តៃប៉ិ៖ នាវាចម្បាំងរបស់សហរដ្ឋអាមេរិក និងកាណាដាបានទៅដល់ច្រកសមុទ្រតៃវ៉ាន់ ដែលដំណើរនាវាចរណ៍នេះ ធ្វើឡើងមិនដល់ ១សប្តាហ៍ផង បន្ទាប់ពីទីក្រុងប៉េកាំង បានធ្វើសមយុទ្ធយោធាទ្រង់ទ្រាយធំនៅជុំវិញច្រកសមុទ្រដ៏រសើបនេះ។ នេះបើយោងតាមការចេញផ្សាយដោយសារព័ត៌មាន CNA នាថ្ងៃចន្ទ ទី២១ ខែតុលា ឆ្នាំ២០២៤។
សហរដ្ឋអាមេរិក និងសម្ព័ន្ធមិត្តតែងតែឆ្លងកាត់ច្រកសមុទ្រតៃវ៉ាន់ ដើម្បីពង្រឹងឋានៈរបស់ខ្លួនជាផ្លូវទឹកអន្តរជាតិ ដែលធ្វើឱ្យទីក្រុងប៉េកាំង មានការខឹងសម្បារ។
កងនាវាចរលេខ៧ របស់កងទ័ពជើងទឹកអាមេរិក បាននិយាយនៅក្នុងសេចក្តីថ្លែងការណ៍មួយ ថា «នាវាពិឃាត Arleigh Burke-class (USS Higgins) (DDG 76) និង Royal Canadian Navy Halifax-class frigate (HMCS Vancouver) (FFH 331) បានធ្វើការឆ្លងកាត់ «តាមទម្លាប់» កាលពីថ្ងៃទី២០ខែតុលា «លើផ្លូវទឹកដែលសេរីភាពនៃការធ្វើនាវាចរណ៍ និងការហោះហើរលើសមុទ្រត្រូវបានអនុវត្តស្របតាមច្បាប់អន្តរជាតិ» ដោយបន្ថែមថា វាបានបង្ហាញពីការប្តេជ្ញាចិត្តរបស់សហរដ្ឋអាមេរិក និងកាណាដា ក្នុងការលើកកម្ពស់សេរីភាពនៃការធ្វើនាវាចរណ៍សម្រាប់គ្រប់ប្រទេសទាំងអស់នៅលើពិភពលោក។
យ៉ាងណាម៉ិញ ប្រទេសចិន បាននិយាយនាថ្ងៃចន្ទ សប្ដាហ៍នេះថា សកម្មភាពរបស់សហរដ្ឋអាមេរិក និងកាណាដា បានរំខានដល់ «សន្តិភាព និងស្ថិរភាពនៅច្រកសមុទ្រតៃវ៉ាន់»។
អ្នកនាំពាក្យយោធាលោក Captain Li Xi បាននិយាយនៅក្នុងសេចក្តីថ្លែងការណ៍មួយថា «បញ្ជាការភូមិភាគខាងកើត PLA បានរៀបចំកងកម្លាំងជើងទឹក និងដែនអាកាស ដើម្បីត្រួតពិនិត្យ និងរក្សាការប្រុងប្រយ័ត្ន នៅលើផ្លូវឆ្លងកាត់ ដោយគ្រប់គ្រងស្ថានការណ៍តាមច្បាប់ និងបទប្បញ្ញត្តិ»។
ទាក់ទិននឹងបញ្ហានេះ ក្រសួងការពារជាតិ និងក្រសួងការបរទេសរបស់តៃវ៉ាន់ មិនបានឆ្លើយតបភ្លាមៗចំពោះសំណើសុំការអត្ថាធិប្បាយរបស់ AFP នោះទេ។
សូមជម្រាបថា រដ្ឋាភិបាលក្រុងប៉េកាំង បានធ្វើសមយុទ្ធកាលពីថ្ងៃទី១៤ ខែតុលា សប្ដាហ៍មុន ដោយនិយាយថា វាជាសារព្រមានដល់សកម្មភាពផ្ដាច់ខ្លួនរបស់តៃវ៉ាន់ ហើយការធ្វើសមយុទ្ធនេះ ត្រូវបានតៃវ៉ាន់ និងសហរដ្ឋអាមេរិកធ្វើការថ្កោលទោស៕
