អ្នកនាំពាក្យក្រសួងបរិស្ថានបញ្ជាក់ថា ទោះបីជាកម្រិតភាគល្អិតនៅក្នុងខ្យល់មានការកើនឡើង ប៉ុន្តែវាមិនទាន់ដល់កម្រិតគ្រោះថ្នាក់ដល់សុខភាព ដែលត្រូវធ្វើការប្រកាសអាសន្ននោះទេ។
ថ្លែងទៅកាន់អ្នកសារព័ត៌មាន នៅព្រឹកថ្ងៃទី ២៣ ខែមករា ឆ្នាំ ២០២៥ នេះ ឯកឧត្ដម ខ្វៃ អាទិត្យា អ្នកនាំពាក្យក្រសួងបរិស្ថានលើកឡើងថា សារធាតុបំពុលខ្យល់ ត្រូវបានអ្នកជំនាញកំណត់លើ ឧស្ម័នពុលចំនួន ៧ ប្រភេទ ហើយក្នុងនោះផ្ដោតសំខាន់ខ្លាំងជាងគេលើធូលីល្អិតៗ (PM2.5) ។ បើតាមអ្នកនាំពាក្យរូបនេះ, ក្រសួងបរិស្ថានបានសង្កេតឃើញថា ក្នុងរយៈពេលប៉ុន្មានថ្ងៃនេះ កំហាប់ភាគល្អិតជាតិពុលនៅក្នុងខ្យល់មានការកើនឡើងខុសពីធម្មតា, ហើយនៅថ្ងៃទី ២២ ខែមករា នេះកំហាប់ភាគល្អិតក្នុងខ្យល់ បានកើឡើងរហូតដល់ទៅ ៣៥.៧ មីក្រូក្រាមក្នុង១ម៉ែត្រត្រីគុណ ប៉ុន្តែការកើនឡើងនេះ មិនទាន់ដល់កម្រិតបន្ទាត់ក្រហមដែលត្រូវប្រកាសអាសន្ន ឬចេញវិធានការឲ្យប្រជាពលរដ្ឋប្រុងប្រយ័ត្ននោះទេ។ ឯកឧត្ដមបញ្ជាក់ថា កម្រិតដែលត្រូវប្រកាសអាសន្ន គឺ ៥០ មីក្រូក្រាមក្នុង១ម៉ែត្រត្រីគុណ។
បើតាមការលើកឡើងរបស់អ្នកនាំពាក្យក្រសួងបរិស្ថាន ក្រសួងបានដាក់ពង្រាយរថយន្តវាស់គុណភាពខ្យល់ចល័តទាំង៣គ្រឿង ដើម្បីបន្តតាមដានកម្រិតជាតិពុលនៅក្នុងខ្យល់។
ពាក់ព័ន្ធនឹងការតាមដាន និងត្រួតពិនិត្យគុណភាពខ្យល់នេះ ក្រសួងបរិស្ថានបានដាក់ពង្រាយស្ថានីយ និងឧបករណ៍វាស់គុណភាពខ្យល់នៅទូទាំងប្រទេសចំនួន ៦០ កន្លែង ក្នុងនោះ ១០កន្លែងនៅក្នុងរាជធានីភ្នំពេញ បូងរួមជាមួយរថយន្តចល័ត២គ្រឿងបន្ថែមទៀត។
មូលហេតុចម្បង ដែលបង្កឲ្យមានការបំពុលខ្យល់ក្នុងរយៈពេលជាង២០ថ្ងៃដើមឆ្នាំ ២០២៥ នេះ រួមមាន ទី១ ការបំភាយ និងការដុតផ្សេងៗ, ទី២ រងឥទ្ធពលខ្យល់ពីប្រទេសជិតខាង ដែលកំពុងកើនឡើងឧស្ម័នពុលក្នុងខ្យល់, និងមូលហេតុរួមផ្សំមួយចំនួនទៀត។
បើយោងតាមការចុះផ្សាយរបស់គេហទំព័រ National Thailand នៅថ្ងៃទី ២៣ ខែមករា ឆ្នាំ ២០២៥ នេះ បានឲ្យដឹងថា កម្រិតភាគល្អិតក្នុងខ្យល់ (PM2.5) នៅក្នុងខណ្ឌមួយចំនួននៃរាជធានីបាងកក កើនឡើងចន្លោះពី ៨១.៤ ដល់ ៩៦.៦ មីក្រូក្រាមក្នុងមួយម៉ែត្រគីប ដែលជាកម្រិតមួយដ៏ខ្ពស់ និងគ្រោះថ្នាក់។ ចំណែកនៅរដ្ឋធានីហាណូយវិញ Reuters បានចុះផ្សាយកាលពីថ្ងៃទី ៤ មករា ២០២៥ ថា កម្រិតភាគល្អិតក្នុងខ្យល់មានរហូតដល់ ជាង ២៦០ មីក្រូក្រាមក្នុងមួយមែត្រគីប ដែលជាកម្រិតខ្ពស់ និងគ្រោះថ្នាក់បំផុត។
សូមបញ្ជាក់ថា PM2.5 គឺសំដៅលើធូលីល្អិតមានទំហំ ២.៥ មីក្រូក្រាម ឬស្ទើរជាងនេះ ដែលមាននៅក្នុងខ្យល់អាកាស។ ធូលីទាំងអស់នេះ អាចកើតចេញពីការដ្ឋានសំណង់ ការដុត (អុស សំរាម ប្រេងឥទ្ធនៈ ព្រៃ សំណល់កសិកម្ម ជាអាទិ) យានយន្ត និងកត្តាផ្សេងៗទៀត៕
អត្ថបទ៖ ឈិន ធារ៉ាត់
