នៅថ្ងៃទី ២១ ខែកញ្ញា ឆ្នាំ ២០២៤ ក្រុមការងារសហភាពសហព័ន្ធយុវជនកម្ពុជា ក្នុងវិស័យមហាផ្ទៃ បានប្រកាសទទួលស្គាល់សមាសភាពបំពេញបន្ថែមចំនួន ៩៧២ នាក់ ក្រោមអធិបតីភាពឯកឧត្ដមអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងប្រធានកិត្តិយសក្រុមការងារសហភាពសហព័ន្ធយុវជនកម្ពុជា ក្នុងវិស័យមហាផ្ទៃ។
នៅក្នុងឱកាសនោះដែរ ឯកឧត្ដម ខៀវ ភារិទ្ធ រដ្ឋលេខាធិការក្រសួងមហាផ្ទៃ និងជាប្រធានក្រុមការងារ ស.ស.យ.ក ក្នុងវិស័យមហាផ្ទៃបានលើកឡើងពីសមិទ្ធផលសំខាន់ៗមួយចំនួនដែលក្នុងការងារ ស.ស.យ.ក មហាផ្ទៃសម្រេចបាន ក្នុងនោះរួមមាន សកម្មភាពមនុស្សធម៌ និងការងារសង្គមសរុបចំនួន ០៥លើក រាប់បញ្ចូលទាំងសកម្មភាពបរិច្ចាគឈាម, ការរៀបចំព្រឹត្តិការណ៍សង្ក្រាន្តព្រៃវែង, ការជួយសម្របសម្រួលដល់សហព័ន្ធវាយកូនបាល់កម្ពុជាក្នុងឱកាសកម្ពុជាធ្វើជាម្ចាស់ផ្ទះរៀបចំការប្រកួតវាយកូនបាល់ពិភពលោក ឆ្នាំ២០២៤ , និងសកម្មភាពដាំកូនឈើជាដើម។
ក្រៅពីនេះ ក្រុមការងារបានចូលរួមជំរុញការផ្សព្វផ្សាយ និងធ្វើញត្តិគាំទ្រវិធានការ សេចក្ដីថ្លែងការ និងសារសំខាន់ៗរបស់ថ្នាក់ដឹកនាំកំពូលនៃប្រទេស ដើម្បីឲ្យជ្រួតជ្រាបទៅដល់ប្រជាពលរដ្ឋគ្រប់មជ្ឈដ្ឋាន។ ជាមួយគ្នានេះដែរ ស.ស.យ.ក. វិស័យមហាផ្ទៃ ក៏បានចូលរួមមូលនិធិកសាងហេដ្ឋារចនាសម្ព័ន្ធតាមបណ្ដោយព្រំដែន តាមរយៈ QR Code ស.ស.យ.ក. សរុបចំនួន ៥៦ រូប គិតជាថវិកា ចំនួន ៤ ៦៣០ ០០០ ៛ ។
សម្រាប់ទិសដៅចំពោះមុខ ឯកឧត្ដម ខៀវ ភារិទ្ធ បានលើកឡើងនូវ ៣ចំណុចធំៗ រួមមាន៖ ទី១- បន្តពង្រឹង និងពង្រីក សមាជិក សមាជិកា ស.ស.យ.ក.ក្នុងវិស័យមហាផ្ទៃបន្ថែម, ទី២- ការរៀបចំបង្កើតក្រុមការងារស្នូល នៅតាមអគ្គនាយកជំនាញ ដើម្បីចូលរួមអនុវត្តសកម្មភាពស្នូលឲ្យស្របទៅនឹងបេសកកម្មរបស់ក្រសួងមហាផ្ទៃ, និង ទី៣- ថ្មីៗនេះ ដោយទទួលបានគោលការណ៍អនុញ្ញាតពីសំណាក់ ឯកឧត្ដមអភិសន្តិបណ្ឌិត ក្រុមការងារបាន និងកំពុងធ្វើការជាមួយមជ្ឈមណ្ឌលជាតិផ្ដល់ឈាមក្នុងការរៀបចំកម្មវិធីបរិច្ចាគឈាម នៅថ្ងៃទី២៧ ខែកញ្ញា ឆ្នាំ២០២៤ ខាងមុខនេះ។
ដើម្បីជាការណែនាំ និងជំនួយស្មារតីដល់ក្រុមការងារយុវជនដ៏មានសក្ដានុពលនេះ ឯកឧត្ដមអភិសន្តិបណ្ឌិត ស សុខា ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងប្រធានកិត្តិយសក្រុមការងារសហភាពសហព័ន្ធយុវជនកម្ពុជា ក្នុងវិស័យមហាផ្ទៃ បានផ្ដល់នូវអនុសាសន៍ណែនាំបន្ថែម ដល់ក្រុមការងារ ឲ្យបន្តយកចិត្តទុកដាក់គោរពឲ្យបាននូវលក្ខន្តិកៈ បទបញ្ជាផ្ទៃក្នុង ប្រកាន់ខ្ជាប់នូវចក្ខុវិស័យរបស់សហភាពសហព័ន្ធយុវជនកម្ពុជា និងបេសកកម្មរបស់ខ្លួន។ បន្តលើកកម្ពស់ស្មារតីល្អ សហការជាមួយអាជ្ញាធរ ក៏ដូចជាស្ថាប័នពាក់ព័ន្ធទាំងអស់របស់រាជរដ្ឋាភិបាលកម្ពុជា ដើម្បីធានាបាននូវប្រសិទ្ធភាពការងារខ្ពស់ និងការចូលរួមចំណែកលើកស្ទួយដល់ការងារសង្គម ជាពិសេសសម្រាប់ជួយដល់ប្រជាពលរដ្ឋដែលមានភាពលំបាក។ ពង្រឹងចំណេះដឹងបន្ថែមទៀត តាមរយៈការសិក្សារៀនសូត្រជាប្រចាំ ជាពិសេសលើផ្នែកបច្ចេកវិទ្យាឌីជីថល។ ត្រូវគោរពច្បាប់ប្រទេស ធ្វើជាគំរូល្អនៅក្នុងសង្គម និងជៀសឲ្យឆ្ងាយពីគ្រឿងញៀន និងអំពើអសកម្មផ្សេងៗ។ ជាមួយគ្នានេះ ត្រូវចូលរួមទប់ស្កាត់ឲ្យបាននូវអំពើអសកម្ម និងសកម្មភាពជ្រុលនិយម ដែលអាចបង្កអសន្តិសុខ អស្ថិរភាពសង្គម។ ត្រូវបន្តចូលរួមសកម្មភាពសង្គម និងមនុស្សធម៌ ។
ក្នុងឱកាសនេះដែរ ឯកឧត្ដមប្រធានកិត្តិយសបានថ្លែងកោតសរសើរនូវសកម្មភាពរបស់ក្រុមការងារកន្លងមក ដែលសម្រេចបាននូវលទ្ធផលគួរឲ្យកត់សម្គាល់ បើទោះបីក្រុមការងារ សហភាពសហព័ន្ធយុវជនកម្ពុជា ក្នុងវិស័យមហាផ្ទៃ នៅមានលក្ខណៈថ្មីថ្មោងក៏ដោយ៕
អត្ថបទ៖ ឈិន ធារ៉ាត់
