កណ្ដាល៖ អភិបាល នៃគណៈអភិបាលខេត្តកណ្តាល ឯកឧត្តម គួច ចំរើន បានអំពាវនាវដល់ប្រជាពលរដ្ឋ ដែលមានដីឡូតិ៍នៅតំបន់ 7NG ក្នុងប្លុកB2 ដែលរងផលប៉ះពាល់ដោយសារគម្រោងផ្លូវ៦០ម៉ែត្រអាច ដោះដូរជាដីឡូតិ៍័ថ្មីបាន រហូតដល់ថ្ងៃទី១៨ ខែកុម្ភៈ ខាងមុខនេះ។
ប៉ុន្តែម្ចាស់ដីឡូតិ៍ ដែលរងផលប៉ះពាល់ ត្រូវចុះទៅដល់ទីតាំងផ្ទាល់ ហើយមានភ្ជាប់ជាមួយឯកសារ ដើម្បីពិនិត្យ និងផ្ទៀងផ្ទាត់ ទាល់តែត្រឹមត្រូវ ទើបអាចដោះដូរដីឡូតិ៍ថ្មី។
ឯកឧត្តម អភិបាល នៃគណៈអភិបាលខេត្តកណ្តាល បានមានប្រសាសន៍ថា៖ ប្រជាពលរដ្ឋ ដែលបានទិញដីឡូតិ៍ពីក្រុមហ៊ុន 7NG ហើយប៉ះពាល់លើគម្រោង ផ្លូវហេដ្ឋារចនាសម្ព័ន្ធ (ផ្លូវ៦០ម៉ែត្រ) សូមបងប្អូនប្រជាពលរដ្ឋពាក់ព័ន្ធទាំងអស់ យកឯកសារមកពិនិត្យ និងផ្ទៀងផ្ទាត់ លើដីឡូតិ៍របស់ខ្លួន ដែលរដ្ឋបាលខេត្តបានសម្របសម្រួលជាមួយក្រុមហ៊ុន រៀបចំផ្លាស់ប្តូរជូនដល់បងប្អូនប្រជាពលរដ្ឋ នូវទីតាំងដីឡូតិ៍ថ្មីទាំង ២១៥ឡូតិ៍ ចាប់ពីថ្ងៃនេះរហូតដល់ថ្ងៃទី១៨ ខែកុម្ភៈ ឆ្នាំ២០២៥។
សេចក្ដីជូនដំណឹងនេះ ចាត់ទុកជាការចែករំលែក និងជំរាបជូនដល់បងប្អូនដែលជាម្ចាស់ ឬមានបងប្អូនមិត្តភក្ដិ ជាម្ចាស់ដីនៅប្លុក B2 ដែលប៉ះចំគម្រោងផ្លូវ យកឯកសារទៅដាក់ពិនិត្យ និងផ្ទៀងផ្ទាត់ឱ្យបានទាន់ពេលវេលា៕
អត្ថបទ៖កណ្តាល
