សិល្បៈជាតិ៖ តារាចម្រៀងឆ្នើម ពេជ្រ សោភា ត្រូវបានហ្វេនដែលជាអ្នកគាំទ្រសំឡេងរបស់អ្នកនាង សំណូមពរឱ្យអ្នកនាង រៀបចំកម្មវិធីជំនួបជាមួយនឹងហ្វេនៗ ព្រមជាមួយនឹងច្រៀងចម្រៀងល្បីៗមួយចំនួនជាមុនសិន ក្រោយពីមានធ្លាយដំណឹងថាតារាស្រីរូបនេះ ចង់ដើរចេញពីវិស័យសិល្បៈ។
នៅក្នុងការបង្ហោះមួយរបស់អ្នកគាំទ្រអ្នកនាង កាលពីពេលថ្មីៗនេះ គឺបានចេញមកសំណូមពរត្រង់ៗទៅកាន់តារាស្រីជើងចាស់រូបនេះ ដោយគេឃើញខ្លឹមសារនៅក្នុងការបង្ហោះនោះក៏មានរំលេចពីបទចម្រៀងល្បីមុនៗដែលពួកគេចង់ឃើញអ្នកនាង លើកយកមកបកស្រាយ នៅក្នុងកម្មវិធី SP Fan Meeting ឬជំនួបជាមួយនឹងអ្នកគាំទ្ររបស់អ្នកនាង ពេជ្រ សោភា ផងដែរ។
នៅក្នុងចំណោមបទចម្រៀងល្បីៗជាច្រើនរបស់ អ្នកនាង ពេជ្រ សោភា នោះ មានបទចម្រៀងចំនួន១៤ ដែលត្រូវបានអ្នកគាំទ្រលើកយកចំណងជើងមកបង្ហាញ ក្នុងនោះមានដូចជា «Better Day បទចម្រៀងសាងកេរ្តិ៍ឈ្មោះល្បីឱ្យអ្នកនាង និងធ្វើឱ្យមានអ្នកស្គាល់អ្នកនាងច្រើន និងបទមួយចំនួនទៀតគឺ ស្ដាប់បេះដូងអូនផង,សត្វរំពេរ, ស្ងប់ចិត្ត, ទីស្ងាត់ចិត្តមិនស្ងប់, អូនទៅហើយ, Doom Doom, Let’s boom, Queen, Diva, Tell Them, ឆ្កែរត់បុកប៉ោត, បីឆ្កែចូលរាំ, និង ហុយ ហុយ។
យ៉ាងណាមិញ អ្នកនាង ពេជ្រ សោភា បានចូលមកឆ្លើយតប នៅក្រោមផុសនោះ ថាការបង្កើតឱ្យមានកម្មវិធីខាងលើនេះអាចទៅរួចត្រឹម ៥០% ខណៈដែលអ្នកនាង កាកា អូស្ត្រាលី បានចូលមកសួរថា តើអ្នកនាង ពេជ្រ សោភា ពិតជាបំណងចាកចោលសិល្បៈមែនឬ? និងឃាត់សូមកុំឱ្យអ្នកនាង ចាកចេញ ដោយអ្នកនាង ឆ្លើយតបវិញត្រឹម Sticker Comment ថា I Love you ប៉ុណ្ណោះ។
ត្បិតគេមិនទាន់អាចទាញសេចក្ដីសន្មតថា អ្នកចម្រៀងជើងចាស់ នៅក្នុងផលិតកម្ម ហង្សមាស និងរស្មីហង្សមាសរូបនេះ ពិតជាសម្រេចចិត្តឈប់ពីសិល្បៈមែន ក៏គ្រាន់តែរកពេលសំរាកលម្ហែខួរក្បាលឬយ៉ាងណា? ប៉ុន្តែសម្រាប់អ្នកដែលស្រលាញ់ពេញចិត្តអ្នកនាង នៅតែមានក្ដីសង្ឃឹមថាអ្នកនាង អាចនឹងពិចារណារៀបចំកម្មវិធីជួបជុំជាមួយហ្វេន ព្រមទាំងលើកយកបទចម្រៀងល្បីៗពីជំនាន់មុនបកស្រាយឡើងវិញ៕
