សិល្បៈអន្តរជាតិ៖ ឈានចូលដើមឆ្នាំ ២០២៥ ភ្លាម មានសាច់រឿងនិងចំណងជើងរឿងភាគកូរ៉េជាច្រើនប្រជែងគ្នា ត្រៀមបំរើអារម្មណ៍ប្រិយមិត្តទស្សនិកជន យ៉ាងណាមិញនៅក្នុងចំណោមរឿងទាំងអស់នោះមានរឿងមួយដែលមានចំណងជើងថា The Remarried Empress ហាក់ទទួលបានចាប់អារម្មណ៍ខ្លាំងព្រោះតែតួអង្គរបស់រឿងនេះ។
តាមដំណឹងបែកធ្លាយរឿងភាគកូរ៉េមួយនេះ មានតារាល្បីៗជាច្រើនដួងចូលរួមសម្ដែង ហើយកាន់តែពិសេសនោះគឺជាការគោចរមកជួបគ្នារវាងកំពូលតារាសម្ដែងល្បី Ju Jihoon ជាមួយនឹង Shin MinA ក៏ដូចជាបុរសកំពូលស្នេហ៍របស់តារាចម្រៀងល្បី IU គឺលោក Lee JongSuk។
សាចរ់ឿងនេះនិយាយពីព្រះមហាក្សត្រមួយអង្គដែលគ្រងរាជ្យនៅអាណាចក្រភាគខាងកើត (សម្ដែងដោយ JiHoon) ត្រូវជាព្រះស្វាមីទីមួយរបស់ Shin MinA ដែលជាម្ចាស់ក្សត្រីរបស់អាណាចក្រមួយនេះ។ ប៉ុន្តែក្រោយមកម្ចាស់ក្សត្រីបានសម្រេចចិត្តលែងលះក្រោយបានដឹងដំណឹងថាស្ដេចមានចេតនា លើកស្នំរបស់ទ្រង់ធ្វើជាម្ចាស់ក្សត្រី។ Lee JungSuk ព្រះអង្គម្ចាស់នៃអាណាចក្រភាគខាងលិច ដែលក្រោយមកត្រូវបានតែងតាំងឱ្យឡើងគ្រងរាជ្យនៅអាណាចក្រនេះ គឺជាស្វាមីទីពីររបស់ Shin MinA ធ្វើឱ្យនាងត្រលប់មកមានអំណាចព្រោះជាម្ចាស់ក្សត្រីរបស់អាណាចក្រភពខាងលិច។
នេះគ្រាន់តែជាការសង្ខេបសាច់រឿងខ្លីប៉ុណ្ណោះ ចំពោះសាច់រឿងទាំងស្រុងនឹងទៅជាយ៉ាងណានោះ នៅមិនទាន់មានការបញ្ជាក់ច្បាស់នោះឡើយ៕
