សិល្បៈអន្តរជាតិ៖ ពិតជាដូចការរំពឹងទុករបស់អ្នកគាំទ្រប្រាកដមែន ក្រោយមានដំណឺងថាបុរសសង្ហាពីខ្សែភាពយន្តភាគកូរ៉េដ៏ល្បី Byeon Woo Seok បានជាប់ឈ្មោះ សម្រាប់ការបោះឆ្នោតជ្រើសរើសបុរសសង្ហាជាងគេលើផែនដី នោះក៏ព្រោះតែរឿងដែលគេសម្ដែងផ្ទុះល្បីល្បាញខ្លាំងកាលពីឆ្នាំ២០២៤។
ភាពយន្ត Lovely Runner បានធ្វើឱ្យកេរ្តិ៍ឈ្មោះរបស់តារារូបនេះហក់ឡើងស្រឺតៗ ប្រៀបដូចជាគេសប់ប៉េងប៉ោង រហូតជួយឱ្យលោកក្លាយជាតារាសំណព្វបេះដូងហ្វេនៗដែលនិយមគាំទ្រភាពយន្តកូរ៉េដោយមិនលំបាក។
Byeon Woo Seok គឺជាតារាសម្ដែងកូរ៉េតែមួយគត់ ដែលត្រូវបានទទួលស្គាល់ និងជ្រើសរើសឈ្មោះឱ្យប្រកួតប្រជែងក្នុងកម្មវិធីបុរសសង្ហាបំផុតលើផែនដីក្នុងឆ្នាំ២០២៥នេះ។ ហ្វេនៗដែលស្រលាញ់គាំទ្រតារារូបនេះបានប្រកាសថាពួកគេនឹងប្រមូលផ្ដុំថវិកា ក៏ដូចជាជួយបោះឆ្នោតគ្មានកំណត់ ដើម្បីធ្វើយ៉ាងណាជួយឱ្យលោកអាចឈ្នះតំណែងមួយនេះ។
សូមរំលឹកឡើងវិញថា ភាពយន្ត Lovely Runner សម្ដែងដោយ Byeon Woo Seok (តួអង្គ Ryu Seon Jae) គឺជាតារាដ៏ល្បីល្បាញ ហើយមានកេរ្តិ៍ឈ្មោះបោះសំឡេងតាំងពីបោះជំហានចូលសិល្បៈ។ ជីវិតគាត់បើមើលពីខាងក្រៅ គឺល្អឥតខ្ចោះ ប៉ុន្តែគ្មានអ្នកណាដឹងទេថា ឧស្សាហកម្មសិល្បៈមួយធ្វើឱ្យជីវិតគេលំបាកបែបណា។ Lim Sol (សម្ដែងដោយ Kim Hye Yoon) គឺជាហ្វេនម្នាក់ដែលស្រលាញ់ចូលចិត្ត Ryu Seon Jae។ កាលពីក្មេងនាងធ្លាប់ជួបឧប្បត្តិហេតុធ្វើឱ្យនាងត្រូវបោះបង់ចោលក្ដីសុបិន តែក្រោយពីបានស្ដាប់ចម្រៀងរបស់អាយដលខ្លួនតាមវិទ្យុធ្វើឱ្យនាងរីករាយឡើងវិញ និងបានឧទ្ទិសខ្លួនជាអ្នកគាំទ្ររបស់ Ryu Seon Jae។ ថ្ងៃមួយ Lim Sol ឈឺចាប់យ៉ាងខ្លាំងក្រោយឮដំណឹងថា អាយដលខ្លួនបានបញ្ចប់ជីវិតរបស់ខ្លួន ប៉ុន្តែស្រាប់តែមានហេតុការណ៍មួយដែលធ្វើឱ្យ Lim Sol មានឱកាសបានធ្វើដំណើរត្រលប់ទៅកាន់អតីតកាល កាលពី១៥ឆ្នាំមុន។ នៅពេលនោះក្នុងពេលដែលអាយដលរបស់នាង Ryu Seon Jae មានអាយុ ១៩ឆ្នាំ ជាសិស្សវិទ្យាល័យ Lim Sol បានព្យាយាមធ្វើគ្រប់យ៉ាង រារាំងមិនចង់ឱ្យគេធ្វើតារា ព្រោះខ្លាចចុងបញ្ចប់ប្រវត្តិសាស្ត្រនឹងច្រំដែល។
