នាយកប្រតិបត្តិ អង្គការមូលនិធិបង្ការរបួសអាស៊ី ហៅកាត់ថា AIP លោកគឹម បញ្ញា លើកឡើងនូវវិធានការគន្លឹះមួយចំនួន ដើម្បីបង្ការគ្រោះថ្នាក់ចរាចរណ៍ក្នុងអំឡុងពេលបុណ្យភ្ជុំបិណ្ឌ ក៏ជាបុណ្យជាតិធំៗ។ វិធានការទាំងនោះរួមមាន ត្រូវប្រកាន់ខ្ជាប់វិធានសុវត្ថិភាពក្នុងពេលបើកបរ និងមានឥរិយាបថល្អ។ ចំណុចនេះលោកគឹម បញ្ញាចង់ប្រៀបធៀបទៅនឹងការចូលរួមក្នុងយុទ្ធនាការប្រយុទ្ធនឹងកូវីដ-១៩ ដែលប្រជាពលរដ្ឋ និងអាជ្ញាធរបានរួមគ្នាយ៉ាងផុលផុស រហូតទទួលបានជោគជ័យ ពោលគឺទប់ស្កាត់ជំងឺកូវីដ-១៩ មិនឲ្យមានការឆ្លងរាលដាលបាន។ ដូច្នេះ លោកចង់ដាស់តឿនឲ្យប្រជាពលរដ្ឋខ្មែរ និងអាជ្ញាធរចូលរួមក្នុងយុទ្ធនាការទប់ស្កាត់គ្រោះថ្នាក់ចរាចរណ៍ឲ្យនៅទាបបំផុត ដូចជាយុទ្ធនាការទប់ស្កាត់មិនឲ្យមានការឆ្លងរាលដាលនូវជំងឺកូវីដ-១៩ដែរ។
វិធានការគន្លឹះមួយទៀត គឺត្រូវបន្តដាស់តឿនក្រើនរំឭកសាច់ញាតិ និងអ្នកនៅជុំវិញខ្លួនឲ្យយកចិត្តទុកដាក់លើសុវត្ថិភាពចរាចរណ៍ តាមរយៈប្រាប់ឲ្យពាក់មួកសុវត្ថិភាព, បើកបរក្នុងស្មារតីប្រុងប្រយ័ត្ន, ស្រវឹងសូមកុំបើកបរ, បើកបរក្នុងល្បឿនកំណត់, បើកបរដោយឥរិយាបថល្អ ដោយមិនវ៉ាជែងក្នុងស្ថានភាពគ្រោះថ្នាក់ មិនបើកបញ្ច្រាស បត់ ឬប្ដូរទិសចរាចរណ៍ដោយប្រុងប្រយ័ត្នជាដើម។
ជាមួយគ្នានេះ ក្នុងឱកាសបុណ្យទានធំៗ ដូចជាបុណ្យភ្ជុំជាដើម នៅតាមវត្តអារាម មានព្រះសង្ឃ និងអាចារ្យ ត្រូវឆ្លៀតឱកាសនេះផ្សព្វផ្សាយពីសុវត្ថិភាពចរាចរណ៍ តាមរយៈធម្មទេសនា ការផ្ដល់ឱវាទ និងការប្រកូកប្រកាស ព្រមទាំងចងបដារំលេចនូវខ្លឹមសារអប់រំជាដើម ដើម្បីពញ្ញាក់ស្មារតីបរិស័ទ ឲ្យមានការប្រុងប្រយ័ត្នក្នុងពេលបើកបរ។
លោក គឹម បញ្ញា បញ្ជាក់បន្ថែមថា ការរឹតបន្តឹងច្បាប់ចរាចរណ៍ នៅក្នុងអំឡុងពេលបុណ្យជាតិធំៗ ក៏គួរតែធ្វើឡើងឲ្យបានម៉ឺងម៉ាត់ជាងថ្ងៃធម្មតា ដើម្បីកាត់បន្ថយការល្មើសច្បាប់ និងវិធានសុវត្ថិភាពចរាចរណ៍ គោលច្បងនោះគឺសុវត្ថិភាពរបស់ប្រជាពលរដ្ឋ។
សូមជម្រាបថា គ្រោះថ្នាក់ចរាចរណ៍ក្នុងរយៈពេល ៦ ខែដំបូងនៃឆ្នាំ ២០២៤ នេះបានកើតឡើងចំនួន ១ ៥៣៤ លើក ដែលបណ្តាលឱ្យមនុស្សស្លាប់ចំនួន ៧៩៣ នាក់, កើនឡើង ៣៧ នាក់ ស្មើនឹង៥% បើធៀបនឹងរយៈពេលដូចគ្នានៃឆ្នាំ ២០២៣។ ចំណែកអ្នករបួសមានចំនួន ២ ១១៦ នាក់, កើន ៤៤ នាក់ ស្មើ២% ។ នេះបើយោងតាមរបាយការណ៍របស់អគ្គស្នងការដ្ឋាននគរបាលជាតិ។
ចំនួនគ្រោះថ្នាក់ចរាចរណ៍ក្នុងរយៈពេល ៦ខែ ឆ្នាំ ២០២៤ នេះមានការថយចុះចំនួន ១៤ករណី បើបៀបទៅនឹងរយៈពេលដូចគ្នាកាលពីឆ្នាំ ២០២៣ ដែលមានចំនួន ១ ៥៤៨ លើក ដែលបណ្តាលឱ្យមនុស្សស្លាប់ ៧៥៦នាក់ និងរបួស ២ ០៧២នាក់។
អត្ថបទ៖ ឈិន ធារ៉ាត់
