កំពង់ធំ៖ .លោកជំទាវ លំ គន្ធារី ប្រធានស្តីទីគណៈកម្មាធិការសាខាកាកបាទក្រហមកម្ពុជា ខេត្តកំពង់ធំ បានលើកឡើងដូច្នេះនៅក្នុងឱកាសដែលលោកជំទាវបានអញ្ជើញចូលរួមក្នុងពិធីបើកយុទ្ធនាការស្តីពី(ការលើកកម្ពស់សុត្ថិភាពចរាចរណ៍ផ្លូវគោក) និងចែកមួកសុវត្ថិភាពដល់បងប្អូនដែលធ្វើដំណើរលើដងផ្លូវក្នុងឱកាសពិធីបុណ្យកាន់បិណ្ឌ និងភ្ជុំបិណ្ឌ។
យុទ្ធនាការនេះក៏មានការចូលរួមពីលោក កែវផល នាយកសាខាកាកបាទក្រហមកម្ពុជាខេត្ត មន្ត្រីក្រុមប្រតិបត្តិសាខា អនុប្រធានគណ:កម្មាធិការសាខាស្រុកសន្ទុក មន្រ្តីអនុសាខា មន្រ្តីនៃមន្ទីរសាធារណៈការនិងដឹកជញ្ជូនខេត្ត នគរបាលចរាចរណ៍ យុវជនកាកបាទក្រហម អ្នកស្ម័គ្រចិត្តកាកបាទក្រហម យុវជនកាយរិទ្ធជាតិកម្ពុជា យុវជនសហភាពសហព័ន្ធយុវជនកម្ពុជាខេត្ត សរុបចំនួន១២០នាក់ នៅរសៀលថ្ងៃទី២៣ ខែកញ្ញាឆ្នាំ២០២៤ យុទ្ធនាការនេះរៀបចំឡើងនៅមុខសាលាឃុំកកោះ ឃុំកកោះ ស្រុកសន្ទុក ខេត្តកំពង់ធំ។
លោកជំទាវប្រធានស្តីទី បានពាំនាំនូវប្រសាសន៍ផ្តាំផ្ញើសួរសុខទុក្ខ និងក្តីនឹករលឹកពីសម្តេចកិត្តិព្រឹទ្ធបណ្ឌិត ប៊ុន រ៉ានីហ៊ុនសែនប្រធានកាកបាទក្រហមកម្ពុជា។ ប្រទេសកម្ពុជាយើងសព្វថ្ងៃរងគ្រោះថ្នាក់បើកបរដោយមិនគោរពច្បាប់ចរាចរណ៍ផ្លូវគោក បណ្ដាលឱ្យបាត់បង់អាយុជីវិតជារៀងរាល់ថ្ងៃ ដើម្បីចូលរួមកាត់បន្ថយអត្រាមស្លាប់ដោយគ្រោះថ្នាក់ចរាចរណ៍ សូមបងប្អូនប្រជាពលរដ្ឋទាំងអស់ពាក់មួកសុវត្ថិភាពបានគ្រប់គ្នាឱ្យបានត្រឹមត្រូវ និងបើកបរឡានត្រូវពាក់ខ្សែក្រវ៉ាត់គ្រប់ពេល។
លោកជំទាវបានបន្តថា(កាកបាទក្រហមកម្ពុជា) តែងតែធ្វើយុទ្ធនាការលើកកម្ពស់សុវត្ថិភាពចរាចរណ៍នេះ ជារៀងរាល់ឆ្នាំ ព្រោះកាកបាទក្រហមកម្ពុជា ជាសមាជិកថ្នាក់ជាតិរបស់គណៈកម្មាធិការជាតិសុវត្ថិភាពចរាចរណ៍ផ្លូវគោក និងដើម្បីឆ្លើយតបទៅនឹងផែនការជាតិទស្សវត្សរ៍សុវត្ថិភាពចរាចរណ៍ផ្លូវគោកឆ្នាំ២០២១-២០៣០ និងការអំពាវនាវរបស់រាជរដ្ឋាភិបាលកម្ពុជា សូមឱ្យស្ថាប័នពាក់ព័ន្ធរួមគ្នាចូលរួមកាត់បន្ថយអត្រាស្លាប់ របួសធ្ងន់ និងពិការដោយសារគ្រោះថ្នាក់ចរាចរណ៍ក្នុងព្រះរាជាណាចក្រកម្ពុជា តាមតែអាចធ្វើទៅបាន គ្រោះថ្នាក់ចរាចរជាបញ្ហាប្រឈមចម្បង១ បានសម្លាប់ប្រជាពលរដ្ឋជាច្រើនពាន់នាក់ក្នុង១ឆ្នាំៗ។
កម្មវិធីនេះមានជាសំណួរ-ចម្លើយ ដើម្បីដាស់ស្មារតីដល់បងប្អូនឱ្យចូលរួមគោរពច្បាប់ចរាចរណ៍ទាំងអស់គ្នាដើម្បីសុវត្ថិភាពរបស់ខ្លួន និងមានរង្វាន់មួកសុវត្ថិភាពទៀតផង។ ក្នុងយុទ្ធនាការខាងលើនេះ បានជូនមួកសុវត្ថិភាពដល់អ្នកឆ្លើយសំណួរបានត្រឹមត្រូវចំនួន៦០មួក ចែកប័ណ្ណជំនួយស្នារតី ១២៥សន្លឹក សៀវភៅអ្វីដែលអ្នកបើកបរទោចក្រយាន្តត្រូវដឹង ចំនួន១២៥។ ស្ទិកគ័រចំណាំងផ្លាត ចំនួន៥៣សន្លឹកខិតប័ណ្ណ ណែនាំពីវិធីពាក់មួកសុវត្ថិភាពឱ្យបានត្រឹមត្រូវ ចំនួន១២៥សន្លឹក៕
អត្ថបទ៖ កំពង់ធំ
