នៅថ្ងៃទី ៣០ ខែតុលា ឆ្នាំ ២០២៤ នេះ ក្រសួងអប់រំ យុវជន និងកីឡា នឹងប្រកាសលទ្ធផលនៃការប្រឡងសញ្ញាបត្រមធ្យមសិក្សាទុតិយភូមិ សម្រាប់ឆ្នាំសិក្សា ២០២៣-២០២៤ នៅក្នុងរាជធានីភ្នំពេញ និងខេត្តកណ្ដាល។ ហើយនៅថ្ងៃទី ៣១ លទ្ធផលនឹងប្រកាសនៅតាមបណ្ដាខេត្តនានាទូទាំងប្រទេស។
សូមរំឭកថា សម័យប្រឡងមធ្យមសិក្សាទុតិយភូមិ បានប្រព្រឹត្តិទៅកាលពីថ្ងៃទី ៨ និង ៩ ខែតុលា ឆ្នាំ ២០២៤ ដោយរលូនល្អ មិនមានបាតុភាពមិនប្រក្រតីណាមួយកើតឡើងគួរឲ្យកត់សម្គាល់ឡើយ។ បន្ទាប់មកដំណើរការកំណែមានរយៈពេលមួយសប្ដាហ៍ គិតចាប់ពីថ្ងៃទី ១១ ដល់ ១៧ ខែតុលាហើយដំណើរការស្រង់បូកសរុបពិន្ទុតាមរយៈប្រព័ន្ធកុំព្យូទ័រមានរយៈពេល ១០ ថ្ងៃ គិតចាប់ពីថ្ងៃទី ១៨ ដល់ ២៨ ខែតុលា។
ការប្រឡងសញ្ញាបត្រមធ្យមសិក្សាទុតិយភូមិ សម័យប្រឡង ៨ តុលា ២០២៤ មានបេក្ខជនចុះឈ្មោះប្រឡងសរុបចំនួន ១៣៧ ០៤០ នាក់ ក្នុងនោះបេក្ខជននារីមានចំនួន ៧៤ ៨៨២ នាក់។ បេក្ខជនអវត្តមានសរុប ២ ៣៦៤ នាក់, មានស្រី ៩០៧ នាក់៕
