កាលពីថ្ងៃទី ៥ ខែកញ្ញា ឆ្នាំ ២០២៤ នេះ រាជរដ្ឋាភិបាលកម្ពុជាបានសម្រេចដាក់ឲ្យអនុវត្តគោលនយោបាយស្ដីពីការផ្ដល់អាហារនៅតាមសាលារៀន សម្រាប់ឆ្នាំ ២០២៤ ដល់ ២០៣៥ ដែលមានវិសាលភាពចាប់ពីថ្នាក់មត្តេយ្យសិក្សា ដល់មធ្យមសិក្សាសាធារណៈ។ ការដាក់ឲ្យអនុវត្តគោលនយោបាយ ផ្ដល់អាហារនៅតាមសាលារៀនលើកនេះ ជាដំណាក់កាលថ្មីមួយដែល បន្ទាប់ពីឆ្លងកាត់បទពិសោធន៍ជោគជ័យនាពេលកន្លងមកជាង ២០ ឆ្នាំ។
យោងតាមខ្លឹមសារនៃគោលនយោបាយខាងលើ បទពិសោធន៍ជោគជ័យនោះគឺ ការផ្ដល់អាហារតាមសាលារៀន បានជួយបង្កើនការចូលរៀន រក្សាវត្តមានសិក្សា ពង្រឹងការផ្ចង់ស្មារតីក្នុងម៉ោងសិក្សា និងលើកកម្ពស់លទ្ធផលសិក្សា របស់សិស្ស ជាពិសេសសិស្សស្រី។ ការផ្ដល់អាហារតាមសាលារៀនដោយប្រើប្រាស់កសិផលក្នុងសហគមន៍ បានរួមចំណែកដល់ការប្រយុទ្ធនឹងការអត់ឃ្លាន និងកង្វះអាហារូបត្ថម្ភរបស់កុមារ និងអាចជួយធានាឱ្យកុមារ ទទួលបានអាហារដែលមានសារជាតិចិញ្ចឹមគ្រប់គ្រាន់ និងទៀងទាត់។
របាយការណ៍វាយតម្លៃស្ដីពីកម្មវិបាក (លទ្ធផលទទួលបានមកវិញ) នៃកម្មវិធីផ្ដល់អាហារតាមសាលារៀន បានចង្អុលបង្ហាញពីការចូលរួមចំណែកក្នុងការផ្លាស់ប្តូរជាវិជ្ជមានលើការ ចុះឈ្មោះចូលរៀនរបស់សិស្សកម្ពុជា ដែលនៅឆ្នាំ ២០០១ អត្រាចុះឈ្មោះចូលរៀនមានត្រឹមតែ ៨១% និងកើនឡើង រហូតដល់ ៩៨% នៅឆ្នាំ២០១៩ ជាពិសេសតំបន់ជនបទ និងដាច់ស្រយាល។ បន្ថែមពីនេះ សាលារៀន ក្នុងស្រុក ដែលទទួលបានការអន្តរាគមន៍លើកម្មវិធីអាហារតាមសាលារៀន បានបង្ហាញលទ្ធផលជាវិជ្ជមានគួរឱ្យកត់សម្គាល់លើគុណភាពអប់រំ ដូចជាការចុះឈ្មោះចូលរៀនរបស់សិស្សមានការកើនឡើងរហូតដល់៩៩,២% អត្រាបញ្ចប់ ការសិក្សាកើនឡើងដល់ ៨៥,៣% និងការកាត់បន្ថយការបោះបង់ការសិក្សាដល់៤.៥% ខណៈសាលារៀន ដែលមិនបានទទួលការអន្តរាគមន៍កម្មវិធីនេះ មានអត្រានៃការចុះឈ្មោះចូលរៀនត្រឹមតែ៩ % ការបន្ទាប់ការសិក្សា ៨១,៩% ហើយអត្រានៃការបោះបង់ការសិក្សាមានរហូតដល់៤,៨%។
