កងទ័ពការពារជាតិ ១០,០០០នាក់ និងរថយន្តកងទ័ពម៉ិកស៊ិក បានធ្វើដំណើរតាមបណ្តោយព្រំដែនភាគខាងជើងរវាងទីក្រុង Ciudad Juárez និង El Paso រដ្ឋតិចសាស់ កាលពីថ្ងៃពុធ សប្ដាហ៍នេះ បន្ទាប់ពីប្រធានាធិបតីអាមេរិក លោក ដូណាល់ ត្រាំ បានគំរាមកំហែងពន្ធលើប្រទេសម៉ិកស៊ិក។ នេះបើយោងតាមការចេញផ្សាយដោយសារព័ត៌មាន AP News នាថ្ងៃព្រហស្បតិ៍ ទី៦ ខែកុម្ភៈ ឆ្នាំ២០២៥។
ការពង្រាយកងទ័ពនេះ ធ្វើឡើងបន្ទាប់ពីលោក ដូណាល់ ត្រាំ បានប្រកាសថា លោកនឹងពន្យារពេលការដាក់ពន្ធលើប្រទេសម៉ិកស៊ិកយ៉ាងហោចណាស់ ១ខែ។ ជាថ្នូរនឹងការពន្យាពេល ប្រធានាធិបតីនៃប្រទេសម៉ិកស៊ិក លោកស្រី Claudia Sheinbaum បានសន្យាថា លោកស្រីនឹងបញ្ជូនឆ្មាំជាតិរបស់ប្រទេសទៅពង្រឹងព្រំដែន និងបង្ក្រាបការរត់ពន្ធសារធាតុញៀន fentanyl។
លោក Trump បានប្រកាសភាពអាសន្ននៅតាមព្រំដែន បើទោះបីជាកម្រិតនៃការធ្វើចំណាកស្រុក និងការនាំចូលសារធាតុញៀន fentanyl ធ្លាក់ចុះយ៉ាងខ្លាំងកាលពីឆ្នាំមុនក៏ដោយ។
សហរដ្ឋអាមេរិកបាននិយាយថា ខ្លួននឹងធ្វើបន្ថែមទៀត ដើម្បីបញ្ឈប់ការជួញដូរកាំភ្លើងរបស់អាមេរិក ទៅប្រទេសម៉ិកស៊ិក ដោយក្រុមឧក្រិដ្ឋជនជួញដូរមនុស្ស ក្នុងចេតនាបញ្ឆេះអំពើហឹង្សានានា៕
បើតាមមេដឹកនាំឆ្មាំជាតិម្នាក់ បានឱ្យដឹងថា កាលពីថ្ងៃអង្គារ កម្លាំងដំបូងក្នុងចំណោមកម្លាំងចំនួន ១០,០០០នាក់បានមកដល់ទីក្រុងជាប់ព្រំដែន។ ប្រតិបត្តិការនេះ គឺផ្ដោតជាចម្បងដើម្បីការពារការជួញដូរគ្រឿងញៀនពីម៉ិកស៊ិកទៅកាន់សហរដ្ឋអាមេរិក ភាគច្រើនជាសារធាតុញៀន fentanyl៕
