មួយរយៈនេះ មានរឿងច្រើនដែលមហាជនតាមដាននៅលើបណ្ដាញសង្គមប្រៀបដូចជារឿងភាគ ដែលអស់ពីរឿងមួយចូលរឿងមួយទៀត ប៉ុន្តែនៅក្នុងចំណោមករណីជាច្រើននោះ រឿងធំពីរគឺរឿងអ្នកជំនួញអនឡាញ Love Riya តាំងខ្លួនជាព្រះនាង ឥន្ទ្រទេវី និងរឿង យុវជន ពេជ ពិសិដ្ឋ តាំងខ្លួនជា អធិរាជ ស៊ីន ស៊ីសាមុត ចាប់ជាតិ មានការចាប់អារម្មណ៍ខ្លាំង រហូតដល់មានការកោះហៅទៅធ្វើកិច្ចសន្យា និងទៅបំភ្លឺ ផងដែរ។ ជុំវិញករណីនេះ សារព័ត៌មានត្រយងបាន ទំនាក់ទំនងទៅកាន់អ្នកនាំពាក្យរងក្រសួងមហាផ្ទៃ លោកបណ្ឌិត ទូច សុឃៈ (សុខៈ) ថាតើក្រសួងនឹងមានចំណាត់ការបែបណាទប់ស្កាត់រឿងបារមីឬជំនឿងប់ងល់ ដែលបង្ហោះផុសផុលលើបណ្ដាញសង្គម? មួយវិញទៀតការប្រើប្រាស់នូវព្រះកិត្តិនាម ឬការអះអាងខ្លួនជាបុគ្គលល្បីចាប់ជាតិ វាបណ្ដាលឱ្យប៉ះពាល់ដល់សង្គមជាតិបែបណាខ្លះ? ជាពិសេស គឺចង់ដឹងថា តើការយកឈ្មោះ ឬ ព្រះកិត្តិនាមព្រះមហាក្សត្រ និង បុគ្គលល្បីល្បាញ ដោយអះអាងថាជារូបស្នង ឬចាប់ជាតិ អាចប្រឈមមុខនឹងផ្លូវច្បាប់ដែរឬទេ?
ថ្លែងប្រាប់សារព័ត៌មានត្រយង លោកបណ្ឌិត ទូច សុឃៈ (សុខៈ) អ្នកនាំពាក្យរងក្រសួងមហាផ្ទៃ បានឆ្លើយតបយ៉ាងច្បាស់លាស់ថា ទង្វើណាក៏ដោយ ប្រសិនបើមិនមានចេតនាទុច្ចរិត ឬធ្វើឱ្យអ្នកដទៃខាតបង់ទ្រព្យសម្បត្តិទេនោះ គឺមិនអាចផ្ដន្ទាទោសបាននោះឡើយ។ ប៉ុន្តែលោកបណ្ឌិតក៏លើកទឡ្ហីករណ៍ខ្លះៗ មកពន្យល់ និងបកស្រាយផងដែរ។ ចំពោះការប្រើប្រាស់ឈ្មោះ និងព្រះកិត្តិនាមព្រះនាង ឥន្ទ្រទេវី ដែលជាអតីតព្រះមហេសី ព្រះបាទជ័យវរ្ម័នទី៧ លោកបណ្ឌិត ទូច សុឃៈ (សុខៈ) បានលើកឡើងថាការធ្វើដូច្នេះគឺពិតជាបានធ្វើឱ្យប៉ះពាល់ដល់វប្បធម៌ និងប្រពៃណីខ្មែរយើង ដែលជាប្រទេសតំកល់អង្គព្រះមហាក្សត្រ ជាទីគោរព និងជាម្លប់ដ៏ត្រជាក់ត្រជុំរបស់ប្រជានុរាស្ត្រ។ ដោយឡែកចំពោះការអះអាងថាជាបុគ្គលល្បី ឧទាហរណ៍ដូចជា ការអះអាងថាជាអធិរាជសំឡេងមាស ស៊ីន ស៊ីសាមុត ចាប់ជាតិជាដើមនោះ ក៏ជាទង្វើមិនគប្បីធ្វើឱ្យប៉ះពាល់ដល់តម្លៃនៃគ្រួសារបុគ្គល។
ក្នុងករណីនេះផងដែរ អ្នកនាំពាក្យរងក្រសួងមហាផ្ទៃ ទទួលស្គាល់ថាការអះអាងថាជាបុគ្គលនេះ ឬបុគ្គលនោះ វាពិបាកនឹងជឿដោយសារតែមិនមានភស្ដុតាងឬអ្វីបញ្ជាក់ឱ្យបានច្បាស់លាស់ តែក៏មានករណីខ្លះ ដែលបុគ្គលដែលអះអាងនោះ អាចឆ្លើយឬអាចដឹងនូវរឿងរ៉ាវផ្សេងៗ គ្រប់សព្វបែបយ៉ាង ដែលធ្វើឱ្យអ្នកដទៃឬគ្រួសារពិបាកនឹងប្រកែក ឬបដិសេធ។ យ៉ាងណាមិញ លោកបណ្ឌិត នៅតែទទូចថា ថាការធ្វើរបៀបនេះ អាចធ្វើឱ្យប៉ះពាល់ដល់ សណ្ដាប់ធ្នាប់ សីលធម៌ ប្រពៃណី និងទំនៀមទំលាប់របស់ខ្មែរ។
