ក្រោយពីដំណឹងនៃការស្លាប់របស់ អ្នកសារព័ត៌មានឧតុនិយមរូបស្រស់របស់ទូរទស្សន៍ MBC កាលពីអំឡុងខែកញ្ញា ឆ្នាំ២០២៤ កន្លងទៅនោះ ទីបំផុតមានសារព័ត៌មានកូរ៉េមួយបានចេញផ្សាយថាមូលហេតុនៃការស្លាប់នោះបណ្ដាលមកពីធ្វើអត្តឃាត ចំណែកបច្ច័យដែលធ្វើឱ្យស្រីស្រស់រូបនេះគិតខ្លីគឺបណ្ដាលមកពីរងនូវការធ្វើបាបពីថ្នាក់លើផ្នែកព័ត៌មានឧតុនិយមដូចគ្នា។
តាមរយៈការផ្សាយពី Maeil អ្នកព័ត៌មាន Oh Yoanna បានទទួលមរណភាពនៅថ្ងៃទី១៥ ខែកញ្ញា ឆ្នាំ២០២៤ ដោយកាលណោះគ្រួសារសពបានសម្រេចមិនប្រកាសពីមូលហេតុនៃការស្លាប់ ប៉ុន្តែបានបញ្ជាក់ថាជាការធ្វើអត្តឃាត ដោយយោងអត្តបទ Note នៅក្នុងទូរស័ព្ទដៃរបស់នាង។
នៅក្នុងនោះបានរៀបរាប់យ៉ាងលម្អិត ពីទុក្ខលំបាកដែល Oh Yoanna ទទួលរងនូវការធ្វើបាបនៅកន្លែងធ្វើការ ដោយក្នុងនោះបានរំលេចឈ្មោះមនុស្សនៅក្នុងផ្នែកព័ត៌មានឧតុនិយម២នាក់ដែលប្រមាថនាងតាំងពីខែមីនា ឆ្នាំ២០២២ ពោលគឺក្រោយពេលដែលនាងធ្វើការងារជា Freelance តាំងពីខែ ឧសភា ឆ្នាំ២០២១មក។
ម្នាក់នៅក្នុងផ្នែកបានបន្ទោសនាងថាបង្កើតកំហុស ដែលពួកគេបានធ្វើ ខណៈដែលម្នាក់ទៀតបានក្លាយជាសត្រូវជាមួយនាងដោយសារតែកែតម្រូវតួលេខព័ត៌មានអាកាសធាតុមិនត្រឹមត្រូវហើយចោទនាងថាមិនគោរពមេកើយ។
បន្ថែមលើសពីនេះ Oh Yoanna តែងតែត្រូវបានបង្ខំឱ្យនៅការិយាល័យយូរ ក្រោយបញ្ចប់ម៉ោងការងារ ដោយសារមិត្តរួមការរបស់នាង សម្រាប់ការរៀនសូត្រមេរៀនបន្ថែម។ នៅពេលដែលកម្មវិធី Quiz On The Block ទាក់ទងទៅកាន់នាងឱ្យមកចូលរួម មិត្តភក្ដិនៅក្នុងផ្នែកជាមួយនាងបានវាយប្រហារ សើចចំអកដែលនាងបានទទួលឱកាសនេះ។ សារព័ត៌មាន Maeil បានបញ្ជាក់ទៀតថា មានសារទាំងជាសំឡេង និងអក្សរ ដែលមិត្តរួមការងាររបស់នាងបន្ទោសនាងថាខ្វះជំនាញ និងហេតុផលផ្សេងៗជាច្រើនទៀត។
