គម្រោងផ្លូវថ្មើរជើង (Walk Street ) តាមបណ្ដោយតីរវិថីព្រះស៊ីសុវត្ថិ និងចាប់ដំណើរការសាកល្បងនៅល្ងាចថ្ងៃសៅរ៍ ទី១ ខែកុម្ភៈនេះហើយ។ គម្រោងផ្លូវថ្មើរជើង ដើរកម្សាន្តនេះ មានប្រវែងជិត២គីឡូម៉ែត្រ (១,៩ គ.ម៉) ចាប់ពីស្តុបផ្លូវលេខ ២៤០ មុខសាលចតុមុខ រហូតដល់ប្រៃសណីយ៍កម្ពុជា ក្បែរវត្តភ្នំ។ Walk Street បើកដំណើរការមួយសប្ដាហ៍២ថ្ងៃ ថ្ងៃសៅរ៍ និងថ្ងៃអាទិត្យ ចាប់ពីម៉ោង៦ល្ងាច ដល់ម៉ោង១១យប់។ ហើយនៅថ្ងៃដែលដំណើរការ Walk Street នេះ, ចរាចរណ៍នៅតាមបណ្ដោយតីរវិថីព្រះស៊ីសុវត្ថិ និងផ្លូវពាក់ព័ន្ធមួយចំនួននឹងត្រូវផ្អាកបណ្ដោះអាសន្ន ដើម្បីរក្សាបាននូវ សន្តិសុខ សុវត្ថិភាព សណ្ដាប់ធ្នាប់ និងរបៀបរៀបរយសាធារណៈ ព្រមទាំងបញ្ចៀសបាននូវការកកស្ទះចរាចរ រដ្ឋបាលរាជធានីភ្នំពេញស្នើសុំបិទផ្លូវ និងពង្វាងចរាចរចំពោះយានយន្តគ្រប់ប្រភេទតាមពេលវេលា និងម៉ោង ដូចបានលើកឡើងក្នុងសេចក្ដីជូនដំណឹងរបស់រដ្ឋបាលរាជធានី ដើម្បីទុកឱ្យប្រជាពលរដ្ឋធ្វើដំណើរថ្មើរជើង។
ទន្ទឹមនេះ រដ្ឋបាលរាជធានីភ្នំពេញបានជូនដំណឹងដល់ប្រជាពលរដ្ឋដែលរស់នៅក្នុងតំបន់ Walk Street ឲ្យយកយានជំនិះខ្លួនចេញពីតំបន់ថ្មើរជើង ឱ្យបានមុនពេលដែលបានកំណត់ខាងលើ ដើម្បីសម្រួលដល់ការដើរកម្សាន្តរបស់ភ្ញៀវជាតិ និងអន្តរជាតិ។ ជាមួយគ្នានេះ រដ្ឋបាលរាជធានីភ្នំពេញ ក៏បានអំពាវនាវដល់បងប្អូនប្រជាពលរដ្ឋទាំងអស់ដែល មានបំណងមកដើរកម្សាន្ត គួរប្រើប្រាស់មធ្យោបាយសាធារណៈ ជំនួសឱ្យការប្រើប្រាស់មធ្យោបាយ ផ្ទាល់ខ្លួន។
យោងតាមការលើកឡើងរបស់ឯកឧត្ដមឃួង ស្រេង កាលពីពេលកន្លងមកបានបញ្ជាក់ថា គម្រោងរៀបចំ ផ្លូវ ថ្មើរជើង សម្រាប់បម្រើដល់វិស័យទេសចរណ៍នេះ, រដ្ឋបាល រាជធានីភ្នំពេញ បានគិតគូរជាយូរមកហើយ តាំងពី ឆ្នាំ ២០១៩ មកម្ល៉េះ, ប៉ុន្តែដោយសារ ស្ថានភាពនៃវិបត្តិកូវីដ-១៩ បានធ្វើឱ្យគម្រោង នេះផ្អាកដំណើរការ មួយឡែកសិន ប៉ុន្តែមកដល់ពេលនេះ បន្ទាប់ ពីមានការណែនាំរបស់រាជរដ្ឋាភិបាលពីការជំរុញទាក់ទាញភ្ញៀវទេសចរនៅតាម មូលដ្ឋានរៀងៗខ្លួន, រដ្ឋបាលរាជធានី ភ្នំពេញបាន បន្តជំរុញគម្រោងផ្លូវ ថ្មើរជើង នេះឱ្យដំណើរការឡើងវិញ ដើម្បីធ្វើយ៉ាងណា ទាក់ទាញភ្ញៀវទេសចរជាតិ និង អន្តរជាតិមក លេងកម្សាន្តឱ្យបានច្រើន។
លោក គុជ បញ្ញា រដ្ឋលេខាធិការ ក្រសួងទេសចរណ៍ បានសម្ដែងការគាំទ្រចំពោះគម្រោងបើកផ្លូវ ថ្មើរជើង នេះព្រោះវាមានសារសំខាន់ណាស់ សម្រាប់បម្រើដល់ ការទាក់ទាញ យ៉ាងល្អ បំផុតសម្រាប់វិស័យ ទេសចរណ៍ ដោយសារ រាជធានីភ្នំពេញ គឺជាបេះដូងនៃព្រះរាជាណាចក្រកម្ពុជា មជ្ឈមណ្ឌលសេដ្ឋកិច្ច នយោបាយ វប្បធម៌ ទេសចរណ៍ ហើយភ្ញៀវទេសចរ ជាច្រើន មិនដែលរំលងរាជធានីភ្នំពេញឡើយ៕
អត្ថបទ៖ ត្រយងតូច
