សិល្បៈអន្តរជាតិ៖ ថ្មីៗនេះ Angelina Jolie បានបណ្ដើរកូនប្រុស Knox Jolie-Pitt នៅលើកំរាលព្រំក្រហមនៅក្នុងកម្មវិធីប្រគល់ពានរង្វាន់ The Governors Awards ដោយទង្វើនេះត្រូវបានប្រភពជិតស្និទ្ធិនឹង Brad បានចោទប្រកាន់អ្នកម្ដាយរូបនេះថា ប្រើប្រាស់កូនដើម្បីបញ្ឈឺចិត្តអតីតស្វាមី។
នៅក្នុងកម្មវិធីនោះ គេបានឃើញរូបភាពដ៏កម្ររវាងម្ចាស់ពានរង្វាន់អូស្ការវ័យ៤៨ឆ្នាំ បណ្ដើរកូនប្រុសទៅចូលរួមក្នុងកម្មវិធី ថែមទាំងអ្នកទាំងពីរបានឈប់ និង ឈរឱ្យគេថតរូបលើកំរាលព្រំថែមទៀតផង។
ប្រភពមិនបញ្ចេញឈ្មោះបានប្រាប់ Dailymail.com ថាអតីតស្វាមីរបស់ Angelina Jolie គឺលោក Brad Pitt បានត្រឹមមើលកូនប្រុសដើរលើកម្រាលព្រំក្រហម ហើយមិនបាននិយាយអ្វីជាមួយគ្នាទាល់តែសោះ ដែលជាប្រការមួយគួរឱ្យសង្ស័យ ថាតារាស្រីរូបនេះមានចេតនាបញ្ឈឺចិត្តអតីតស្វាមី ព្រោះអ្នកទាំងពីរនេះត្រៀមនឹងប្រឈមមុខដាក់គ្នានៅតុលា រឿងក្ដីលែងលះដែលអូសបន្លាយមកជាច្រើនឆ្នាំ។
ប្រភពដដែលនោះបានលើកឡើងថា Angelina Jolie ព្យាយាមចោទប្រកាន់ និងបំបែកបំបាក់ទំនាក់ទំនងរវាងឪពុកនិងកូនទាំង៦នាក់ ក្រោយពេលអ្នកទាំងពីរបានចែកផ្លូវគ្នា។ បន្ថែមលើសពីនោះប្រភពបានបន្តទៀតថានាងព្យាយាមប្រើប្រាស់កូនបញ្ឈឺស្វាមី ទាំងដែលបានចាញ់ក្ដី Brad Pitt កាលពីពេលថ្មីៗនេះគឺជារឿងមួយប្លែកជាទីបំផុត ជាពិសេសនៅពេលដែល Knox គឺជាក្មេងម្នាក់ដែលមិនចូលចិត្តភាពល្បីល្បាញ និងមានដែលបានទាក់ទងអ្វីជាមួយនឹងឪពុក Brad Pitt ទាល់តែសោះ។
លើសពីនេះទៀត ប្រភពបានបន្តនិយាយទៀតថា Brad Pitt មិនសប្បាយចិត្តដែល Angelina Jolie ប្រើប្រាស់កូនៗមកប្រឆាំងជាមួយនឹងគាត់។ ជាពិសេសនោះកូនៗរបស់លោកនៅក្មេង ពួកគេមិនទាន់ចេះគិតដូច្នេះមិនមានឱកាសបានយល់ពីជម្រៅចិត្តរបស់លោក។ យ៉ាងណាមិញ Brad Pitt សង្ឃឹមថាមិនយូរទៀត កូនៗនឹងវិលត្រលប់មកក្នុងជីវិតរបស់លោកវិញ។
ផ្ទុយពីអ្វីដែលប្រភពខាងលើបានលើកឡើង ប្រភពជិតស្និទ្ធិនឹង Angelina Jolie បានអះអាងថាការទៅចូលរួមក្នុងកម្មវិធីនេះគឺជាការចង់បានរបស់ Knox ដើម្បីបង្ហាញពីការគាំទ្រម្ដាយ៕
