ក្រោយផ្ទុះករណីតួឯកអប្សរា ខូចក្រលៀន និងត្រូវលាងឈាម កាលពីពេលថ្មីៗនេះ ស្រាប់តែតន្ត្រីករសម័យ ដៃ Bass (Guitar Bass) គឺលោក សូ សុខលាង កំពុងតែឈឺក្រលៀនធ្ងន់ធ្ងរ និងត្រូវលាងឈាម ដោយពេលនេះត្រូវការថវិកាច្រើនដើម្បីព្យាបាល។ តាមរយៈអ្នកនាង ខាត់ សុឃីម បានអំពាវនាវ សុំឱ្យបងប្អូនអ្នកសិល្បៈ ចាស់ ថ្មី ជួយឧបត្ថម្ភប្រាក់ ដល់លោក ខ្លះៗ ដើម្បីសម្រាលបន្ទុក ព្រោះជំងឺលោកប្រឹងធ្វើការទាំងឈឺទើបអាការៈដុនដាបខ្លាំង។
សិល្បការិនីពហុជំនាញ ខាត់ សុឃីម បានបង្ហោះសារនៅលើហ្វេសប៊ុករបស់ខ្លួន នៅថ្ងៃទី១២ ខែកុម្ភៈ ឆ្នាំ២០២៥ នេះ ប្រាប់ដំណឹងដល់សិល្បករដូចគ្នា ជួយស្រាក់ថវិកាគ្នាដើម្បីជួយដល់តន្ត្រីករហ្គីតាបាស់មួយរូប មានឈ្មោះថា សូ សុខលាង ដែលឈឺក្រលៀនធ្ងន់ធ្ងរ ប៉ុន្តែនៅតែប្រឹងធ្វើការទាល់តែធ្លាក់ខ្លួនឈឺធ្ងន់ទើបសំរាក។ ក្រៅពីបានជួយចែករំលែកដំណឹងនេះហើយអ្នកនាង ខាត់ សុឃីម ក៏បានជួយថវិកាចំនួន ២០ដុល្លារទៅដល់លោក សូ សុខលាង ផងដែរ។
ការចេញមកអំពាវនាវរបស់អ្នកនាងនេះ ក្រោយភរិយារបស់តន្ត្រីកររូបនេះ ប្រកាសដំណឹងពីជំងឺប្ដីរបស់ខ្លួនស្នើឱ្យមានការចូលរួមជួយដល់តន្ត្រីកររូបនេះ ហើយមានមិត្តភក្ដិ បានបន្តជួយផ្សព្វផ្សាយសុំឱ្យមានការចូលរួមជួយពីអ្នកសិល្បៈដូចគ្នា។ ត្បិតមិនមែនជាអ្នកសិល្បៈ ប្រសិនបើលោកអ្នកដែលអាណិតចង់ជួយដល់លោកអាច ជួយលោកបាន ដោយទាក់ទងទៅហ្វេសប៊ុករបស់លោកដែលមានឈ្មោះថា Sokleang So ឬក៏អាចចុចចូលទៅតាមលីង ដែលមាននេះ៖ Facebook
បញ្ហាខូចក្រលៀន ខូចតម្រង់នោម ទឹកនោមផ្អែម បានផ្ទុះខ្លាំងនៅក្នុងសង្គមខ្មែរយើងមួយរយៈចុងក្រោយនេះ ព្រោះមានក្មេងៗតូចៗជាច្រើននាក់ដែលកើតជំងឺទឹកនោមផ្អែម និងមានយុវវ័យពេញកម្លាំង ពេញសមត្ថភាពជាច្រើនទៀត ប្រឈម និងកំពុងឈឺជំងឺខូចក្រលៀន ឬតម្រងនោមនេះ៕
