ភ្នំពេញ ៖ ដុតសំរាម កាកសំណល់ចាស់ៗ នៅក្នុងបរិវេណដីក្រុមហ៊ុនមួយកន្លែង បណ្តាលឱ្យហុយផ្សែងខ្មួលខ្មាញ់ ខ្មៅងងឹតមេឃ ផ្អើលប្រជាពលរដ្ឋ អាជ្ញាធរ សមត្ថកិច្ច ស្មានតែមានបញ្ហាអ្វីកើតឡើង នៅក្នុងបរិវេណក្រុមហ៊ុនមួយ មានរបងព័ទ្ធជុំវិញ នៅតាមផ្លូវជាតិលេខ៣ ភូមិអង្គត្រគៀត សង្កាត់កន្ទោក ខណ្ឌកំបូល រាជធានីភ្នំពេញ។
កាលពីវេលាម៉ោង ៤ និង ៥០នាទីរសៀល ថ្ងៃទី០១ ខែកុម្ភៈ ឆ្នាំ២០២៥ ទិដ្ឋភាពមើលពីចម្ងាយឃើញថាផ្សែង ហុយខ្មួលខ្មៅងងឹតមេឃ ហាក់បីដូចជាកើតមានបញ្ហាអ្វីកើតឡើង អាចនឹងប្រឈមគ្រោះថ្នាក់ បណ្ដាលឱ្យពលរដ្ឋផ្អើលឆោឡោ ទាំងសមត្ថកិច្ច អាជ្ញាធរ តែពេលតាមទៅមើលផ្ទាល់ដល់ទីកន្លែង ទើបដឹងថាជាការដុតសំរាម សំណល់ចាស់ៗ ប៉ុណ្ណោះ។
តាមការឱ្យដឹងពីអាជ្ញាធរមូលដ្ឋាន ខាងអ្នកប្រចាំមើលការដីក្រុមហ៊ុនមិនបានប្រាប់មុន ស្រាប់តែដុតសំណល់ សំរាម ធ្វើឱ្យផ្សែងហុយខ្មួលខ្មាញ់លើអាកាស រហូតបង្កឱ្យមានការភាន់ច្រឡំ តែទោះជាយ៉ាងណាក្តី អាជ្ញាធរបាននៅឃ្លាំមើល ជាមួយ ខាងអ្នកក្រុមហ៊ុន ជៀសវាង ភ្លើងឆេះរាល៕