និយាយពីច្បាប់ អ្នកនាំពាក្យរងក្រសួងមហាផ្ទៃ ក៏បានពន្យល់បន្ថែមដែរថា ការលើកយកព្រះមហេសីរបស់អង្គព្រះមហាក្សត្រដែលបានសោយទីវង្គតទៅហើយក្ដី ក៏ត្រូវបានគេចាត់ទុកថាទ្រង់មានបុព្វសិទ្ធិដូចទៅនឹងព្រះមហាក្សត្រដែរ (នេះបើយោងតាមច្បាប់រៀបចំព្រះបរមងារនិងព្រះរាជបុព្វសិទ្ធិ ថ្វាយដល់ព្រះមហាក្សត្រនិងព្រះមហេសីនៃព្រះរាជាណាចក្រកម្ពុជា) ដែលច្បាប់នេះចាត់ទុកសិទ្ធិរបស់ព្រះមហសីរបស់អង្គព្រះមហាក្សត្រមានសិទ្ធិខ្ពង់ខ្ពស់ មិនអាចមានបុគ្គលណាបំពានបានឡើយ។ ចំណែកច្បាប់រដ្ឋធម្មនុញ្ញនៃព្រះរាជាណាចក្រកម្ពុជាឆ្នាំ ១៩៩៣ មាត្រា៧ ក៏បានចែងដែរថា អង្គព្រះមហាក្សត្រ មិនអាំចអ្នកណារំលោភបំពានបានឡើយ។ ដូច្នេះការប្រើប្រាស់ឈ្មោះ ឬព្រះកិត្តិនាម របស់អង្គព្រះមហាក្សត្រ ឬមហេសី នៅក្នុងផ្លូវណាមួយដែលមិនសមរម្យ ខុសពីប្រពៃណីវប្បធម៌ ខ្មែរ គឺរំលោភបំពានទៅលើព្រះនាងឥន្ទ្រទេវី។
លើសពីនោះទៀត អ្នកនាំពាក្យរងក៏បានបន្ថែមពាក់ព័ន្ធទៅនឹងក្រមព្រហ្មទណ្ឌ ដោយកាលពីឆ្នាំ២០០៩ មានការធ្វើវិសោធនកម្ម លើមាត្រា ២១៧ស្ទួន ដែលបានចែងពីបទល្មើសប្រមាថចំពោះអង្គព្រះមហាក្សត្រ ដូច្នេះការលើកយកឈ្មោះរបស់មហេសីអង្គព្រះមហាក្សត្រ មកធ្វើទង្វើណាមួយនោះ គឺចាត់ទុកជាការរំលោភបំពាន ព្រោះគ្មានបុគ្គលណាម្នាក់មានសិទ្ធិ យកឈ្មោះ ឬព្រះកិត្តិនាមរបស់ព្រះមហាក្សត្រមកប្រើប្រាស់ មិនថាដោយវាចាអត្ថាធិប្បាយផ្សេងៗ សំណេរ ឬគំនូរ ដោយគ្មានច្បាប់អនុញ្ញាតជាដាច់ខាត។
តាមច្បាប់ការប្រមាថ អង្គព្រះមហាក្សត្រ ត្រូវដាក់ពន្ធនាគារពគី១ឆ្នាំ ទៅដល់៥ឆ្នាំ និងពិន័យជាប្រាក់ពី៥លានរៀល ដល់១០លានរៀល។ ដោយឡែកក៏មានបទល្មើសមួយទៀតដែរទាក់ទងនឹងការប្រើប្រាស់ ព្រះកិត្តិនាម របស់អឌីតរាជវង្សានុវង្ស ឬក៏មហេសីរបស់ព្រះមហាក្សត្រដែលបុព្វសិទ្ធិ និងអភ័យឯកសិទ្ធិដូចព្រះមហាក្សត្រ ហើយមិនអាចមាននរណាម្នាក់ប្រើប្រាស់បាន មិនអាចរំលោភបំពានបាន អាចចូលទៅក្នុងបទល្មើសឆបោក នៃក្រមព្រហ្មទណ្ឌ ប្រសិនគេរកឃើញភស្តុតាងថា បុគ្គលនោះ បានធ្វើឱ្យមហាជនបានជឿជាក់ និងប្រគល់របស់ឬអ្វីមួយដល់បុគ្គលនោះ ដូចមានចែងក្នុងមាត្រា ៣៧៧។
ជាចុងក្រោយអ្នកនាំពាក្យរងក្រសួងមហាផ្ទៃ លោកបណ្ឌិត ទូច សុឃៈ (សុខៈ) ក៏បានលើកឡើងដែរថា ករណីរបស់អ្នកជំនួញអនឡាញ Love Riya បានបញ្ចប់ទៅហើយ ដោយសាមីខ្លួនបានចូលរួមមកផ្ដិតមេដៃជាមួយនឹងក្រសួងចំរុះពាក់ព័ន្ធ សមាគមឧកញ៉ា ក៏ដូចជាក្រសួងមហាផ្ទៃ ចំណែកបុគ្គលដែលអះអាងថាខ្លួនជា អធិរាជសំឡេងមាស ស៊ីន ស៊ីសាមុត ចាប់ជាតិនេះក៏កំពុងដំណើរការតាមនីតិវិធីជាបន្តដែរ។ លោកបណ្ឌិត ទូច សុឃៈ (សុខៈ) ក៏បានផ្ដាំផ្ញើទៅដល់ពលរដ្ឋខ្មែរ ដែលប្រើប្រាស់បណ្ដាញសង្គម សូមប្រើប្រាស់ឱ្យបានត្រឹមត្រូវ ព្រោះប្រសិនបើការប្រើប្រាស់នោះត្រូវបានពិនិត្យឃើញថាខុសច្បាប់នោះ អាចនឹងត្រូវផ្ដន្ទាទោស ដូច្នេះសូមប្រើប្រាស់ឱ្យបានល្អ និងត្រឹមត្រូវ៕
