នាយកដ្ឋាននគរបាលបង្ការ ពន្លត់អគ្គិភ័យ និងសង្គ្រោះ នៃអគ្គស្នងការនគរបាលជាតិអំពាវនាវឲ្យប្រជាពលរដ្ឋប្រើប្រាស់លេខទូរស័ព្ទទាន់ហេតុការណ៍ (Hotline) ១១៨ ឲ្យត្រឹមត្រូវ មានប្រសិទ្ធភាព និងប្រកបដោយសេចក្ដីថ្លៃថ្នូរ។ ខណៈប្រជាពលរដ្ឋមួយចំនួនបានបញ្ចេញមតិយោបល់ស្នើឲ្យអាជ្ញាធរចាត់វិធានការចំពោះអ្នកដែលបានហៅទូរស័ព្ទចូលលេខ ១១៨ នេះ ដោយគ្មានគោលបំណងច្បាស់លាស់ ឬលេងសើច បង្កការរំខាន។
លេខទូរស័ព្ទទាន់ហេតុការណ៍ (Hotline 118) ជាលេខទូរស័ព្ទរបស់ភ្នាក់ងារនគរបាលបង្ការ ពន្លត់អគ្គិភ័យ និងសង្គ្រោះ ដែលប្រកាសដាក់ឲ្យប្រើប្រាស់ទូទៅ សម្រាប់ឲ្យប្រជាពលរដ្ឋហៅទូរស័ព្ទចូលរាយការណ៍ពីហេតុការណ៍គ្រោះអគ្គិភ័យនៅក្នុងមូលដ្ឋានដែលខ្លួនកំពុងស្ថិតនៅ។
ការអំពាវនាវនេះធ្វើឡើងជាសាធារណៈ តាមរយៈទំព័រ Facebook ផ្លូវការរបស់នាយកដ្ឋាននគរបាលបង្ការ ពន្លត់អគ្គិភ័យ និងសង្គ្រោះ នៃអគ្គស្នងការនគរបាលជាតិ ក៏ដូចជាឆ្លើយតបទៅកាន់សារដែលបានបង្ហោះដោយឯកឧត្ដមខៀវ កាញារិទ្ធ ដែលបានស្រង់ពីប្រជាពលរដ្ឋផ្ញើជូនលោកផងដែរ។ សារនោះមានខ្លឹមសារថា ខ្លួនបានជិះកាត់រោងចក្រមួយកន្លែងកំពុងឆាបឆេះនៅម្ដុំព្រៃស ហើយខ្លួនហៅទូរស័ព្ទទៅភ្នាក់ងារពន្លត់អគ្គិភ័យ ១១៨ ។ ម្ចាស់ដើមសារនោះបានលើកឡើង២ចំណុច៖ ទី១ ពេលហៅទៅកាន់លេខ ១១៨ ខ្លួនត្រូវចុចលេខ ១ បន្ត ដើម្បីជួបសហការី, ទី២ ទូរស័ព្ទចូល តែគ្មានអ្នកលើក។
ឆ្លើយតបទៅវិញ នៅថ្ងៃទី ១២ ខែកុម្ភៈ ឆ្នាំ ២០២៥ នេះ, នាយកដ្ឋាននគរបាលបង្ការ ពន្លត់អគ្គិភ័យ និងសង្គ្រោះ បានលើកឡើងថា លេខទូរស័ព្ទទាន់ហេតុការណ៍ (Hotline) ១១៨ ត្រូវបានផ្អាកដំណើរការមួយរយៈពេលដើម្បីជួសជុលបញ្ហាបច្ចេកទេស ហើយទើបដាក់ដំណើរការឡើងវិញបាន ១សប្ដាហ៍។ ក្នុងដំណើរការឡើងវិញ មួយរយៈពេលខ្លីមកនេះខាងអង្គភាពជួបបញ្ហាហៅទូរស័ព្ទពីសំណាក់ប្រជាពលរដ្ឋមួយចំនួន មករំខានគ្រប់វិនាទី មិនថាពេលយប់ ឬពេលថ្ងៃនោះទេ ដែលការហៅចូលនោះ បានលេងសើចទាំងព័ត៌មានល្អ និងអាក្រក់ ព្រមទាំងប្រើពាក្យអសុរសផង ដែលធ្វើឲ្យក្រុមប្រចាំការធុញទ្រាន់លែងចង់ទទួល។
នាយកដ្ឋាននគរបាលបង្ការ ពន្លត់អគ្គិភ័យ និងសង្គ្រោះ បានស្នើសុំឲ្យប្រជាពលរដ្ឋមេត្តាយោកយល់ និងអធ្យាស្រ័យ ហើយសន្យាថានឹងខិតខំពង្រឹងនឹងកែសម្រួលនូវចំណុចខ្វះខាតដោយអចេតនា ធ្វើឲ្យមានភាពល្អប្រសើរ និងមានប្រសិទ្ធភាពឡើងវិញ។
ជាមួយគ្នានេះដែរ ប្រជាពលរដ្ឋមួយចំនួន បានចូលទៅបញ្ចេញមតិយោបល់ ស្នើឲ្យអាជ្ញាធរស្រាវជ្រាវវែកមុខជនណាដែលបង្កការរំខានដល់ប្រព័ន្ធទូរស័ព្ទទាន់ហេតុការណ៍ដ៏មមាញឹកមួយនេះ និងចាត់វិធានការឲ្យបានម៉ឺងម៉ាត់ ដើម្បីព្រមានកុំឲ្យមានបញ្ហានេះកើតឡើងបន្តទៀត៕
អត្ថបទ៖ ឈិន ធារ៉ាត់
