យោងតាមសេចក្ដីរាយការណ៍បានឱ្យដឹងថា លោក គីម ជុងអ៊ុន បានដាក់ចេញច្បាប់ថ្មី ស្ដីពីការហាមប្រាមមិនឱ្យប្រជាជនកូរ៉េខាងជើង បរិភោគអាហារហ្វាស់ហ្វូត (Fast Food) ហតដក (Hot dog) ដែលជាប្រភេទអាហារដ៏ពេញនិយមមួយរបស់លោកខាងលិច។ នេះបើយោងតាមការចេញផ្សាយដោយទីភ្នាក់ងារព័ត៌មាន MSN នាថ្ងៃចន្ទ ទី៦ ខែមករា ឆ្នាំ២០២៥។
ម្ចាស់ហាងលក់់អាហារអាយុ ៤០ឆ្នាំម្នាក់ បានអះអាងថា អាហារហ្វាស់ហ្វូត (Fast Food) ហតដក (Hot dog) ដ៏ពេញនិយមរបស់លោកខាងលិច មិនត្រូវបានអនុញ្ញាតឱ្យដាក់លក់ក្នុងប្រទេសទៀតទេ ហើយនិយាយថា បើនៅបន្ដដាក់លក់អាហារ ឬហូប ហតដក នេះទៀត នឹងត្រូវចាត់ទុកថា ជាទង្វើក្បត់ជាតិ រួមទាំងត្រូវប្រឈមនឹងការដាក់ទោសផ្សេងៗ នៅជុំរុំពលកររបស់រដ្ឋកុម្មុយនិស្ដមួយនេះ។
បើយោងតាមការចុះផ្សាយរបស់សារព័ត៌មាន The Sun កាលពីថ្ងៃទី៤ ខែមករា ឆ្នាំ២០២៥ ក្រឹត្យនេះជាការអនុវត្តថ្មីចុងក្រោយបំផុតរបស់ក្រុងព្យុងយ៉ាង ក្នុងការបង្រ្កាបអ្វីដែលខ្លួនមើលឃើញថាជាការឈ្លានពាននៃវប្បធម៌លោកខាងលិច។
អាហារ ហតដក មិនមែនជាអាហារតែមួយគត់ ដែលលោក គីម បានហាមប្រាមនោះទេ។ កន្លងមក មេដឹកនាំកូរ៉េខាងជើងរូបនេះ បានហាមឃាត់ការលក់អាហារមួយចំនួនផ្សេងទៀត ដូចជា ប្រភេទមីហឹរ និងនំ tteokbokki ដែលជាអាហារតាមចិញ្ចើមផ្លូវដ៏ពេញនិយមនៅក្នុងប្រទេសកូរ៉េខាងត្បូងផងដែរ។
ក្រៅតែពីអាហារ កូរ៉េខាងជើងក៏បានចេញច្បាប់ថ្មីជាហូរហែ ដើម្បីដាក់ទោសប្រជាជនរបស់ខ្លួនដែរ ជាក់ស្ដែងកាលពីខែធ្នូ កន្លងទៅ ប្ដីប្រពន្ធដែលលែងលះគ្នា នឹងត្រូវប្រឈមទោសឧក្រិដ្ឋកម្មពី ១ទៅ៦ខែនៅក្នុងជុំរុំពលករ ដែលការលែងលះនេះត្រូវបានប្រទេសកុម្មុយនិស្ដនេះចាត់ទុកថា ជាទង្វើប្រឆាំងនឹងសង្គម៕
