សិល្បៈជាតិ៖ ខុសពីសព្វមួយដង កញ្ញា អ៊ិន លក្ខិណា មានឱកាសបានជួបជុំបងប្អូន ធ្វើបុណ្យរួមគ្នា ប៉ុន្តែឆ្នាំនេះ អាស្រ័យដោយជាប់ភារកិច្ច ចេញទៅប្រកួត Miss Cosmo នៅប្រទេសវៀតណាម ធ្វើឱ្យកញ្ញាខកខានមិនបានចូលរួមធ្វើបុណ្យភ្ជុំបិណ្ឌ។
ជាទូទៅនៅក្នុងឱកាសបុណ្យភ្ជុំបិណ្ឌ គឺជាវេលាមួយដែលមហាគ្រួសារខ្មែរ តែងតែវិលត្រលប់ទៅស្រុកកំណើត សម្រាប់អ្នកធ្វើការឆ្ងាយផ្ទះដើម្បីជួបជុំក្រុមគ្រួសារធ្វើបុណ្យរួមគ្នា យ៉ាងណាមិញសម្រាប់បេក្ខភាពតំណាងកម្ពុជាកញ្ញា អ៊ិន លក្ខិណា ឆ្នាំនេះ អាស្រ័យដោយជាប់ភារកិច្ចចេញទៅដណ្ដើមមកុដនៅប្រទេសវៀតណាម ធ្វើឱ្យខកខានមិនបានជួបជុំក្រុមគ្រួសារ និង ទៅវត្តធ្វើបុណ្យរួមគ្នា។
ទោះជាឆ្នាំនេះ មិនបាននៅធ្វើបុណ្យភ្ជុំបិណ្ឌ នៅក្នុងប្រទេសប៉ុន្តែ គេរំពឹងថាកញ្ញា អ៊ិន លក្ខិណា អាចនឹងសម្រេចបានជោគជ័យធំជូនជាតិ នៅលើវេទិកាប្រកួតសម្រស់ដ៏ធំមួយនេះ ព្រោះពីមួយវគ្គ ទៅមួយវគ្គ លក្ខិណា ធ្វើបានយ៉ាងល្អ ជាពិសេសអ្នកគាំទ្ររំពឹងយ៉ាងមុតមាំថា កម្ពុជាច្បាស់ជាអាចទម្លុះទៅកាន់វគ្គកាន់ជ្រៅ ឬក៏កម្រិត Top ព្រោះបេក្ខភាពកម្ពុជារូបនេះ មានទាំងសមត្ថភាព រូបសម្រស់ និងបទពិសោធន៍ប្រកួតលើឆាក។
