ទោះបីកម្ពុជាសម្រេចបញ្ចប់ការចូលរួមតំបន់ត្រីកោណអភិវឌ្ឍន៍កម្ពុជា ឡាវ វៀតណាម (CLV-DTA) ក្ដី ក៏ផែនការរបស់រាជរដ្ឋាភិបាលដែលបានដាក់ចេញរួមមាន ដំណើរទស្សនកិច្ចនៅតាមបណ្ដោយព្រំដែន ការកសាងហេដ្ឋារចនាសម្ព័ន្ធផ្ដោតលើផ្លូវក្រវាត់ព្រំដែន និងផែនការអភិវឌ្ឍនៅខេត្តនៅភូមិភាគឦសានរបស់កម្ពុជានៅតែបន្តអនុវត្តិដដែល។ នេះជាការបញ្ជាក់តាមសារជាសំឡេង របស់សម្ដេចធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា នៅថ្ងៃទី ២៣ ខែកញ្ញា ឆ្នាំ ២០២៤ នេះ។
សម្ដេចធិបតីគូសបញ្ជាក់ថា ទោះបីជាមាន ឬមិនមានកិច្ចសហប្រតិបត្តិការតំបន់ត្រីកោណអភិវឌ្ឍន៍ ក៏រាជរដ្ឋាភិបាលកម្ពុជានៅតែបន្តអភិវឌ្ឍខេត្តនៅតំបន់ភូមិភាគឦសាននៃប្រទេសរបស់ខ្លួន ក៏ដូចជា ធានានូវការការពារទឹកដី និងអធិបតេយ្យ របស់ប្រទេសកម្ពុជា ព្រោះនេះជាការចង់បានរបស់ប្រជាពលរដ្ឋខ្មែរច្រើនលើសលប់ ជាពិសេសប្រជាពលរដ្ឋ ដែលរស់នៅភូមិភាគឦសានផ្ទាល់តែម្ដង។ ដូច្នេះផែនការអភិវឌ្ឍនៅភូមិភាគឦសាននៅតែបន្តដដែល មិនមានការប្រែប្រួលទេ រួមទាំងកិច្ចការបោះបង្គោលព្រំដែនជាមួយប្រទេសជិតខាង ការកសាងហេដ្ឋារចនាសម្ព័ន្ធតភ្ជាប់ និងការដាក់ចេញនូវកញ្ចប់លើកទឹកចិត្ត និងជំរុញការវិនិយោគនៅក្នុងខេត្តភូមិភាគឦសានឆ្នាំ ២០២៥ ដែលប្រមុខរាជរដ្ឋាភិបាលបានប្រកាសកន្លងទៅ នៅរក្សាដដែល។
សម្ដេចនាយករដ្ឋមន្ត្រី ក៏ឆ្លៀតរំលេចពីមូលនិធិកសាងហេដ្ឋារចនាសម្ព័ន្ធព្រំដែនផ្ដោតលើការកសាងផ្លូវក្រវាត់ព្រំដែន ដោយគិតមកទល់ថ្ងៃទី ២៣ កញ្ញានេះ មានអ្នកបរិច្ចាគជាង ៧០០ ០០០ នាក់ និងចំនួនថវិកាមានប្រមាណជាង ២១ លានដុល្លារសហរដ្ឋអាមេរិក។ វិភាគទានស្ម័គ្រចិត្តទាំងនេះ នឹងត្រូវយកទៅប្រើប្រាស់ក្នុងការកសាងហេដ្ឋារចនាសម្ព័ន្ធព្រំដែនដោយផ្ដោតលើការកសាងផ្លូវក្រវាត់ព្រំដែន។
ជុំវិញនឹងមូលនិធិកសាងហេដ្ឋារចនាសម្ព័ន្ធព្រំដែន សម្ដេចធិបតីបញ្ជាក់បន្ថែមថា ដោយសង្កេតឃើញថា ចលនានៃការបរិច្ចាគនៅតែបន្តជាហូរហែរ ក្រុមការងារមូលនិធិ នៅតែបន្តទទួលយករហូតដល់ថ្ងៃទី ៣១ ខែតុលា ឆ្នាំ ២០២៤ នៅពេលបិទបញ្ចប់ក្រុមការងារមូលនិធិ នឹងជម្រាបជូននូវដំណឹងទិន្នន័យចុងក្រោយ រួមជាមួយនឹងផែនការក្នុងការប្រើប្រាស់ថវិកាទាំងអស់នេះ ប្រកបដោយតម្លាភាព និងគណនេយ្យភាព។ ដោយឡែកដំណើរទស្សនកិច្ចទៅកាន់តំបន់ព្រំដែនក្នុងថ្ងៃចុងសប្ដាហ៍នៅតែបន្តរហូតដល់ចុងឆ្នាំ ២០២៤ ដើម្បីឲ្យបងប្អូនប្រជាពលរដ្ឋមានឱកាសទស្សនាការអភិវឌ្ឍជាក់ស្ដែងនៅតាមបណ្ដោយព្រំដែនរបស់ប្រទេសកម្ពុជា។
សូមរំលឹកថា តាមរយៈសាររបស់សម្ដេចធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា កាលពីយប់ថ្ងៃទី ២០ ខែកញ្ញា ឆ្នាំ ២០២៤នេះ បញ្ជាក់ថា កម្ពុជាសម្រេចបញ្ចប់ការចូលរួមតំបន់ត្រីកោណអភិវឌ្ឍន៍កម្ពុជា ឡាវ វៀតណាម (CLV-DTA) ចាប់ពីថ្ងៃទី២០ ខែកញ្ញា ឆ្នាំ២០២៤នេះ តទៅ ហើយរាជរដ្ឋាភិបាលកម្ពុជាតាមរយៈក្រសួងការបរទេស និងសហប្រតិបត្តិការអន្តរជាតិ ក៏បានជូនដំណឹងជាផ្លូវការទៅប្រទេសវៀតណាម និង ប្រទេសឡាវ រួចហើយដែរ។
ការដកខ្លួននេះ ធ្វើឡើងដោយគិតគូរពីកង្វល់របស់ប្រជាជនលើបញ្ហាទឹកដី និងភាពចាំបាច់ខាងនយោបាយ ដើម្បី “ដកអាវុធចេញពីដៃពួកជ្រុលនិយម” កុំឲ្យមានលទ្ធភាពប្រើប្រាស់ CLV-DTA បោកប្រាស់ប្រជាជនកម្ពុជាតទៅទៀត បន្ទាប់ពីពួកនេះបរាជ័យទាំងស្រុងក្នុងផែនការថ្ងៃទី ១៨ សីហា៕
អត្ថបទ៖ ឈិន ធារ៉ាត់
