ក្រោយសម្ងំលាក់ខ្លួនព្យាបាលមួយរយៈ រាជនីរូបសម្រស់ Zhao Lusi តារាសម្ដែងឈានមុខរបស់ចិនបានវិលត្រលប់មកធ្វើការវិញបានជាធម្មតា ដោយម្ចាស់ខ្លួនបានប្រកាសថាពេលនេះនាងវិលមកសភាពធម្មតាវិញហើយចំណែកអាការៈជំងឺកន្លងមករបស់តារាស្រីរូបនេះកើតពីបញ្ហាសុខភាពផ្លូវចិត្ត។
គេនៅចាំបានថាកាលពីខែធ្នូ ឆ្នាំ២០២៤ ផលិតកម្មដែលគ្រប់គ្រងលើតារាស្រីរូបនេះបានលើកឡើងថានាងមានបញ្ហាសុខភាព ត្រូវសំរាកព្យាបាលខ្លួនមួយរយៈ ក្រោយពីនោះនៅថ្ងៃទី១ ខែមករា ឆ្នាំ២០២៥ Zhao Lusi បានបង្ហោះខ្លឹមសារវែងអន្លាយលើបណ្ដាញសង្គម បើកកកាយរឿងដែលខ្លួនមានបញ្ហាបាក់ទឹកចិត្តតាំងតែឆ្នាំ២០២១ តែក្រោយៗមកអាការៈកាន់តែធ្ងន់ ដូចជាក្អួតចង្អោរញឹកញាប់ និង ឈឺក្បាលវិលមុខជាប្រចាំទម្ងន់ខ្លួនស្រកនៅសល់ត្រឹមតែ ៣៧ គីឡូក្រាម។
យ៉ាងណាមិញការបង្ហាញខ្លួនជាថ្មីដោយទឹកមុខស្រស់ស្រាយ ហើយនិយាយពាក្យអរគុណចំពោះអ្នកគាំទ្រដែលស្រលាញ់ និងប្រកាសថាខ្លួនត្រលប់មកវិញជាថ្មី ព្រោះតែក្ដីស្រលាញ់របស់អ្នកគាំទ្រ ធ្វើឱ្យអ្នកដែលស្រលាញ់ Zhao Lusi រំភើបជាពន់ពេក។
តារាស្រីរូបនេះ ក្រោយអាការៈបានធូរស្រាល បានត្រលប់ទៅសម្រាកនៅផ្ទះឯក្រុង ឆឺងទូ នៅទីនោះនាងបានឆ្លៀតទៅសួរសុខទុក្ខក្មេងៗនៅមណ្ឌល យ៉ាងណាមិញ Zhao បានបង្ហាញក្ដីកង្វលើដែលគ្រប់គ្នាមើលរំលងបញ្ហាផ្លូវចិត្ត ជាពិសេសអាការៈឈឺក្បាល ឈឺពោះ ដែលជាអាការៈមានពាក់ព័ន្ធនឹងបញ្ហាសុខភាពផ្លូវចិត្ត ព្រោះគ្រប់គ្នាមិនចង់ទៅព្យាបាល ដោយសារស្ដាយលុយ រហូតទុកដល់អាការៈធ្ងន់ធ្ងរ។
Zhao Lusi ប្រាប់ថា បច្ចុប្បន្ននេះឡើងទម្ងន់រហូតដល់ ៤គីឡូ ពេលនេះមានទម្ងន់ខ្លួន ៤១ គីឡូ ដោយពីមុនទម្ងន់ខ្លួន ៣៧ គីឡូ ដោយនាងបានប្រាប់ថាពីមុនបានព្យាយាមសំរកគីឡូ តែទីបំផុតពេលនេះឈប់ខ្វល់ពីរឿងនេះ ដោយផ្តោតជាសំខាន់លើសុខភាពរឹងមាំសំខាន់ជាង។
នៅពេលសាកសួរដល់បញ្ហាផ្លូវចិត្ត តារាស្រីរូបនេះទទួលស្គាល់ថា ជាមនុស្សលាក់អារម្មណ៍ ជាពិសេសរឿងតូចតាច មិនព្រមនិយាយចេញ រហូតទីបំផុតបណ្ដាលឱ្យកើតមានបញ្ហាផ្លូវចិត្ត ដោយ Zhao បានឱ្យដឹងថា៖ «ខ្ញុំធ្លាប់គិតថាជំងឺបាក់ទឹកចិត្ត គឺជារឿងគួរឱ្យអាម៉ាស តែពេលនេះខ្ញុំគិតថាយើងគ្រប់គ្នាគួរតែផ្ដល់ការសំខាន់ដល់ផ្លូវចិត្តខ្លួនឯងឱ្យកាន់តែច្រើនជាងមុន»
ការប្រកាសពីអាការៈបាក់ទឹកចិត្តរបស់ខ្លួនជាសាធារណៈនេះ តារាស្រីរូបនេះទទួលស្គាល់ថាមិនពិភាក្សាជាមួយនឹងអ្នកណាម្នាក់នោះឡើយ ទោះជាខ្វល់ចំពោះការតបស្នងពីអ្នកគាំទ្រ ប៉ុន្តែនាងពិតជាអរគុណដែលអ្នកគាំទ្រយល់ចិត្តនិងផ្ដល់កម្លាំងចិត្ត។
ជាចុងក្រោយ Zhao Lusi បានណែនាំដល់អ្នកមានបញ្ហាផ្លូវចិត្តថាបើសិនជាស្ត្រេស ឬមានសម្ពាធ គួរតែនិយាយចេញមក ដើម្បីការពារខ្លួនឯងពីពាក្យឬទង្វើណាមួយដែលធ្វើបាបផ្លូវចិត្តខ្លួនឯង៕
