សិល្បៈជាតិ៖ រូបសំណាកអនុស្សាវរីយ៍របស់លោក ស៊ីន ស៊ីសាមុត ដែលគ្រប់គ្នាស្គាល់លោកជាអធិរាជសំឡេងមាស គ្រោងនឹងតម្លើងនៅសួនច្បារមាត់ទន្លេជិតស្ពានសេកុង នៅក្នុងភូមិស្រែពោធិ សង្កាត់ស្រះឬស្សី ក្រុងស្ទឹងត្រែង ខេត្តស្ទឹងត្រែង ដើម្បីបង្ហាញពីការរំលឹកដល់ការចងចាំមរតកស្នាដៃបទចម្រៀង និងជាទីរំលឹកដល់ក្រុមគ្រួសាររបស់លោក។
ការតម្លើងគម្រោងនេះរូបសំណាកអនុស្សាវរីយ៍លោក ស៊ីន ស៊ីសាមុត គឺបានទទួលការគាំទ្រពីម្ចាស់ជំនួយ NGO-KINAL និងសម្របសម្រួលដោយ មន្ទីរទេសចរណ៍ខេត្ត។ ការតម្លើងរូបសំណាកនេះ នឹងរួមចំណែកលើកកម្ពស់ទេសចរណ៍ និងអភិវឌ្ឍន៍សោភ័ណភាពខេត្ត ជាកន្លែងទាក់ទាញថ្មី សម្រាប់អ្នកដំណើរ និងប្រជាពលរដ្ឋក្នុងមូលដ្ឋាន។
យ៉ាងណាមិញ គម្រោងតម្លើងរូបសំណាកអនុស្សាវរីយ៍លោក ស៊ីន ស៊ីសាមុត នឹងក្លាយជាគោលដៅទេសចរណ៍ និងជាផ្នែកចូលរួមផ្សព្វផ្សាយទេសចរណ៍ខេត្តស្ទឹងត្រែង និង អភិរក្សទេពកោសល្យសិល្បៈរបស់លោក ស៊ិន ស៊ីសាមុត ដែលជាអធិរាជសំឡេងមាស ដែលជាមរតកវប្បធម៌ដ៏មានតម្លៃសម្រាប់កូនចៅជំនាន់ក្រោយ។
គួររំលឹកដែរថា លោកស៊ីន ស៊ីសាមុត កើតនៅថ្ងៃទី២៣ សីហា ១៩៣២ មានស្រុកកំណើតនៅខេត្តស្ទឹងត្រែង។ លោកជាកូនប្រុសពៅក្នុងចំណោមបងប្អូន៤នាក់។ លោកបានបាត់បង់ជីវិតក្នុងអំឡុងរបបខ្មែរក្រហមនៅឆ្នាំ ១៩៧៦ ប៉ុន្តែឥទ្ធិពលនៃបទចម្រៀងរបស់គាត់នៅតែបន្តមាននៅក្នុងវង់តន្ត្រីខ្មែររហូតមកដល់មកសព្វថ្ងៃនេះ។ ស្នាដៃរបស់អធិរាជសំឡេងមាស ស៊ីន ស៊ីសាមុត គឺជាមរតកសិល្បៈដ៏មានតម្លៃមហាសាល ក្នុងប្រវត្តិសិល្បៈចម្រៀងនិងភាពយន្តខ្មែរ៕
