សិល្បៈជាតិ៖ សម្រាប់ Rapper ល្បីលំដាប់ឈានមុខប្រចាំប្រទេសកម្ពុជា ងួន ចាន់ដាវីត ពិតជាមិនធ្វើឱ្យអ្នកស្រលាញ់ និងគាំទ្រខកបំណងនោះឡើយ ដោយតារារូបនេះបានបញ្ចេញចម្រៀងថ្មីក្រោមចំណងជើងថា «ថីអ្ហែងថី» ដែលកំពុងតែផ្ទុះល្បីល្បាញខ្លាំងលើបណ្ដាញសង្គម។
តារាចម្រៀងយ៉េយ៉េ និយមលេង Style ប្លែក និងទាន់សម័យ G-Devith បានធ្វើឱ្យកក្រើកពិភពចម្រៀង Hip-Hop នៅដើមឆ្នាំ ២០២៥ នេះ តាមរយៈនូវការចេញចម្រៀង Rap បែប Distrack ថ្មីសន្លាងមួយនៅក្នុងឱកាសបុណ្យចូលឆ្នាំចិន ដែលធ្វើឱ្យមានការជជែកវែកញែកដេញដោលគ្នាយ៉ាងគគ្រឹកគគ្រេងលើបណ្ដាញទំនាក់ទំនងសង្គម។
អ្វីដែលគួរឱ្យកត់សម្គាល់ បទចម្រៀងថ្មីរបស់ប៉ាប៉ាអូន Albert កំពុងផ្ទុះ Viral ខ្លាំង ដោយគិតត្រឹម២៤ម៉ោងសោះ បទនេះ អាចរកបានចំនួនទស្សនានៅលើ Facebook រហូតដល់១០លានដង។
បទចម្រៀងចង្វាក់ Rap ដែលកំពុងតែត្រូវបានលើកយកមកជជែកវែកញែក និងវិភាគផ្សេងៗគ្នាទៅតាមការយល់ឃើញរៀងៗខ្លួន នេះនៅតែបន្តផ្ទុះល្បីល្បាញ ព្រោះបើគិតមកត្រឹមព្រឹកថ្ងៃពុធទី ២៩ ខែមករា ឆ្នាំ២០២៥ នេះ នៅតែបន្តមានការចែករំលែក និងអ្នកមកបញ្ចេញមតិយោបល់កោតសរសើរចំពោះបទចម្រៀងរបស់តារារូបនេះជាប់មិនដាច់។
សូមជម្រាបជូនថា បទចម្រៀង «ថីអ្ហែងថី» បានបង្ហោះផ្សាយឱ្យអ្នកនិយមគាំទ្រ និងជាហ្វេនរបស់លោកបានស្ដាប់និងទស្សនាកាលពីថ្ងៃទី២៩ ខែមករា ឆ្នាំ២០២៥៕
