ដោយសារទំហំនៃអាហារូបករណ៍ សម្រាប់ការសិក្សាលើបច្ចេកវិទ្យាឌីជីថល នៅមានកម្រិត និងត្រូវរក្សានិរន្តរភាពឲ្យបានយូរអង្វែង រាជរដ្ឋាភិបាលតាមរយៈក្រសួងប្រៃសណីយ៍ និងទូរគមនាគមន៍ បានដាក់ដំណើរការ កម្មវិធីអភិវឌ្ឍន៍ជំនាញឌីជីថល ដើម្បីអនុញ្ញាតឱ្យសិស្សនិស្សិតដែលពុំមានលទ្ធភាព អាចស្នើសុំថវិកាសិក្សាដោយមិនគិតការប្រាក់ សម្រាប់បន្តការសិក្សាថ្នាក់បរិញ្ញាបត្រលើជំនាញបច្ចេកវិទ្យាឌីជីថល នៅគ្រឹះស្ថានឧត្ដមសិក្សាដៃគូរបស់កម្មវិធី។
យោងតាមការលើកឡើងរបស់ ឯកឧត្ដម ម៉ៅ សិលា អនុរដ្ឋលេខាធិការក្រសួងប្រៃសណីយ៍ និងទូរគមនាគមន៍ នៅក្នុងសន្និបាតបូកសរុបលទ្ធផលការងារ ៥ឆ្នាំ នៃដំណើរឆ្ពោះទៅបរិវត្តកម្មឌីជីថល និងលើកទិសដៅការងារបន្ត របស់ក្រសួងប្រៃសណីយ៍ និងទូរគមនាគមន៍ កាលពីថ្ងៃទី ៦ ខែកុម្ភៈ ឆ្នាំ ២០២៥ កន្លងទៅ បានឲ្យដឹងថា កម្មវិធីអភិវឌ្ឍន៍ជំនាញឌីជីថល តាមរយៈផ្ដល់ឥណទានគ្មានការប្រាក់នេះ ហាក់នៅមិនទាន់មានភាពទូលំទូលាយនៅឡើយ ត្បិតសិស្ស និស្សិតមានគោលដៅចង់ស្វែងរកតែអាហារូបករណ៍ដើម្បីបន្តសិក្សា។
យោងតាមការពន្យល់របស់ឯកឧត្ដម ម៉ៅ សិលា, សិស្ស និស្សិតដែលមានបំណងចង់បន្តការសិក្សា ជាពិសេសពាក់ព័ន្ធនឹងផ្នែកបច្ចេកវិទ្យាឌីជីថល ពួកគេអាចដាក់ពាក្យស្នើសុំកម្ចីឥណទាន ដែលគ្មានការប្រាក់ពីក្រសួងប្រៃសណីយ៍ និងទូរគមនាគមន៍ ដោយកម្មវិធីនេះនឹងរ៉ាប់រងថ្លៃសិក្សាថ្នាក់បរិញ្ញាបត្ររបស់និស្សិតតាំងពីថ្នាក់មូលដ្ឋានរហូតបញ្ចប់ការសិក្សា។ ជាមួយគ្នានេះ ប្រសិនបើនិស្សិតមានតម្រូវការ សម្ភារៈបច្ចេកទេសដែលបម្រើដល់ការសិក្សា ដូចជាកុំព្យូទ័រជាដើម កម្មវិធីនេះនឹងផ្ដល់ឥណទានបន្ថែមទៀតតាមភាពជាក់ស្ដែង ខណៈជំនួយឥណទាននៃកម្មវិធីនេះ ក៏អាចនឹងផ្ដល់ជូននិស្សិតមកពីតាមបណ្ដាខេត្តឆ្ងាយៗ ដែលត្រូវការជួលបន្ទប់ស្នាក់នៅរៀនសូត្រផងដែរ។
និស្សិតមានកាតព្វកិច្ចទូទាត់បំណុលជូនមកក្រសួងប្រៃសណីយ៍វិញនៅពេលពួកគេបញ្ចប់ការសិក្សា និងទទួលបានការងារធ្វើពេញលេញ ដោយទទួលបានប្រាក់ខែលើសពី៥០០ដុល្លារក្នុងមួយខែ ដែលពួកគេត្រូវទូទាត់មកឲ្យក្រសួងវិញចំនួន ២០ ភាគរយនៃប្រាក់ខែដែលពួកគេទទួលបាន រហូតដល់គ្រប់ចំនួន។ នេះបើតាមការពន្យល់របស់ ឯកឧត្ដម ម៉ៅ សិលា។ ឯកឧត្ដមបន្ថែមថា មូលហេតុដែលកំណត់យកប្រាក់ខែត្រឹម៥០០ដុល្លារឡើង ដោយសារនិស្សិត ដែលបានបញ្ចប់ការសិក្សាផ្នែកបច្ចេកវិទ្យាឌីជីថល ភាគច្រើនទទួលបានចំណូលមិនក្រោមតួលេខនេះទេ។
ក្រសួងប្រៃសណីយ៍ និងទូរគមនាគមន៍ (ក.ប.ទ.) បានប្រកាសដាក់ដំណើរការជាផ្លូវការនូវ “កម្មវិធីអភិវឌ្ឍន៍ជំនាញឌីជីថល” ឬ “Digital Skill Development Program” កាលថ្ងៃទី២ ខែតុលា ឆ្នាំ២០២៣ ជាមួយនឹងកម្មវត្ថុចម្បងចំនួន៣ រួមមាន៖ ទី១ ការចូលរួមអនុវត្តក្របខ័ណ្ឌ គោលនយោបាយសេដ្ឋកិច្ច និងសង្គមឌីជីថលកម្ពុជា ២០២១-២០៣៥ និងគោលនយោបាយរដ្ឋាភិបាលឌីជីថលកម្ពុជា ២០២២-២០៣៥, ទី២ ការលើកកម្ពស់ស្តង់ដារគុណវុឌ្ឍិ នៃការអប់រំលើមុខជំនាញដែលទាក់ទងនឹងបច្ចេកវិទ្យាឌីជីថល និង ទី៣ ការគាំទ្រដល់ដំណើរការអភិវឌ្ឍមូលធនមនុស្សឌីជីថល តាមរយៈការផ្ដល់ថវិកាសម្រាប់ការអភិវឌ្ឍជំនាញឌីជីថល និងប្រើប្រាស់បច្ចេកវិទ្យាឌីជីថលបម្រើដល់ការអប់រំ៕
អត្ថបទ៖ ឈិន ធារ៉ាត់
