ដាវ៉ូស៖ ប្រធានាធិបតីសហរដ្ឋអាមេរិក លោក ដូណាល់ ត្រាំ បាននិយាយនៅថ្ងៃព្រហស្បតិ៍ ថា លោកចង់ជួបប្រធានាធិបតីរុស្ស៊ី លោក វ្ល៉ាឌីមៀ ពូទីន ឱ្យបានឆាប់តាមដែលអាចធ្វើទៅបាន ដើម្បីសម្រេចឱ្យនូវបានការបិទបញ្ចប់សង្គ្រាមជាមួយអ៊ុយក្រែន និងបង្ហាញពីបំណងចង់ធ្វើការឆ្ពោះទៅរកការកាត់អាវុធនុយក្លេអ៊ែរ។ នេះបើយោងតាមការចេញផ្សាយដោយសារព័ត៌មាន CNA នាថ្ងៃសុក្រ ទី២៤ ខែមករា ឆ្នាំ២០២៥។
ថ្លែងនៅវេទិកាសេដ្ឋកិច្ចពិភពលោកនៅទីក្រុង Davos លោក ត្រាំ បានថ្លែងថា «ខ្ញុំចង់ជួបលោកប្រធានាធិបតី ពូទីន ឱ្យបានឆាប់ ដើម្បីបិទបញ្ចប់សង្រ្គាម»។
ប៉ុន្មានម៉ោងក្រោយមក ក្នុងថ្ងៃដដែល លោក ត្រាំ បានប្រាប់អ្នកសារព័ត៌មាននៅសេតវិមាន «លោកបានត្រៀមខ្លួនជាស្រេចដើម្បីជួបជាមួយលោក ពូទីន ឱ្យបានឆាប់តាមដែលអាចធ្វើទៅបាន ដើម្បីបញ្ចប់នូវអ្វីដែលលោកហៅថាសង្រ្គាមដ៏គួរឱ្យអស់សំណើច»។
លោក ត្រាំ បាននិយាយថា «តាមអ្វីដែលខ្ញុំឮ លោកពូទីន ក៏ចង់ជួបខ្ញុំដែរ ហើយយើងនឹងជួបគ្នាឱ្យបានឆាប់តាមដែលអាចធ្វើបាន»។
ទន្ទឹមនោះ លោក ត្រាំ បានបន្ថែមថា ប្រធានាធិបតីអ៊ុយក្រែន លោក វ៉ូឡូឌីមៀ ហ្សេលេនស្គី ក៏បានប្រាប់លោកផ្ទាល់ថា ត្រៀមខ្លួនរួចជាស្រេចដើម្បីស្វែងរកកិច្ចព្រមព្រៀងបញ្ចប់សង្រ្គាម។
ក្នុងវេទិកាវេទិកាសេដ្ឋកិច្ចពិភពលោក នៅទីក្រុង Davos លោក ត្រាំ បាននិយាយថា កិច្ចខិតខំប្រឹងប្រែងរបស់សហរដ្ឋអាមេរិកដើម្បីទទួលបានដំណោះស្រាយសន្ដិភាព កំពុងដំណើរការដោយក្ដីសង្ឃឹម ប៉ុន្ដែមិនបានបញ្ជាក់លម្អិតទេ។
គួររំលឹកថា ក្នុងការឈ្នះឆ្នោតនៅថ្ងៃទី៥ ខែវិច្ឆិកា លោក ត្រាំ បានប្រកាសជាច្រើនដងថា លោកនឹងមានកិច្ចព្រមព្រៀងមួយរវាងអ៊ុយក្រែន និងរុស្ស៊ី នៅថ្ងៃកាន់តំណែងដំបូងរបស់លោក ដោយប្រកាសប្រើពេលបញ្ចប់សង្រ្គាមត្រឹមតែ ១ថ្ងៃប៉ុណ្ណោះ។ ប៉ុន្ដែទីប្រឹក្សារបស់លោក ត្រាំ បានទទួលស្គាល់ថា ការបិទបញ្ចប់សង្គ្រាមរវាងប្រទេសទាំង២ នឹងត្រូវចំណាយពេលរាប់ខែដើម្បីដោះស្រាយ៕
