មន្ត្រីជំនាញនាយកដ្ឋានការពារសុវត្ថិភាពបច្ចេកវិទ្យាឌីជីថលនៃអគ្គនាយកដ្ឋានបច្ចេកវិទ្យាឌីជីថល និងផ្សព្វផ្សាយអប់រំ របស់ក្រសួងមហាផ្ទៃ បានធ្វើការស្រាវជ្រាវ ករណីទទួលប្រាក់ផ្ទេរចូលច្រឡំតាមប្រព័ន្ធធនាគារនិងគេចវេសមិនព្រមសងទៅម្ចាស់ដើម (ជនរងគ្រោះ) វិញ។ ករណីនេះត្រូវបានផ្សព្វផ្សាយជាសារធារណៈនៅយប់ថ្ងៃទី៨ ខែតុលា ឆ្នាំ២០២៤ នៅលើគណនីហ្វេសប៊ុករបស់អគ្គនាយកដ្ឋានបច្ចេកវិទ្យាឌីជីថល និងផ្សព្វផ្សាយអប់រំ។
ប្រភពបន្ថែមថា តាមរយៈមន្ត្រីជំនាញនាយកដ្ឋានការពារសុវត្ថិភាពបច្ចេកវិទ្យាឌីជីថល បានក្រើនរំលឹកដល់អ្នកប្រើប្រាស់ប្រព័ន្ធទូទាត់ឌីជីថលទាំងអស់ថា ការទទួលបានប្រាក់តាមរយៈប្រព័ន្ធធនាគារ ដែលពុំមានប្រភពច្បាស់លាស់ (ការផ្ទេរ ឬទូទាត់ច្រលំ) ហើយមានចេតនាទុច្ចរិត គេចវេសមិនផ្ទេរត្រឡប់ជូនគណនីម្ចាស់ដើមវិញ គឺជាអំពើលួចទ្រព្យសម្បត្តិរបស់បុគ្គលដទៃ។
បើតាមនិយមន័យនៃ«បទល្មើសលួច» នៅក្នុងក្រមព្រហ្មទណ្ឌ នៃព្រះរាជាណាចក្រកម្ពុជា ត្រង់មាត្រា៣៥៣ បានកំណត់ថា អំពីលួច គឺជាអំពើដកហូតដោយទុច្ចរិតនូវទ្រព្យសម្បត្តិ ឬវត្ថុផ្សេងទៀតរបស់អ្នកដទៃ តាមគ្រប់មធ្យោបាយក្នុងគោលបំណងយកមកធ្វើជាកម្មសិទិ្ធរបស់ខ្លួន។
ចំណែកកម្រិតនៃទោសដែលត្រូវផ្តន្ទាជនបានប្រព្រឹត្តបទល្មើស «លួច» ត្រូវបានកំណត់ និងបែងចែកខុសៗគ្នា នៅក្នុងក្រមព្រហ្មទណ្ឌ តាមរូបភាពនៃអំពើ ឬ/និង ទំហំព្យសនកម្ម ( ឬ ផលប៉ះពាល់) ដែលកើតចេញពីអំពើលួចនោះ។ ទោសដែលត្រូវផ្តន្ទាសម្រាប់បទល្មើសលួច បានកំណត់ និងបែងចែកដូចជា៖
មាត្រា៣៥៦៖ អំពើលួច ត្រូវផ្តន្ទាទោសដាក់ពន្ធនាគារពី ០៦ ខែ ទៅ ០៣ឆ្នាំ និងពិន័យជាប្រាក់ពី ១,មួយលានរៀល ទៅ ៦,ប្រាំមួយលានរៀល ។
មាត្រា៣៥៧៖ “ស្ថានទម្ងន់ទោសដោយសារការប្រព្រឹត្តអំពើហិង្សា” អំពើលួច ត្រូវផ្តន្ទាទោសដាក់ពន្ធនាគារពី ០៣ ឆ្នាំ ទី ១០ ឆ្នាំ ក្នុងករណីដូចតទៅ៖
១៖ អំពើលួចនេះ ប្រព្រឹត្តទៅមុនពេល ក្នុងពេល ឬ ក្រោយពេលប្រើហិង្សា ។
២៖ អំពើលួចនេះ ប្រព្រឹត្តដោយការកាប់គាស់ ទម្លុះទម្លាយ ។
ជាមួយគ្នានេះដែរមន្ត្រីជំនាញនាយកដ្ឋានការពារសុវត្ថិភាពបច្ចេកវិទ្យាឌីជីថល បានក្រើនរំលឹកសារជាថ្មីដល់ប្រជាពលរដ្ឋថា ប្រសិនបើទទួលបានប្រាក់ពុំមានប្រភពច្បាស់លាស់សូមអនុវត្តតាមការណែនាំមួយចំនួនដូចជា៖
១.ធ្វើសេចក្តីរាយការណ៍ជូននគរបាលមានសមត្ថកិច្ចអំពីប្រតិបត្តិការ និងចំនួនទឹកប្រាក់ដែលទទួលបានពីការផ្ទេរច្រឡំ
២. ធ្វើការបញ្ជាក់ និងទូទាត់ទៅគណនីម្ចាស់ដើម ដែលបានផ្ទេរចូល ជៀសវាងផ្ទេរទៅគណនីទី៣ ដែលធ្វើឱ្យអ្នកអាចចូលរួមក្នុងប្រតិបត្តិការផ្ទេរប្រាក់ខុសច្បាប់របស់ជនខិលខូច។
អង្គភាពជំនាញបានបញ្ជាក់ជាចុងក្រោយសូមឱ្យប្រជាពលរដ្ឋមេត្តាចូលរួមសហការទាំងអស់គ្នា ដើម្បីកាត់បន្ថយបទល្មើសបច្ចេកវិទ្យាអោយមានប្រសិទ្ធភាព៕
អត្ថបទ៖ លោក ម៉ឺន រស្មី
