ក្រុមនារីវិសាខា បានយកឈ្នះលើ ក្រុមនារីណាហ្គាវើលដ៍ នៃពានរង្វាន់លីគនារីកម្ពុជា (Cambodian Women League 2024-25) នៅវគ្គពាក់កណ្តាលផ្តាច់ព្រ័ត្រ ក្នុងទីលានហ្វឹកហាត់ Visakha Training Centre នៅថ្ងៃសៅរ៍ ទី១ ខែកុម្ភ: ឆ្នាំ២០២៥។
ជ័យជម្នះនេះដែរ កើតឡើងដោយការទាត់បាល់កាត់សេចក្ដី១១ម៉ែត្រ ក្នុងលទ្ធផល៤ទល់និង៣ បន្ទាប់ពីលេងពេញ ៩០នាទី។ ដូចនេះ ក្រុមនារីវិសាខា នឹងឡើងទៅជួបភ្នំពេញក្រោន ដែលកំពុងអង្គុយរង់ចាំនៅវគ្គផ្តាច់ព្រ័ត្រ ដែលការប្រកួតគ្រោង នឹងធ្វើឡើងនៅថ្ងៃទី៨ ខែកុម្ភ: ឆ្នាំ២០២៥ ដណ្តើមជើងឯកលីគនារីកម្ពុជា Cambodian Women League 2024-25។
ការប្រកួតពានរង្វាន់លីគនារីកម្ពុជា (Cambodian Women League 2024-25) បានចាប់ផ្ដើមកាលពីថ្ងៃទី១៧ ខែសីហា ឆ្នាំ២០២៤ ដែលគ្រោងនឹងបញ្ជប់នៅថ្ងៃទី៨ ខែកុម្ភៈ ឆ្នាំ២០២៥ ដោយការប្រកួតត្រូវធ្វើ Home/Away លើទឹកដីរបស់ក្រុមទាំង១០ម្តងម្នាក់ និងយកក្រុមដែលមានចំណាត់ថ្នាក់លេខ១ដល់លេខ៤ ដើម្បីប្រជែងជើងឯក។
គួរបញ្ជាក់ថា ពានរង្វាន់លីគនារីកម្ពុជា Cambodian Women League 2024-25 គឺជាលើកទី៣ ហើយដោយលើកដំបូងធ្វើ ឡើងនៅឆ្នាំ២០២០-២០២១ ដោយម្ចាស់ជើងឯកគឺ ណាហ្គាវើលដ៍ និងព្រះខ័នរាជស្វាយរៀង (ដោយការប្រកួតវគ្គផ្ដាច់ព្រ័ត្រត្រូវលុបចោល ដោយសារការរីករាលដាលជំងឺកូវីដ) ខណ:នៅរដូវកាលឆ្នាំ២០២១-២០២២ ម្ចាស់ជើងឯកគឺ ភ្នំពេញក្រោន៕
