ក្រុមបាល់ទាត់ Shan United (មីយ៉ាន់ម៉ា) បានធ្វើដំណើរមកដល់កម្ពុជាហើយ កាលពីរាត្រីថ្ងៃទី៣ កុម្ភ: ដើម្បីត្រៀមជួបក្រុមម្ចាស់ផ្ទះព្រះខ័នរាជស្វាយរៀង នៃពានរង្វាន់ ASEAN Club Championship Shopee Cup 2024/25 ក្នុងពហុកីឡដ្ឋានជាតិ នាថ្ងៃទី៥ ខែកុម្ភ: ២០២៥ ។
យ៉ាងណាមិញការប្រកួតនេះ គឺជាការប្រកួតចុងក្រោយរបស់ក្រុមទាំង២ និងបានអស់ឱកាសឡើងទៅកាន់វគ្គដូចគ្នា។ ខណ:វគ្គជម្រុះក្នុងពូលនេះ មាន១២ក្រុមចូលរួម នឹងជម្រុះយកតែ ២ក្រុមដែលមានពិន្ទុខ្ពស់ដើម្បីឡើងទៅកាន់វគ្គពាក់កណ្ដាលផ្ដាច់ព្រ័ត្រ។
លទ្ធផលឆ្លងកាត់ ៤ប្រកួតរបស់ព្រះខ័នរាជស្វាយរៀង ក្នុងពានរង្វាន់ Shopee Cup 2024/25៖
- Terengganu (ម៉ាឡេស៊ី) ២-៣ ព្រះខ័នរាជស្វាយរៀង (កម្ពុជា)
- BG Pathum United (ថៃ) ២-១ ព្រះខ័នរាជស្វាយរៀង (កម្ពុជា)
- ព្រះខ័នរាជស្វាយរៀង ០-១ PSM Makassar (ឥណ្ឌូណេស៊ី)
- Dong A Thanh Hoa (វៀតណាម) ០-០ ព្រះខ័នរាជស្វាយរៀង (កម្ពុជា)
- ព្រះខ័នរាជស្វាយរៀង ជួប Shan United (មីយ៉ាន់ម៉ា)
ព្រះខ័នរាជស្វាយរៀង (កម្ពុជា) ស្ថិតនៅក្នុងពូល A ជាមួយក្រុមដូចជា Shan United (មីយ៉ាន់ម៉ា), BG Pathum United (ថៃ), Terengganu (ម៉ាឡេស៊ី), PSM Makassar (ឥណ្ឌូណេស៊ី), Dong A Thanh Hoa (វៀតណាម)។
រំលឹកថា ពានរង្វាន់ជើងឯកតំបន់អាស៊ាន រៀបចំឡើង២លើករួចមកហើយ ដោយក្នុងឆ្នាំ២០០៣ ជើងឯកបានទៅក្រុម East Bengal របស់ឥណ្ឌា ក្រោយយកឈ្នះក្រុម BEC Tero Sasana របស់ថៃ ហើយឆ្នាំ២០០៥ ជើងឯកបានទៅក្រុម Tampines Rovers របស់សិង្ហបុរី ក្រោយយកឈ្នះលើក្រុម Pahang FA របស់ម៉ាឡេស៊ី។
ចំណែកក្រុមដំណាងឱ្យកម្ពុជា ចូលរួមក្នុងពានរង្វាន់នេះគឺ នៅឆ្នាំ២០០៣ ក្រុម Samart United (បច្ចុប្បន្នភ្នំពេញក្រោន) ហើយនៅឆ្នាំ២០០៥ ក្រុមណាហ្គាខប បានចូលរួម (បច្ចុប្បន្ន ណាហ្គាវើល)៕
