ម្ចាស់ផ្ទះថៃ ឥណ្ឌូណេស៊ី អូស្រ្តាលី និងវៀតណាម ជាក្រុមដែលបានឡើងទៅកាន់វគ្គពាក់កណ្តាលផ្ដាច់ព្រ័ត្រ នៃពានរង្វាន់ជម្រើសជើងឯកបាល់ទាត់ហ្វូតសាលប្រចាំតំបន់អាស៊ាន AFF Futsal Championship ឆ្នាំ២០២៤។
ក្រោយប្រកួតជម្រុះក្នុងពូលរួមមក វៀតណាមជាក្រុមឈរលេខ១ ក្នុងពូល A ៤ប្រកួតឈ្នះទាំង៤ មាន ១២ពិន្ទុ ថៃឈរលេខ២ ៤ប្រកួត ឈ្នះ៣ ចាញ់១ មាន ៩ពិន្ទុ។ ពូល B ឥណ្ឌូណេស៊ី ៣ប្រកួតឈ្នះទាំង ៣ មាន ៩ពិន្ទុ អូស្រ្តាលី ៣ប្រកួត ឈ្នះ១ ស្មើ១ និងចាញ់១ មាន ៤ពិន្ទុ។
សម្រាប់ការប្រកួតវគ្គពាក់កណ្តាលផ្ដាច់ព្រ័ត្រ នៅថ្ងៃទី៨ វិច្ឆិកា ២០២៤ មានដូចខាងក្រោម៖
- វៀតណាម ជួប អូស្រាលី នៅទីលាន Terminal21 Kor វេលាម៉ោង ៣:០០នាទីរសៀល
- ឥណ្ឌូណេស៊ី ជួប ថៃ នៅទីលាន Terminal21 Kor វេលាម៉ោង ៦:០០នាទីរសៀល
ដោយលែកសម្រាប់ក្រុមជម្រើសជាតិហ្វូតសាលកម្ពុជា បានធ្លាក់ចេញពីពានរង្វាន់មួយនេះក្រោយឆ្លងកាត់ ៣ប្រកួតក្នុងពូល B មាន៖ ប្រកួតទី១ ចាញ់ ឥណ្ឌូណេស៊ី ៩-០ ប្រកួតទី២ ចាញ់មីយ៉ាន់ម៉ា ៥-៤ ប្រកួទី៣ ចាញ់អូស្រ្តាលី ៩-២។
ព្រឹត្តិការប្រកួតពានរង្វាន់ជម្រើសជើងឯកហ្វូតសាលប្រចាំតំបន់អាស៊ាន AFF Futsal Championship ឆ្នាំ២០២៤ ដែលរៀបចំពីថ្ងៃទី២ ដល់ថ្ងៃទី១០ ខែវិច្ឆិកា ឆ្នាំ២០២៤ នៅខេត្តនគររាជសីមា ប្រទេសថៃ មានក្រុមចំនួន៩ប៉ុណ្ណោះចូលរួម ខណៈ២ក្រុមក្នុងតំបន់អាស៊ីអាគ្នេយ៍ផ្សេងទៀតរួមមាន សិង្ហបុរី និងឡាវ គ្មានវត្តមាន។
គួរបញ្ជាក់ដែរថា ថៃ ជាក្រុមដែលគ្រងពានអាស៊ាននេះច្រើនជាងគេដល់ទៅ១៦លើក ក្នុងចំណោមព្រឹត្តិការណ៍ទាំង១៧លើក គិតចាប់ពីបង្កើតដំបូងនៅឆ្នាំ ២០០១មក។ ខណ:ឥណ្ឌូណេស៊ី ឈ្នះ១លើក នៅឆ្នាំ២០១០ ក្រៅពីនោះគ្មានក្រុមណាឈ្នះឡើយ ដោយម៉ាឡេស៊ី រងជើងឯក ៥លើក អូស្ត្រាលី ៤លើក វៀតណាម ២លើក រួមជាមួយមីយ៉ាន់ម៉ា និងសិង្ហបុរី រងជើងឯក១លើកដូចគ្នា៕
