ពលរដ្ឋចំនួន ២គ្រួសារ មួយគ្រួសាររស់នៅ ភូមិទួលក្រសាំង សង្កាត់រកាខ្ពស់ និង មួយគ្រួសារទៀត នៅភូមិព្រែកអញ្ចាញ សង្កាត់ព្រែកឫស្សី ក្រុងតាខ្មៅ ដែលអគ្គីភ័យបានលេបត្របាក់ខ្ទេចអស់ បានទទួលអំណោយមនុស្សធម៌ពីកាកបាទក្រហមកម្ពុជា កាលពីព្រឹកថ្ងៃទី០១ ខែកុម្ភៈ ឆ្នាំ២០២៤ ដើម្បីដោះស្រាយបញ្ហាប្រឈមចំពោះមុខសិន។
តំណាងដ៏ខ្ពង់ខ្ពស់ពី ឯកឧត្តម គួច ចំរើន ប្រធានគណៈកម្មាធិការសាខាកាកបាទក្រហមកម្ពុជាខេត្តកណ្តាល លោកជំទាវ ស្រ៊ុន ស្រីនាង បាននាំមកនូវការផ្ដាំផ្ញើសាកសួរ ដោយក្ដីនឹករលឹក និងសេចក្តីអាណិតអាសូរជាទីបំផុត នូវទុក្ខលំបាករបស់ប្រជាជនគ្រប់រូប ពីសំណាក់លោកអភិបាល និងជាប្រធានសាខាកាកបាទក្រហមខេត្តកណ្ដាលផងដែរ។
ការចុះមកជួយដល់ពលរដ្ឋទាំងពីរគ្រួសារនេះ គឺជាការបង្ហាញនូវក្ដីកង្វល់របស់ថ្នាក់ដឹកនាំដែលត្រូវតែគិតគូរ និងស្វែងរកដំណោះស្រាយមួយល្អប្រសើរជូនពលរដ្ឋក្នុងគ្រាលំបាក ជាក់ស្តែងដូចជាការនាំយកអំណោយសង្គ្រោះបន្ទាន់មកចែកជូនដល់ប្រជាជនរងគ្រោះទាំង ២គ្រួសារនាពេលនេះជាដើម ទោះបីមិនអាចជួយបានទាំងស្រុងក៏ដោយ ក៏ប៉ុន្តែបានចូលរួមចំណែកជួយដោះស្រាយនូវការខ្វះខាតរបស់បងប្អូនបានមួយផ្នែកដែរ។
អំណោយសាខាកាកបាទក្រហមដែលលោកជំទាវបាននាំទៅបានចែកជូនជនរងគ្រោះ ដោយក្នុង១គ្រួសារៗទទួលបាន៖ អង្ករ ៥០គីឡូក្រាម ,មី ១កេស ,កៅស៊ូតង់ ១ផ្ទាំង ,ទឹកត្រី ១យួរ ,ទឹកស៊ីអុីវ ១យួរ ,ទឹកសុទ្ធ ១កេស ,ត្រីខ ១យួរ ,ឃីតសម្ភារប្រើប្រាស់ ១កញ្ចប់ ,សម្ភារផ្ទះបាយ ១ឈុត និងថវិកាចំនួន ១,០០០,០០០ រៀល (មួយលានរៀល)។
លោកជំទាវក៏បានក្រើនរំលឹកដល់ប្រជាពលរដ្ឋទាំងអស់ត្រូវមានស្មារតីប្រុងប្រយ័ត្នចំពោះចំពោះករណីគ្រោះអគ្គិភ័យ ពិសេសរដូវនេះគឺជារដូវរំហើយខ្យល់ស្ងួត ការប្រើប្រាស់ភ្លើងទៀន ភ្លើងធូប ចរន្តអគ្គិសនីជាដើម បើយើងមានការធ្វេសប្រហែល នោះវាអាចបង្កនូវគ្រោះអគ្គិភ័យផ្សេងៗ ដែលនាំឱ្យមានការឆាបឆេះខូចខាត បាត់បង់នូវទ្រព្យសម្បត្តិ ទីជម្រក និងសម្ភារដ៏មានតម្លៃរបស់យើង ពិសេសជីវិតមនុស្ស និងសត្វផងដែរ។
ជាចុងបញ្ចប់ លោកជំទាវ បានលើកទឹកចិត្ត ដល់គ្រួសាររងគ្រោះ ទាំង២គ្រួសារ ដែលត្រូវបានភ្លើងឆាបឆេះផ្ទះសម្បែង មិនត្រូវបាក់ទឹកចិត្ត និងការអស់សង្ឃឹមឡើយ ត្រូវបន្តខិតខំរកស៊ីចិញ្ចឹមជីវិត និងគ្រួសាររបស់យើងបន្តទៀត។
សូមរំលឹកឡើងវិញថាហេតុការណ៍គ្រោះអគ្គិភ័យផ្ទះទី១ បានកើតឡើងកាលពីព្រឹកថ្ងៃទី២៨ ខែមករា ឆ្នាំ២០២៥ បណ្តាលមកពីផ្ទុះកំប៉ុងហ្គាស និង ផ្ទះ ១ខ្នងទៀតបណ្តាលមកពីការឆ្លងចរន្តអគ្គិសនីនៅព្រឹកថ្ងៃទី២៩ ខែមករា ឆ្នាំ២០២៥។ អគ្គីភ័យឆាបឆេះផ្ទះអស់ទាំងស្រុង ពុំមានគ្រោះថ្នាក់បាត់បង់ដល់អាយុជីវិតមនុស្សឡើយ៕
