តំបន់រងផលប៉ះពាល់ក្នុងខេត្តចំនួន ១១ ក្នុងតំបន់ច្រាំងទន្លេ Chao Phraya រួមទាំងទីក្រុងបាងកក ត្រូវបានគេព្រមានឱ្យត្រៀមលក្ខណៈសម្រាប់គ្រោះទឹកជំនន់ ដែលអាចកើតមាន ខណៈដែលទំនប់ Chao Phraya ក្នុងខេត្ត Chai Nat នឹងបង្កើនអត្រានៃការបង្ហូរទឹកចេញ។ នេះបើយោងតាមការចេញផ្សាយដោយសារព័ត៌មាន The Nation Thailand នាថ្ងៃសុក្រ ទី២៧ ខែកញ្ញា ឆ្នាំ២០២៤។
ប្រព័ន្ធផ្សព្វផ្សាយថៃ កាលពីថ្ងៃទី២៦ ខែកញ្ញា បានរាយការណ៍ថា នាយកដ្ឋានធារាសាស្ត្រនឹងបង្កើនអត្រាបង្ហូរទឹកតាមទំនប់ Chao Phraya ជាបណ្តើរៗ ពីបច្ចុប្បន្ន ១,៤៩៨ ម៉ែត្រគូបក្នុងមួយវិនាទី ដោយសារភ្លៀងបន្តធ្លាក់ខ្លាំង និងហូរខ្លាំងពីភាគខាងជើង ដល់ល្បឿន ២,០០០ម៉ែត្រគូបក្នុងមួយវិនាទី ។
តំបន់ដែលត្រូវរងផលប៉ះពាល់ គឺស្ថិតនៅតាមបណ្ដោយច្រាំងទន្លេ Chao Phraya រួមទាំង ទីក្រុងបាងកក និងខេត្តមួយចំនួនដែលរងផលប៉ះពាល់ផ្សេងទៀតដូចជា ខេត្ត Uthai Thani, Chainat, Sing Buri, Ang Thong, Suphan Buri, Ayutthaya, Lop Buri, Pathum Thani, Nonthaburi និង Samut Prakan។
ការបង្ហូរនេះនឹងបង្កើនកម្ពស់ទឹកក្នុងប្រឡាយ Phong Pheng ក្នុងខេត្ត Ang Thong និងប្រឡាយ Bang Ban ព្រមទាំងទន្លេ Noi ក្នុងខេត្តអយុធ្យា ចន្លោះពី ១ម៉ែត្រ ទៅ ១,៥ ម៉ែត្រ។ ការកើនឡើងកម្ពស់ទឹកនេះ ក៏អាចបណ្តាលឲ្យប្រឡាយ និងទន្លេហូរហៀរទឹកចេញពីច្រាំងទៅកាន់ទីតាំងផ្សេងៗផងដែរ។
នាយកដ្ឋានបានរាយការណ៍ថា គិតត្រឹមនៅម៉ោង៧ ព្រឹកថ្ងៃព្រហស្បតិ៍ សប្ដាហ៍នេះ កម្ពស់ទឹកនៅស្ថានីយ៍ C2 ក្នុងស្រុក Muang នៃខេត្ត Nakhon Sawan បានកើនឡើង ២១សង់ទីម៉ែត្រ ធៀបនឹងថ្ងៃពុធ សប្ដាហ៍នេះ ប៉ុន្តែនៅតែមានកម្រិតទាបជាងច្រាំងទន្លេដែលមានកម្ពស់ ៣,២៩ម៉ែត្រ។ អត្រាបង្ហូរទឹកនៅស្ថានីយ៍នេះគឺ ១,៨៤៦ម៉ែត្រគូបក្នុងមួយវិនាទី។
នៅស្ថានីយ៍ C3 ឬទំនប់ Chao Phraya ក្នុងខេត្ត Chai Nat កម្រិតទឹកបានឡើងបន្តិចចាប់ពីថ្ងៃទី២៥ខែកញ្ញា ប៉ុន្តែនៅតែទាបជាងច្រាំងទន្លេដែលមានកម្ពស់ ៣,៥២ម៉ែត្រ។ អត្រាបង្ហូរទឹកនៅស្ថានីយ៍នេះគឺ ១៤៩៨ម៉ែត្រគូបក្នុង១វិនាទី។
យ៉ាងណាម៉ិញ ប្រជាពលរដ្ឋចំនួន ២០០០គ្រួសារ ត្រូវបានគេរំពឹងថា នឹងរងផលប៉ះពាល់ដោយសារទឹកជំនន់ ខណៈទឹកសមុទ្រនៅប្រទេសថៃបែរជាស្រកចុះ ជាសញ្ញាណឱ្យប្រជាជន រួមទាំងភ្ញៀវទេសចរណ៍ ប្រុងប្រយ័ត្នចំពោះរលកយក្សស៊ូណាមិ៕