សូមជម្រាបថា កម្មវិធីផ្ដល់អាហារតាមសាលារៀនចាប់ផ្ដើមអនុវត្តតាំងពីឆ្នាំ ១៩៩៩ ក្រោមកិច្ចសហការជាមួយកម្មវិធីស្បៀងអាហារពិភពលោករបស់អង្គការសហប្រជាជាតិ ធ្វើឡើងនៅសាលាបឋមសិក្សាចំនួន ៦៤ ដែលមានអ្នកទទួលផល ៣៧ ៥០០ នាក់ និងបន្តពង្រីកជាបន្តបន្ទាប់ដោយប្រើប្រាស់ស្បៀងដែលផ្គត់ផ្គង់ទាំងស្រុងដោយកម្មវិធីស្បៀង អាហារពិភពលោក ក្នុងគោលបំណងផ្ដល់លទ្ធភាពដល់កុមារមកពីគ្រួសារក្រីក្របានចូលរៀន។ នៅឆ្នាំ ២០១៤ ក្រសួងអប់រំ យុវជន និងកីឡា ក្រោមជំនួយពីកម្មវិធីស្បៀងអាហារពិភពលោក បានចាប់ផ្ដើមអនុវត្តសាកល្បង កម្មវិធីផ្ដល់អាហារតាមសាលារៀនដោយប្រើប្រាស់កសិផលក្នុងសហគមន៍ ដែលជាគំរូថ្មីមួយក្នុងការផ្ដល់អាហារ តាមសាលារៀន សំដៅធានាបាននូវអាហារមានសុវត្ថិភាព និងអាហារូបត្ថម្ភ គាំទ្រការអភិវឌ្ឍសេដ្ឋកិច្ចមូលដ្ឋាន និងអាចអនុវត្តបាន។ ក្នុងឆ្នាំសិក្សា ២០១៨-២០១៩ ក្រសួងអប់រំ យុវជន និងកីឡា បានទទួលអនុវត្តសាកល្បងកម្មវិធីនេះនៅខេត្តស្ទឹងត្រែង ដោយប្រើប្រាស់ថវិកាកម្មវិធីស្បៀងអាហារពិភពលោក។ បន្ទាប់មក កម្មវិធីផ្ដល់អាហារតាមសាលារៀនដោយ ប្រើប្រាស់កសិផលក្នុងសហគមន៍ ត្រូវបានដាក់អនុវត្តជាកម្មវិធីជាតិ កាលពីខែមករា ឆ្នាំ ២០២០ សម្រាប់ឆ្នាំសិក្សា ២០១៩-២០២០ ដោយប្រើប្រាស់ថវិកាជាតិ នៅក្នុងស្រុកដែលងាយរងគ្រោះចំនួន១៧ នៃខេត្តចំនួន ៦ រួមមាន សៀមរាប, ព្រះវិហារ, បាត់ដំបង, ស្ទឹងត្រែង, បន្ទាយមានជ័យ, និងកំពង់ចាម ដោយគ្របដណ្ដប់សាលារៀន គោលដៅចំនួន ២០៥ សាលា និងផ្ដល់អត្ថប្រយោជន៍ដល់សិស្សចំនួន ៥២ ១៣០ នាក់។
គិតត្រឹមឆ្នាំសិក្សា ២០២២-២០២៣, កម្មវិធីផ្ដល់អាហារតាមសាលារៀនដោយប្រើប្រាស់កសិផលក្នុងសហគមន៍ បានអនុវត្ត នៅតាមសាលារៀនចំនួន៤២៧ ក្នុងក្រុង/ស្រុកចំនួន២៣ នៃខេត្តគោលដៅចំនួន១០ ដែលសិស្សទទួលអត្ថប្រយោជន៍ពីកម្មវិធីចំនួនរហូតដល់ ១១៣ ៣១៩នាក់ និងបន្តពង្រីកវិសាលភាពតាមសាលាបឋមសិក្សាជាបន្តបន្ទាប់។
សម្រាប់កម្មវិធីផ្ដល់អាហារនៅតាមសាលារៀន សម្រាប់ឆ្នាំ ២០២៤ ដល់ ២០៣៥ អ្នកនាំពាក្យក្រសួងអប់ យុវជន និងកីឡា នៅមិនទាន់អាចបញ្ជាក់ពីផែនការអនុវត្តបន្ត នៅឡើយ៕
បទយកការណ៍៖ «ហូបឆ្អែត មានកម្លាំងរៀន និងកាត់បន្ថយចំណាយ» ជាប្រធានបទ នៃកម្មវិធីផ្ដល់អាហារតាមសាលារៀន
អត្ថបទ៖ ឈិន ធារ៉ាត់
