ចាប់ពីខែមករា ឆ្នាំ ២០២៥ ប្រាក់ឈ្នួលអប្បបរមាសម្រាប់កម្មករនិយោជិត ក្នុងវិស័យវាយនភណ្ឌ កាត់ដេរ ផលិតស្បែកជើង និងផលិតផលធ្វើដំណើរនិងកាបូប បានដំឡើងពី ២០៤ ទៅ ២០៦ ដុល្លារ ខណៈរាជរដ្ឋាភិបាលសម្រេចបន្ថែម ២ដុល្លារទៀត ដូច្នេះប្រាក់ឈ្នួលអប្បបរមាប្រចាំខែរបស់កម្មករនិយោជិត ក្នុងវិស័យកាត់ដេរសរុប មានចំនួន ២០៨ ដុល្លារ ដោយមិនទាន់រាប់បញ្ចូលប្រាក់ឧបត្ថម្ភផ្សេងៗ ទៀតនៅឡើយ។
ការសម្រេចដំឡើងប្រាក់ឈ្នួលអប្បបរមានេះ ធ្វើឡើងតាមរយៈការបោះឆ្នោតជាសម្ងាត់ នាកិច្ចប្រជុំក្រុមប្រឹក្សាជាតិប្រាក់ឈ្នួលអប្បបរមា ថ្ងៃទី ១៩ ខែកញ្ញា ឆ្នាំ ២០២៤ ដើម្បីគាំទ្រតួលេខនីមួយៗ ដោយទទួលបានលទ្ធផល ៤៦ លើ៥១សំឡេង គាំលើតួលេខ ២០៦ ដុល្លារ, ១សំឡេងគាំទ្រតួលេខ ២០៨ ដុល្លារ និង៤សំឡេងគាំទ្រលើតួលេខ ២១៤ ដុល្លារ។
សូមរំលេចផងដែរថា ក្រុមប្រឹក្សាជាតិប្រាក់ឈ្នួលអប្បបរមាជាយន្តការត្រីភាគី ដែលមានសមាជិកជាតំណាងកម្មករនិយោជិតចំនួន ១៧ រូប, តំណាងភាគីនិយោជក (ថៅកែ) ចំនួន ១៧ រូប និងតំណាងភាគីរាជរដ្ឋាភិបាលចំនួន ១៧ រូប ហើយបានបើកកិច្ចប្រជុំចំនួន ១៥ លើក ក្នុងនោះ ៥ លើកជាកិច្ចប្រជុំត្រីភាគី ដែលដំណើរការចាប់តាំងពី ថ្ងៃទី ១៤ ខែសីហា ដល់ថ្ងៃទី ១៩ ខែកញ្ញា ឆ្នាំ ២០២៤ ។
ទន្ទឹមនឹងប្រាក់ឈ្នួលគោលដែលដំឡើងកម្រិតអប្បបរមាពី ២០៤ ទៅ ២០៨ ដុល្លារ ប្រាក់អត្ថប្រយោជន៍ផ្សេងទៀត ដែលកម្មករនិយោជិតធ្លាប់ទទួលបានកន្លងមក ត្រូវបានរក្សាទុកនៅដដែល ដូចជា ប្រាក់សោហ៊ុយធ្វើដំណើរ និងស្នាក់នៅចំនួន ៧ដុល្លារអាម៉េរិក ក្នុងមួយខែ, ប្រាក់រង្វាន់ធ្វើការទៀងទាត់ចំនួន ១០ដុល្លារអាម៉េរិក ក្នុងមួយខែ, ប្រាក់ថ្លៃបាយសម្រាប់ការធ្វើការងារបន្ថែមម៉ោងដោយស្ម័គ្រចិត្តចំនួន ២ ០០០រៀល ក្នុងមួយថ្ងៃ ឬការទទួលបានបាយមួយពេលដោយឥតគិតថ្លៃ និងប្រាក់រង្វាន់អតីតភាពការងារចំនួនពី ២ដុល្លារអាមេរិក ដល់ ១១ដុល្លារអាម៉េរិកក្នុងមួយខែ សម្រាប់កម្មករ និយោជិត ដែលបានធ្វើការចាប់ពីឆ្នាំទី២ ដល់ឆ្នាំទី១១។
ដូច្នេះ ជាមធ្យមកម្មករនិយោជិតម្នាក់ៗនឹងទទួលបានប្រាក់ឈ្នួលយ៉ាងតិចចំនួនពី ២២៥ ដុល្លារអាម៉េរិក ដល់ ២៣៦ ដុល្លារអាម៉េរិក ក្នុងមួយខែ៕
អត្ថបទ៖ ឈិន ធារ៉ាត់
