ឯកឧត្ដម ជា សុមេធី រដ្ឋមន្ត្រីក្រសួងសង្គមកិច្ច អតីតយុទ្ធជន និងយុវនីតិសម្បទា បានគូសបញ្ជាក់ថា ការដាក់ឱ្យអនុវត្តកម្មវិធីឧបត្ថម្ភសាច់ប្រាក់ជូនសិស្សានុសិស្សក្នុងគ្រួសារមានប័ណ្ណសមធម៌ (ប័ណ្ណក្រីក្រ) គឺដើម្បីបន្តផ្ដល់ការលើកទឹកចិត្តឱ្យកុមារចុះឈ្មោះចូលរៀនបានទាន់ពេលវេលានៅដើមឆ្នាំ២០២៥ ខាងមុខនេះ និងបន្តការសិក្សារហូតដល់ចប់មធ្យមសិក្សាចំណេះទូទៅរបស់ពួកគេ។ ការឧបត្ថម្ភនេះមានវិសាលភាពគ្របដណ្ដប់លើសិស្សានុសិស្ស ដែលជាសមាជិកគ្រួសារមានប័ណ្ណសមធម៌ និងកំពុងសិក្សានៅតាមគ្រឹះស្ថានសិក្សាចំណេះទូទៅសាធារណៈ ចាប់ពីថ្នាក់បឋមសិក្សារហូតដល់ថ្នាក់មធ្យមសិក្សាទុតិយភូមិ។
ឯកឧត្ដមរដ្ឋមន្ត្រីលើកឡើងបែបនេះ នៅក្នុងពិធីបើកសិក្ខាសាលាផ្សព្វផ្សាយ ស្ដីពីការដាក់ឱ្យអនុវត្តកម្មវិធីឧបត្ថម្ភសាច់ប្រាក់ជូនសិស្សានុសិស្សក្នុងគ្រួសារមានប័ណ្ណសមធម៌ នៃកម្មវិធីជាតិជំនួយសង្គមក្នុងកញ្ចប់គ្រួសារនៅទីស្ដីការក្រសួង នាព្រឹកថ្ងៃទី៩ ខែកញ្ញា ឆ្នាំ ២០២៤ នេះ។
ជុំវិញការដាក់ឱ្យអនុវត្តកម្មវិធីឧបត្ថម្ភសាច់ប្រាក់នេះ ឯកឧត្ដម តូច ចាន់នី អគ្គនាយកបច្ចេកទេស និងជាអ្នកនាំពាក្យក្រសួងសង្គមកិច្ច អតីតយុទ្ធជន និងយុវនីតិសម្បទា បានបញ្ជាក់បន្ថែមប្រាប់សារព័ត៌មានត្រយងថា កម្មវិធីឧបត្ថម្ភសាច់ប្រាក់ជូនសិស្សានុសិស្សក្នុងគ្រួសារមានប័ណ្ណសមធម៌ ដែលបានប្រកាសផ្សព្វផ្សាយឲ្យអនុវត្តកាលពីថ្ងៃទី ៩ ខែវិច្ឆិកា ឆ្នា២០២៤ និងចាប់ផ្ដើមអនុវត្តនៅទូទាំងប្រទេសនៅចុងឆ្នាំ ២០២៤ ឬដើមឆ្នាំ ២០២៥ ខាងមុខ។
ឯកឧត្ដមបន្តថា ប្អូនៗសិស្សានុសិស្សមកពីគ្រួសារមានប័ណ្ណសមធម៌ ឬហៅថាប័ណ្ណក្រីក្រ ចាប់ពីថ្នាក់បឋមសិក្សា រហូតដល់ថ្នាក់មធ្យមសិក្សាទុតិយភូមិ អាចទៅចុះឈ្មោះជាមួយជនបង្គោល ដែលជាភ្នាក់ងារមូលនិធិជាតិជំនួយសង្គម (មជជ) របស់ក្រសួងសង្គមកិច្ច នៅតាមសាលាដែលខ្លួនកំពុងរៀន ដើម្បីបានអត្ថប្រយោជន៍ គឺប្រាក់ឧបត្ថម្ភពីកម្មវិធីជាតិមួយនេះ។
សម្រាប់ថ្នាក់បឋមសិក្សា (ថ្នាក់ទី១-៦) និងមធ្យមសិក្សាបឋមភូមិ (ថ្នាក់ទី ៧-៩) ទទួលបាន ២០ ០០០ រៀលក្នុងមួយខែ ចំណែកឯ ថ្នាក់មធ្យមសិក្សាទុតិយភូមិ (ថ្នាក់ទី ១០-១២) ទទួលបាន ៣០ ០០០ រៀល ក្នុងមួយខែ។ ហើយការផ្ដល់ជូនប្រាក់ឧបត្ថម្ភនេះ គឺធ្វើឡើងរហូតសិស្សរៀនចប់ថ្នាក់មធ្យមសិក្សាចំណេះដឹងទូទៅតែម្ដង ពោលគឺរៀនចប់ថ្នាក់ទី ១២ ។
អ្នកនាំពាក្យក្រសួងសង្គមកិច្ចក៏មិនភ្លេចក្រើនរំឭកអំពីលក្ខខណ្ឌ ដែលសិស្សានុសិស្សទទួលបានប្រាក់ឧបត្ថម្ភ ត្រូវទៅរៀនឲ្យបានទៀងទាត់ និងគោរពតាមគោលការណ៍អប់រំរបស់សាលា។
បើតាមការពន្យល់របស់ឯកត្តកម្ម តូច ចាន់នី គោលដៅចម្បងនៃកម្មវិធីឧបត្ថម្ភសាច់ប្រាក់ជូនសិស្សានុសិស្សក្នុងគ្រួសារក្រីក្រ ទី១ គឺចង់ជំរុញឲ្យឪពុកម្ដាយ អាណាព្យាបាលនាំកូនទៅចុះឈ្មោះចូលរៀនឲ្យបានទាន់ពេលវេលា និងទាន់អាយុចូលរៀនរបស់ក្មេងៗ, ទី២ គឺចង់ឲ្យសិស្សានុសិស្សមកពីគ្រួសារក្រីក្រមានលទ្ធភាពបន្តការសិក្សារហូតចប់មធ្យមសិក្សាចំណេះដឹងទូទៅ៕
អត្ថបទ៖ ឈិន ធារ៉ាត់
