នៅព្រឹកថ្ងៃសុក្រ ទី២៧ កញ្ញានេះ សហព័ន្ធកីឡាបាល់ទាត់កម្ពុជា បានប្រកាសថាក្រុមជម្រើសជាតិកម្ពុជា នឹងត្រូវប្រកួតជាមួយឆៃនីសតៃបុិ ក្នុងជំនួបមិត្តភាពអន្តរជាតិ ដែលនឹងប្រព្រឹត្តទៅនាថ្ងៃសុក្រ ទី១១ ខែតុលា ឆ្នាំ២០២៤ ខាងមុខនេះ វេលាម៉ោង ១៩:០០នាទីយប់ នៅពហុកីឡដ្ឋានជាតិ(អូឡាំពិក)។
ដូនេះ ក្រោមការដឹកនាំរបស់លោក Koji Gyotoku ជនជាតិជនជាតិជប៉ុន គ្រូបង្វឹកបណ្ដុះអាសន្ន ដែលបានប្រកាសតែងតាំងកាលពីថ្ងៃទី១៣ ខែកញ្ញា ក្រោយសម្រេចបញ្ចប់កុងត្រាជាមួយគ្រូបង្គោលក្រុមបាល់ទាត់ជម្រើសជាតិកម្ពុជា គឺលោក Felix Dalmas សញ្ជាតិអាហ្សង់ទីន គឺជាភារកិច្ចលើកដំបូងក្នុងការដឹកនាំក្រុមជម្រើសជាតិកម្ពុជាឈុតធំ។
រំលឹកដែរថា ក្រុមជម្រើសជាតិកម្ពុជា អាយុក្រោម២០ឆ្នាំ ក្រោមការដឹកនាំរបស់លោក Koji Gyotoku កំពុងតែមានភារកិច្ច ក្នុងពានរង្វាន់ជើងឯកទ្វីបអាសុី AFC U20 Asian Cup China PR 2025™ វគ្គជម្រុះនៅចិនតៃបុិ។
ក្នុងបេសកកម្ម ៣ប្រកួតកន្លងមក នៃពានរង្វាន់ជើងឯកទ្វីបអាសុី AFC U20 Asian Cup China PR 2025™ វគ្គជម្រុះនៅចិនតៃបុិក្រុមជម្រើសជាតិកម្ពុជា អាយុក្រោម២០ឆ្នាំ រកបានជ័យជម្នះ ២ប្រកួត ឈ្នះនេប៉ាល់ និងបារ៉ែន និងចាញ់ ១ប្រកួត បានធ្វើឱ្យក្រុមជម្រើសជាតិកម្ពុជា អាយុក្រោម២០ឆ្នាំ កំពុងឈរនៅលេខ១ ក្នុងនាមជាក្រុមលេខ ២ល្អបណ្ណោះអាសន្ន។
តែយ៉ាងណា កម្ពុជានៅសល់ ១ប្រកួតទៀត ក្នុងជំនួបបិទពូល B របស់ក្រុមជម្រើសជាតិកម្ពុជា អាយុក្រោម២០ឆ្នាំ នឹងត្រូវជួប ក្រុមជម្រើសជាតិចិនតៃប៉ិ នៅកីឡដ្ឋាន Fu Jen Catholic University នៅថ្ងៃអាទិត្យ ទី២៩ កញ្ញា វេលាម៉ោង ៦:០០ល្ងាច។
តាមការគ្រោងទុក របស់សហព័ន្ធកីឡាបាល់ទាត់កម្ពុជា ចូលដល់ខែតុលា ក្រុមជម្រើសជាតិកម្ពុជា នឹងមានជំនួនមិត្តភាពអន្តរជាតិចំនួន ២ប្រកួតដោយណាត់ក្រុមជម្រើសជាតិចិនតៃប៉ិ ប្រកួតនៅទឹកដីកម្ពុជា និងមួយប្រកួតទៀត ជួបហុងកុង នៅទឹកដូហុងកុង។
គួរបញ្ជាក់ផងដែរថា សម្រាប់ការប្រកួតមិត្តភាពនេះដែរ គឺដើម្បីជាការត្រៀមខ្លួនរបស់ក្រុមជម្រើសជាតិកម្ពុជា ក្នុងបេសកកកម្មចុងក្រោយនៅក្នុងឆ្នាំ២០២៤នេះ ពោលគឺនៅខែវិច្ឆិកា និងធ្នូ ក្រុមជម្រើសជាតិកម្ពុជា នឹងត្រូវចូលរួមប្រកួតក្នុងពានរង្វាន់ជើងឯកប្រចាំតំបន់អាស៊ាន Asean Mitsubishi Electric Cup ឆ្នាំ២០២៤ ចំនួន ៤ប្រកួតទៀតគឺ ជួប ម៉ាឡេស៊ី សិង្ហបុរី (ក្រុមឈ្នះរវាងទីម័រ ឬប្រ៊ុយណេ) និងថៃ៕
