ភាពយន្តភាគកូរ៉េ Squid Game 2 គឺជាភាពយន្តភាគដែលចំណាយថវិការផលិតអស់ជិត១០០លានដុល្លារ យ៉ាងណាមិញជាមួយនឹងចំនួនទឹកប្រាក់ដ៏ច្រើនលើសលប់នេះ ធ្វើឱ្យ Squid Game 2 បានឈរនៅលើកំពូលតារាង Netflix នៅសាធារណរដ្ឋកូរ៉េ។
ប៉ុន្តែជាការកត់សម្គាល់កម្មវិធីផ្គូរផ្គងគូស្រករ Ì am Solo, Love Forever របស់ទូរទស្សន៍ SBS Plus បានក្លាយជាកម្មវិធីដែលទទួលបានការពេញនិយមខ្លាំង ពីសំណាក់អ្នកទស្សនា ហើយកម្មវិធីស្ដីពីការរៀបចំគូស្រករឱ្យអ្នកមេម៉ាយ និងពោះម៉ាយ បានជួប ស្គាល់ នឹងបង្កើតទំនាក់ទំនងនេះ ស្រាប់តែទទួលបានអត្រាទស្សនាខ្ពស់រហូតអាចវ៉ាដាច់ Squid Game 2 ថែមទៀតផង។
បើតាមការផ្សាយពីសារព័ត៌មានក្នុងស្រុក កម្មវិធី I Am Solo, Love Forever ឈរនៅលំដាប់ទី១ លើតារាងកម្មវិធីមានអត្រាអ្នកទស្សនាច្រើនបំផុតទាំង១០ ឬ Top 10 Series in Korea យកឈ្នះភាពយន្តភាគដ៏ល្បី Squid Game 2 ដែលឈរនៅលំដាប់ទី២ តាមពីក្រោយដោយភាពយន្ត Tails of Tales ឈរលេខរៀងទី៣ និង The Tale of Lady Ok ឈរលំដាប់ទី៤ និងចុងក្រោយឈរលំដាប់ទី៥ រឿង When The Phone Ring។
សម្រាប់ភាពយន្ត Squid Game 2 នេះ អាចនិយាយបានថាជាភាពយន្តកូរ៉េដែល ជោគជ័យជាសកលក៏ថាបាន ព្រោះភាពយន្តនេះឈរនៅកំពូលតារាងមានអត្រាអ្នកទស្សនាខ្ពស់បំផុតចំនួន៨០ប្រទេស ហើយក៏ជាភាពយន្តមិនប្រើប្រាស់ ភាសាអង់គ្លេសដែលទទួលបានការពេញនិយមបំផុតនៅលើ App Netflix ផងដែរ។
.សូមជម្រាបជូនថាភាពយន្ត Squid Game 2 និយាយពីការវិលត្រលប់មកវិញរបស់ Song Gi Hun ក្រោយទទួលបានជ័យជំនះលើហ្គេម ដើម្បីសងសឹកលើ Front Man ក៏ដូចជាកំទេចល្បែងមរណៈសម្លាប់ជីវិតមនុស្សរាប់រយនាក់ កុំឱ្យបន្តមានតទៅទៀត៕
