មនុស្ស ៤នាក់បានស្លាប់នៅភាគនិរតីនៃប្រទេសតួកគី កាលពីថ្ងៃអាទិត្យ នេះ នៅពេលដែលឧទ្ធម្ភាគចក្រសង្គ្រោះបន្ទាន់បានបុកជាមួយអគារមន្ទីរពេទ្យ ហើយបានធ្លាក់។ នេះបើយោងតាមការចេញផ្សាយដោយសារព័ត៌មាន Reuters នាថ្ងៃទី២២ ខែធ្នូ ឆ្នាំ២០២៤។
ក្រសួងសុខាភិបាល បាននិយាយនៅក្នុងសេចក្តីថ្លែងការណ៍មួយថា ឧទ្ធម្ភាគចក្រនេះកំពុងហោះចេញពីមន្ទីរពេទ្យបណ្តុះបណ្តាល និងស្រាវជ្រាវ Mugla ដោយបានដឹកអ្នកបើកយន្តហោះ ២នាក់ វេជ្ជបណ្ឌិតម្នាក់ និងបុគ្គលិកពេទ្យម្នាក់ទៀត។
អភិបាលតំបន់ Mugla លោក Idris Akbiyik បានប្រាប់អ្នកយកព័ត៌មានថា ឧទ្ធម្ភាគចក្របានបុកជាន់ទី៤ នៃអគារមន្ទីរពេទ្យ មុនពេលធ្លាក់ដល់ដី។
យ៉ាងណាម៉ិញ គ្មាននរណាម្នាក់នៅក្នុងអគារ ឬនៅលើដីបានរងរបួសឡើយ ចំពោះមូលហេតុនៃគ្រោះថ្នាក់នេះ កំពុងត្រូវបានស៊ើបអង្កេត។
វីដេអូពីកន្លែងកើតហេតុបង្ហាញពីកំទេចកំទីរាយប៉ាយជុំវិញបរិវេណខាងក្រៅអគារមន្ទីរពេទ្យ ដោយមានរថយន្តសង្គ្រោះបន្ទាន់ និងក្រុមសង្គ្រោះជាច្រើននៅនឹងកន្លែង៕
