សិល្បៈអន្តរជាតិ៖ អ្នកគាំទ្រស្លុតចិត្តជាខ្លាំង ក្រោយមានសេចក្ដីប្រកាសកាលពីថ្ងៃអាទិត្យ ទី១៦ ខែកុម្ភៈ ឆ្នាំ២០២៥ ថាបានរកឃើញសាកសពរបស់តារាសម្ដែង Kim Sae Ron (គីម សេរ៉ន) នៅក្នុងផ្ទះដែលនាងរស់នៅ។
ប៉ូលិសបានទម្លាយថាមិត្តភក្ដិរបស់តារាស្រីរូបនេះបានទៅផ្ទះរបស់នាង ហើយពេលទៅដល់ក៏ប្រទះនឹងសពរបស់នាង ទើបខលទំនាក់ទំនងមកកាន់ស្ថានីយ៍ប៉ូលិសដើមរាយការណ៍ កាលពីវេលាម៉ោងប្រមាណ ៤ និង៥០នាទីល្ងាច។
ក្រោយស៊ើបអង្កេត និងស្រាវជ្រាវ ប៉ូលិសបានសន្និដ្ឋាន ៣ចំណុចចំពោះការស្លាប់របស់តារាស្រីរូបនេះថាមិនមែនជាការធ្វើអត្តឃាតឬអំពើឃាតកម្មនោះឡើយ៖
ចំណុចទីមួយ ១. មិនមានស្លាកស្នាមគាស់ផ្ទះ ឬមានអ្វីខុសប្រក្រតីនៅក្នុងផ្ទះ ឬក៏ជុំវិញផ្ទះរបស់តារាស្រីរូបនេះទេ
ចំណុចទី២.មិនមានលិខិតបណ្ដាំណាមួយ ដែលបង្ហាញពីការធ្វើអត្តឃាត ឬទាញទៅរកការសម្លាប់ខ្លួននោះដែរ
ចំណុចទី៣. មូលហេតុដែលធ្វើឱ្យនាងស្លាប់នោះ គឺអាចបណ្ដាលមកពីបញ្ហាគាំងបេះដូងស្លាប់ អាស្រ័យដោយ គេដឹងថានាងនិយមផឹកស្រា និងជក់បារីដែលជាកត្តាចំបងនាំទៅរកគ្រោះថ្នាក់នាំការគាំងបេះដូងស្លាប់ទាំងវ័យក្មេងបែបនេះ។
សូមរំលឹកឡើងវិញថា Kim Sae Ron (គីម សេរ៉ន) កើតនៅឆ្នាំ២០០០ តារាស្រីរូបនេះបានប្រឡូកក្នុងវិស័យសិល្បៈតាំងពីឆ្នាំ ២០០៩។ តារាស្រីវ័យក្មេងរូបនេះ ចាប់ផ្ដើមល្បីល្បាញពីភាពយន្តវាយប្រហារគ្នា «The Man From Nowhere» ក្នុងឆ្នាំ២០១០ និងភាពយន្តភ័យរន្ធត់ «The Neighbor»
នៅឆ្នាំ២០១២។ ស្នាដៃចុងក្រោយរបស់នាងគឺរឿង «Bloodhounds» បានចេញផ្សាយនៅឆ្នាំ២០២៣ ប៉ុន្តែតួអង្គដែលនាងសម្ដែងត្រូវបានគេដកចេញ ដោយសារតែបញ្ហាអាស្រូវបើកបរឡានក្នុងស្ថានភាពស្រវឹងទៅបុកដើមឈើ។
អាជីពសិល្បៈរបស់នាងត្រូវបានព្យួរក្រោយពេលនាងជួបគ្រោះថ្នាក់ចរាចរណ៍ កាលពីខែឧសភា ឆ្នាំ២០២២។ ករណីបំពានច្បាប់ចរាចរណ៍របស់នាង ត្រូវតុលាការពិន័យជាទឹកប្រាក់ ១ម៉ឺនដុល្លារ កាលពីខែមេសា ឆ្នាំ២០២៣៕
