ពានរង្វាន់បាល់ទាត់លីគនារី Cambodian Women’s League រដូវកាល២០២៤-២៥ ដែលមានសមាជិក១០ក្រុម បានបញ្ចប់ការប្រកួតសប្ដាហ៍ទី១២ ក្នុងចំណោម២១សប្ដាហ៍ ខណៈក្រុមបាល់ទាត់វិសាខា ជាក្រុមដំបូងគេ រកបានគ្រាប់ដល់១០០គ្រាប់។
ក្រុមបាល់ទាត់នារី សលត៍ ខេត្តបាត់ដំបង ជាក្រុមដែលមិនទាន់រកបានជ័យជម្នះសោះ កំពុងឈរបាតតារាង ១១ប្រកួត ចាញ់ទាំង១១ប្រកត ស៊ុតបាន ១០គ្រាប់ របូតវិញ ១៥២គ្រាប់ គ្មានពិន្ទុ។
អ្នកចាំទី១រូប រកគ្រាប់បាល់ឱ្យក្រុមរបស់ខ្លួន ក្លាយជាអ្នកចាំទីមុនគេដែលរកគ្រាប់បាល់បាន។ អ្នកចាំទីរូបនោះគឺ កីឡាការិនី ស្រង នះ របស់ក្រុមបាល់ទាត់វិសាខា ដោយបានទាត់បញ្ជូលទីក្រុមសលត៍ ខេត្តបាត់ដំបង កាលពីចុងសប្ដាហ៍កន្លងទៅ ក្នុងជើងទី២ នៅទីលានរបស់ក្រុមសលត៍ ក្នុងខេត្តបាត់ដំបង។
មានតែ២ក្រុមប៉ុណ្ណោះដែលបានឈរកំពូលតារាង ក្នុងនោះមានក្រុមនារី ភ្នំពេញក្រោន ឈរកំពូលតារាង ៩សប្ដាហ៍ ជាប់គ្នាគិតចាប់ពីសប្ដាហ៍ទី៤ដល់ទី១២ ខណ: ក្រុមនារីវិសាខា ឈរកំពូលតារាង សប្ដាហ៍ទី១ដល់ទី៣។
ចំណែកកម្មវិធីប្រកួតបន្តនៅសប្ដាហ៍ទី១៣ គ្រោងប្រកួតនៅថ្ងៃទី១៤ខែធ្នូ ឆ្នាំ២០២៤ ក្រោយជម្រើសជាតិត្រឡប់មកពីប្រកួតជើងឯកអាស៊ាន នៅប្រទេសឡាវ វិញមាន៖
*កំពង់ធំ Vs ភ្នំពេញក្រោន
*សៀមរាប Vs បឹងកេត
*សលត៍បាត់ដំបង Vs កំពង់ឆ្នាំង
*មីស្ទើរលេង Vs ណាហ្គាវើលដ៍
*វិសាខា Vs ព្រះខ័នរាជស្វាយរៀង
សូមបញ្ជាក់ថាលីគនារីកម្ពុជា តម្រូវឱ្យក្រុមទាំង១០ប្រកួតគ្នាវិលជុំចំនួន២ជើងហើយក្រុមដែលមានពិន្ទុច្រើនជាងគេមានឈ្មោះបន្តប្រកួតវគ្គពាក់កណ្តាលផ្ដាច់ព្រ័ត្រ ដោយក្រុមលេខ៣ ប៉ះក្រុមលេខ៤ រកអ្នកឈ្នះឡើងទៅប៉ះក្រុមលេខ២ ខណៈក្រុមលេខ១ មានឈ្មោះចាំប្រកួតនៅវគ្គផ្ដាច់ព្រ័ត្រ។
តាមគម្រោងការប្រកួតធ្វើនេះចាប់ផ្ដើមពីថ្ងៃទី១៧ ខែសីហា ឆ្នាំ២០២៤ ដល់ថ្ងៃទី៨ ខែកុម្ភៈ ឆ្នាំ២០២៥ ដោយការប្រកួតត្រូវធ្វើ Home/Away លើទឹកដីរបស់ក្រុមទាំង១០ម្តងម្នាក់៕
