ពានរង្វាន់បាល់ទាត់លីគនារីកម្ពុជា Cambodian Women’s League រដូវកាលឆ្នាំ២០២៤-២៥ បានធ្វើដំណើរដល់សប្ដាហ៍ទី១១ ហើយក្នុងចំណោម២១សប្ដាហ៍ដែលក្រុមទាំង១០ត្រូវប្រកួតប្រជែងប្រចាំឆ្នាំ ស្របពេលមានអ្នកចាំទី១រូប រកគ្រាប់បាល់ឱ្យក្រុមរបស់ខ្លួន ក្លាយជាអ្នកចាំទីមុនគេដែលរកគ្រាប់បាល់បាន។
អ្នកចាំទីរូបនោះគឺ កីឡាការិនី ស្រង នះ របស់ក្រុមបាល់ទាត់វិសាខា ដោយបានទាត់បញ្ជូលទីក្រុមសលត៍ ខេត្តបាត់ដំបង កាលពីចុងសប្ដាហ៍កន្លងទៅ ក្នុងជើងទី២ នៅទីលានរបស់ក្រុមសលត៍ ក្នុងខេត្តបាត់ដំបង ស្របពេលដែលលទ្ធផលសរុប ក្រុមវិសាខា បានយកឈ្នះលើក្រុមម្ចាស់ផ្ទះសលត៍ ដោយលទ្ធផល ១៨-១។ រូបគេបានប្តូរចូលនៅនាទី៦៦ ហើយរកគ្រាប់បាល់បាននៅនាទី៧៨។
តាមពិតទៅនេះជាប្រកួតទី២ហើយ ដែលកីឡាការិនី ស្រង នះ ត្រូវបានលោកគ្រូបង្វឹក វី លីកា ដាក់ឱ្យប្រកួតលើទីលាន តែតំណែងជាខ្សែបម្រើ ម្តង ខណៈប្រកួតលើកទី១កន្លងទៅ ពេលប្រកួតទល់នឹងក្រុមមីស្ទើរលេង ក្នុងសប្ដាហ៍ទី១០ នាងលេងបាន១២នាទី នៅចុងម៉ោងផងដែរ។
លោក វី លីកា គ្រូបង្វឹកក្រុមវិសាខា ធ្លាប់ប្រាប់ក្រុមការងារសារព័ត៌មានត្រយងថា៖«យើងដាក់ឱ្យគាត់ (ស្រង នះ) ចូលលេង គឺចង់ពិនិត្យ ការលែងរបស់គាត់បន្ថែម ព្រោះកន្លងទៅគាត់ក៏ធ្លាប់លេង ក្រៅពីតួរនាទីអ្នកចាំទីដែរ»។ ក្រុមវិសាខា ជាក្រុមតែ១គត់ដែលមានអ្នកចាំទីទាំង៣នាក់បានចូលលេង៩០នាទីពេញគ្រប់ៗគ្នា ហើយរក្សាមិនឱ្យរបូតគ្រាប់បាល់ (Clean Sheets ) ដល់ទៅ៦លើក ក្នុងនោះកីឡាការិនី ស្រង នះ ធ្វើបាន២លើកម្នាក់ឯងផងដែរ។
ពានរង្វាន់លីគនារីកម្ពុជា មានក្រុមចូលរួមចំនួន១០ក្រុម ដោយត្រូវប្រកួតសន្សំពិន្ទុវិលជុំចំនួន២ជើង ដោយក្នុងនោះក្រុមមានពិន្ទុល្អជាងគេចំនួន៤ក្រុម មានឈ្មោះឡើងទៅជុំបន្ត ដោយប្រើរូបមន្ត លេខ៤ ប៉ះលេខ៣ រកអ្នកឈ្នះឡើងទៅប៉ះក្រុមលេខ២ ខណៈក្រុមលេខ១រកចាំនៅវគ្គផ្ដាច់ព្រ័ត្រ៕
