លោក ហ្វៃ សំអាង អ្នកដឹកនាំរឿងជើងចាស់ និង ជាអ្នកនិពន្ធដ៏ល្បីប្រចាំព្រះរាជាណាចក្រកម្ពុជា បានឱ្យដឹងថា ភាពយន្តភាគខ្នាតធំបញ្ចាំងលើកញ្ចក់ទូរទស្សន៍ រឿងអប្សរាមហាអង្គរ បានថតបញ្ចប់ប្រកបដោយជោគជ័យហើយ ក្រោយបានសម្ងំផលិតអស់រយៈពេល២ឆ្នាំពេញ។

ភាពយន្តប្រឌិត យកលំនាំតាមប្រវត្តិសាស្ត្រខ្មែរយើងនេះ គឺជារឿងទីមួយដែលបានរំលេចសាច់រឿងក្នុងសម័យអង្គរ ត្រូវបានអ្នកនិពន្ធ និងដឹកនាំឆ្នើមដែលបានប្រឡូកក្នុងវិស័យសិល្បៈ ៣០ឆ្នាំកន្លងមកនេះ ទម្លាយឱ្យដឹងទៀតថា អប្សរាមហាអង្គរ គឺជារឿងដែលមានការលំបាកច្រើន ព្រោះ Production ធំ ជាពិសេសគឺជារឿងដែលលោកតាំងចិត្តផលិតនេះ មានខ្ទង់ចំណាយរហូតដល់ខ្ទង់លានដុល្លារ ប៉ុន្តែមិនច្បាស់ថានឹងអាចស្រង់ដើមបានវិញឬអត់នោះឡើយ។

ត្បិតមិនដឹងថានឹងមានចំណូលអាចស្រង់ដើមបានឬអត់ក្ដី តែលោក ហ្វៃ សំអាង ក៏បានលើកឡើងបន្តទៀតដែរថា ប្រសិនបើមិនព្យាយាមផលិតរឿងឱ្យមានគុណភាពទេនោះ ក៏មិនអាចចូលរួមគ្នាដើម្បីលើកស្ទួយវិស័យភាពយន្តបានដែរ។

គួរដឹងថាភាពយន្តភាគខ្នាតធំយកលំនាំតាមប្រវត្តិសាស្ត្រខ្មែរនាសម័យអង្គររឿងអប្សរាមហាអង្គរ គឺជាស្នាដៃដឹកនាំដោយលោកហ្វៃសំអាង រឿងនេះគ្រោងចាក់បញ្ចាំងនៅលើកញ្ចក់ ទូរទស្សន៍ហង្សមាស ប៉ុន្តែចំពោះកាលបរិច្ឆេទថានឹងចាក់បញ្ចាំងនៅពេលណានោះ នៅមិនទាន់បានកំណត់ជាក់លាក់នៅឡើយទេ៕

