ខុទ្ទកាល័យ ឯកឧត្ដមអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ទម្លាយថា ម្ចាស់គណនីហ្វេសប៊ុក Sithy Heng ដែលប្រើគោរមងារជាឧកញ៉ា ហេង សិទ្ធី ជាបុគ្គលដែលនគរបាលជាតិបញ្ចូលឈ្មោះទៅក្នុងបញ្ជីតាមចាប់ខ្លួន ដោយបុគ្គលរូបនេះរងបណ្ដឹងជាច្រើនករណី និងមិនព្រមចូលខ្លួនបំភ្លឺតាមការកោះហៅរបស់សមត្ថកិច្ច។ ខុទ្ទកាល័យ ឧបនាយករដ្ឋមន្ត្រី រដ្ឋមន្ត្រីមហាផ្ទៃសន្និដ្ឋានថា ព្រោះហេតុដូច្នេះ ហើយ បានជាបុគ្គលនេះ ប្រើបណ្ដាញសង្គមផ្សាយព័ត៌មានបំភ្លៃ បំភ័ន្តចោទប្រកាន់លើគេឯងជាបន្តបន្ទាប់ ដោយបំពានក្រមព្រហ្មទណ្ឌនៃព្រះរាជាណាចក្រកម្ពុជា ដើម្បីជាធ្នាក់អូសទាញប្រទេស ឬអង្គការមួយចំនួន ឱ្យចេញមុខការពារខ្លួន ឬផ្ដល់សិទ្ធិជ្រកកោនក្រោមលេសដូចដែលក្រុមប្រឆាំងនិយមធ្វើ តៗគ្នាដោយ តាំងខ្លួនជាអ្នករងការធ្វើទុក្ខបុកម្នេញ។ ខុទ្ទកាល័យរដ្ឋមន្ត្រីក្រសួងមហាផ្ទៃចាត់ទុក ទង្វើបុគ្គលឈ្មោះ ហេង សិទ្ធី ឬម្ចាស់គណនី Sithy Heng មិនមែនជាសេរីភាពបញ្ចេញ មតិនោះឡើយ។
តំណាងឲ្យថ្នាក់ដឹកនាំក្រសួងមហាផ្ទៃ ដែលជាស្ថាប័នទទួលបន្ទុកផ្នែកសន្តិសុខជាតិ និងអង្គភាពក្រោមចំណុះ ខុទ្ទកាល័យឯកឧត្ដមអភិសន្តិបណ្ឌិត បានទាមទារឲ្យម្ចាស់គណនី Sithy Heng បង្ហាញនូវភស្តុតាងជាក់ស្ដែងជាសាធារណៈ ប្រកបដោយទំនួលខុសត្រូវ។ ជាមួយគ្នានេះ ខុទ្ទកាល័យ ឯកឧត្ដមអភិសន្តិបណ្ឌិតព្រមានថា បុគ្គលរូបនេះ កំពុងប្រឈមនឹងការចោទប្រកាន់លើ ញុះញង់ឱ្យប្រព្រឹត្តបទឧក្រិដ្ឋជាអាទិ៍ និង ញុះញង់ឱ្យមានការរើសអើង ដែលមានចែងក្នុងក្រមព្រហ្មទណ្ឌ នៃព្រះរាជាណាចក្រកម្ពុជា។
សូមជម្រាបថា កាលពីពេលថ្មីៗនេះ គណនីហ្វេសប៊ុក Sithy Heng ដែលគេស្គាល់ថា មានងារជាឧកញ៉ា ឈ្មោះ ហេង សិទ្ធី ម្ចាស់ក្រុមហ៊ុន Maritime Group បានបង្ហោះខ្លឹមសារចោទប្រកាន់ថ្នាក់ដឹកនាំ នៃក្រសួងមហាផ្ទៃ និងនគរបាលជាតិ៣រូប រួមមាន ឯកឧត្ដមអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ឯកឧត្តម សុខ ផល រដ្ឋលេខាធិការក្រសួងមហាផ្ទៃ និងឯកឧត្ដម ឧត្ដមសេនីយ៍ឯក ស ថេត ពាក់ព័ន្ធនឹងអំពើពុករលួយ ការពារអំពើខុសច្បាប់ និងក្លែងលិខិតសាធារណៈជាដើម។
នៅក្នុងទម្រង់លិខិត ដែលគណនីហ្វេសប៊ុក Sithy Heng បង្ហោះ នៅថ្ងៃទី ៧ មករា ២០២៥ នេះ បានប្រកាសថា ជាលិខិតបណ្ដឹងទៅកាន់អង្គភាពប្រឆាំងអំពើពុករលួយ ដោយអះអាងថា ខ្លួនជាបុគ្គល ហេង សិទ្ធី តំណាងឲ្យមន្ត្រីនគរបាលចំនួនដល់ទៅ ៧៦៥ នាក់ ឋានៈចាប់ពីថ្នាក់អនុសេនីយ៍រហូតដល់ឧត្ដមសេនីយ៍ដែល សុំមិនបញ្ចេញអត្តសញ្ញាណ។ ជាមួយគ្នានេះ គណនីហ្វេសប៊ុក Sithy Heng បង្ហើបថា ពាក្យបណ្ដឹងនឹងទៅដល់ដៃប្រធានអង្គភាពប្រឆាំងអំពើពុករលួយនៅថ្ងៃពុធ ទី៨ ខែមករា ឆ្នាំ ២០២៥។
ទោះបីជាបុគ្គលនេះអះអាងដូចខាងលើក្ដី ប៉ុន្តែគេមិនឃើញមានបង្ហាញអំណះអំណាង ឬភស្តុតាងជាក់លាក់ណាមួយឡើយ៕
អត្ថបទ៖ ឈិន ធារ៉ាត់
