស់ឧបត្ថម្ភធំ។
ទី៥៖ កីឡាករគុនខ្មែរ លន បញ្ញា បានក្លាយជាម្ចាស់រថយន្តខ្លាញ់គោថ្មីមួយគ្រឿងម៉ាក Mazda Seden ពីប៊ូសស្រ្តង នៅថ្ងៃទី១៤ ខែធ្នូ ឆ្នាំ២០២៣ បន្ទាប់ពីយកឈ្នះកីឡាករ មឿន សុខហ៊ុច ក្រោយមានសម្លេងឆ្នោតគាំទ្រឲ្យឡើងទៅប្រកួតវគ្គដណ្ដើម ក្នុងចំណោមកីឡាករគុនខ្មែរ ៤រូបមាន ដំរីភ្លុកពិឃាដ ផល សោភ័ណ្ឌ, ជើងរន្ទះដងទន្លេសាប មឿន សុខហ៊ុច, នាគកំណាចខេត្តកោះកុង យ៉េន ឌីណា និងអ្នកលេងគុនខ្មែរ លន បញ្ញា។
ទី៦៖ កីឡាករគុនខ្មែរ ចាន់ ប៊ុនហឿន បានក្លាយជាម្ចាស់រថយន្តខ្លាញ់គោថ្មីពីប៊ូសស្រ្តង ក្រោយយកឈ្នះ មឿន សុខហ៊ុច ក្នុងព្រឹត្តិការណ៍ “ប៊ូសស្រ្តងជួយគុនខ្មែរ អ្នកខ្លាំងពូកែ ប៊ូសស្រ្តងឲ្យឡាន” កាលពីយប់ថ្ងៃទី២៨ ខែមីនា ឆ្នាំ២០២៤។
ទី៧. កីឡាករ គុនខ្មែរ បឺត សង្ឃឹម ទទួលបានរង្វាន់ឡាន ពី Boostrong ក្រោយផ្តួលកីឡាករ វ៉ាន វឿន ត្រឹមទឹកទី១ នៅវគ្គផ្តាច់ព្រ័ត្រ និងជាម្ចាស់ឡានទី៧ បន្ទាប់ពីអ្នកប្រដាល់គុនខ្មែរ ៦រូបខាងលើ។
ជាក់ស្ដែងថ្មីៗនេះ អ្នកលេងគុនខ្មែរ បឺត សង្ឃឹម គឺជាកីឡាករទី៧ ដែលប្រើក្បាច់គុណខ្មែរ ទទួលបានរង្វាន់ឡាន បន្ទាប់ពី ទី១.ពេជ្រ សម្បត្តិ ទី២. ឃឹម បូរ៉ា ទី៣. អេ អាំម៉ារីន ទី៤. ធឿន ធារ៉ា ទី៥.លន បញ្ញា និង ទី៦.ចាន់ ប៊ុនហឿន។
ដូចនេះ អ្នកលេងគុនខ្មែរ ហុង សុវណ្ណចាន់សុធី នឹងត្រូវត្រៀមឡើងសង្វៀនជួប ពុធ សំបូរ នៅវគ្គផ្ដាច់ព្រ័ត្រ ដណ្ដើមឡាន ពីកម្មវិធី 8 Men Tournament នៅថ្ងៃទី ២៩ ខែកញ្ញា ឆ្នាំ២០២៤។
សូមរំលឹកដែរថា ក្រៅពីអ្នកប្រដាល់ ៧រូបខាងលើកក៏នៅមានអ្នកប្រដាល់ម្នាក់ទៀតក៏ធ្លាប់ទទួលបានរង្វាន់រថយន្ត ១គ្រឿងផងដែរ គឺជាងកាត់សក់ដៃឯក ព្រុំ សំណាង ប៉ុន្តែកាលនោះមិនមែនឈ្នះដោយប្រើក្បាច់គុនប្រដាល់គុនខ្មែរលើសង្វៀន តែជាការប្រកួតក្នុងព្រឹត្តិការណ៍បីស្ត្រីពិភពលោក Boostrong Poer to Women Festival ដែលមានអ្នកចុះឈ្មោះចូលរួមចំនួន ៥០០គូ។
