នៅថ្ងៃទី១០ ខែកញ្ញា ឆ្នាំ២០២៤ ម៉ោង ១១:០០យប់ ក្រុមបាល់ទាត់ជម្រើសជាតិសាន់ម៉ារីណូ បានណាត់ក្រុមជម្រើសជាតិម៉ុលដាវី ប្រកួតមិត្តភាពអន្តរជាតិ អំឡុងថ្ងៃ FIFA Day។ ចាំមើលតើយប់នេះក្រុមជម្រើសជាតិសាន់ម៉ារីណូ អាចរកជ័យជម្នះ២ប្រកួតជាប់ៗគ្នាបានដែរឬទេ?
នៅក្នុងរយ:ពេល២០ឆ្នាំមកនេះ ក្រុមបាល់ទាត់ជម្រើសជាតិសាន់ម៉ារីណូ ស្ថិតក្នុងទ្វីបអឺរ៉ុប ទើបតែអាចបង្កើតកំណត់ត្រាថ្មីបាន ពោលគឺរកបានជ័យជម្នះជូនមាតុភូមិរបស់ខ្លួន ដោយបានឈ្នះលើក្រុមលិចតិនស្តាញ ដោយលទ្ធផល ១-០ ក្នុងពារង្វាន់ 2024–25 Nations League កាលពីថ្ងៃទី៥ ខែកញ្ញា។
១គ្រាប់របស់ក្រុមសាន់ម៉ារីណូ គឺរកបានដោយកីឡាករ Nicko Sensoli នៅនាទី៥៣ ហើយសាន់ម៉ារីណូ គ្រប់គ្រងបាល់បានតែ ៤១%ប៉ុណ្តោះ ហើយស៊ុតចំគោលដៅបានតែ២ដងគត់ និងសម្រេចទីបាន១គ្រាប់តែម្តង ខណៈក្រុមលិចតិនស្តាញ គ្រប់គ្រងបាល់ ៥៩% ស៊ុតចំគោលដៅ២ដង ដូចគ្នាតែគ្មានសំណាង។
ខាងក្រោមនេះគឺជាកំណត់ត្រារបស់ក្រុមជម្រើសជាតិសាន់ម៉ារីណូ មានដូចជា៖
- ប្រកួតបាន២០៥លើក
- ឈ្នះបាន២លើក
- ស្មើគ្នា៩លើក
- ចាញ់១៩៥លើក
- ទាត់ចូលទីគេបាន៣៤គ្រាប់
- របូតគ្រាប់បាល់វិញ ៨២៤គ្រាប់
- ក្រុមដែលខ្លួនអាចឈ្នះគឺ លិចតិនស្តាញ (ឈ្នះ ១-០ នៅថ្ងៃទី២៨ មេសា ២០០៤ និងលើកទី២ ឈ្នះ១-០ ថ្ងៃទី៦ ខែកញ្ញា ឆ្នាំ២០២៤)៕
