ក្រុមខ្លាំងជាងគេចំនួន១៨ក្រុមក្នុងទ្វីបអាស៊ី កំពុងបន្តប្រកួតជម្រុះពានរង្វាន់ជើងឯកពិភពលោក ឆ្នាំ២០២៦ ជុំទី៣ប្រចាំទ្វីប 2026 FIFA World Cup qualification – AFC third round ស្របពេលដែលការប្រកួតក្នុងពូលទាំង៣ ធ្វើដំណើរបាន២លើក ក្នុងចំណោម១០ប្រកួតដែលត្រូវប្រកួត ដោយក្នុងនោះឃើញថាក្រុមជម្រើសជាតិ អ៊ូបេគីស្ថាន អ៊ីរ៉ង់ ហ្សកដានី កូរ៉េខាងត្បូង ជប៉ុន និងអារ៉ាប៊ីសាអ៊ូឌីត ឈរកំពូលតារាងរៀងៗខ្លួន។
វគ្គជម្រុះពានរង្វាន់ 2026 FIFA World Cup មានប្រទេសចូលរួមចំនួន២០៧ ដោយបែងចែកជា៦ទ្វីបផ្សេងគ្នា។ សម្រាប់ទ្វីបអាស៊ី មានកូតាចំនួន៨ក្រុម ឡើងទៅប្រកួតជុំចុងក្រោយដែលអាមេរិក ម៉ិចស៊ីកូ និងកាណាដា រួមធ្វើជាសហម្ចាស់ផ្ទះ ខណៈមាន១ក្រុមត្រូវប្រកួតជម្រុះជាមួយក្រុមមកពីទ្វីបផ្សេង យកកៅអីឡើងទៅដែរ។ នៅអាស៊ី មានក្រុមចំនួន៤៦ ត្រូវប្រកួតប្រជែងគ្នា ចាប់ពីថ្ងៃទី១២ ខែតុលា ឆ្នាំ២០២៣ ដល់ថ្ងៃទី១៨ ខែវិច្ឆិកា ឆ្នាំ២០២៥ បែងចែកជា៥វគ្គ។
គិតត្រឹមពេលនេះការប្រកួតជម្រុះនៅទ្វីបអាស៊ី ឈានដល់ជុំទី៣ហើយ សល់ក្រុមចំនួន១៨ក្រុម។ ការប្រកួតនៅជុំទី៣នេះ ១ពូលមាន៦ក្រុម ហើយក្រុមក្នុងពូលត្រូវប្រកួតវិលជុំ២ជើង រហូតដល់ទៅ១០លើក។ ពេលចប់វគ្គជម្រុះក្នុងពូលនេះ ក្រុមចំណាត់ថ្នាក់លេខ១និងលេខ២តាមពូលទាំង៣ នឹងកក់សំបុត្រយន្តហោះទៅ 2026 FIFA World Cup តែម្តង ខណៈក្រុមលេខ៣និងលេខ៤តាមពូលនីមួយៗ មានឈ្មោះឡើងទៅប្រកួតជុំទី៤ ហើយក្រុមលេខ៥និងលេខ៥ ត្រូវហាលអាវ។
ការប្រកួតពានរង្វាន់ជើងឯកពិភពលោក FIFA World Cup ធ្វើឡើងរាល់៤ឆ្នាំម្តង តែកន្លងទៅកំណត់យកក្រុមខ្លាំងមកពីតាមបណ្តាទ្វីបចំនួន៣២ក្រុមប៉ុណ្ណោះ ដើម្បីឡើងដល់វគ្គជុំចុងក្រោយ ប៉ុន្តែលើកនេះមានការកំណត់យកក្រុមដល់ទី៤៨ក្រុម ដើម្បីចូលរួមប្រកួត៕
